Job 5:1-27
5 “Umawagka, pangngaasim! Adda kadi asinoman a sumungbat kenka?
Asino kadagiti nasantuan ti pagpatulongam?
2 Ta ti sakit ti nakem ti mangpatay iti maag,Ken apal ti pakatayan daydiay nalaka a maallilaw.
3 Nakitak a rimmang-ay ti biag ti maag,Ngem bigla a nailunod ti paggigiananna.
4 Peligroso ti kasasaad dagiti annakna,Ken mailupitlupitda iti ruangan ti siudad+ ket awan ti mangisalakan kadakuada.
5 Kanen ti mabisin dagiti apit ti maag,Alaenna dayta uray no naikabil kadagiti siitan,Ken agawen ti sabsabali dagiti sanikuada.
6 Ta saan a tapok ti pagtubuan dagiti makadangran a banag,Ken saan a ti daga ti pagtaudan ti rigat.
7 Ta nayanak ti tao tapno agrigat,Kas iti rissik ti apuy a sigurado nga agpangato.
8 Ngem agpakaasiak iti Dios,Ket iti Dios nga iyulik ti kasok,
9 Iti Daydiay mangar-aramid kadagiti naindaklan ken di masukimat a bambanag,Kadagiti di mabilang ken nakaskasdaaw a bambanag.
10 Mangyeg iti tudo iti dagaKen padanumanna ti kataltalonan.
11 Itan-okna dagiti napakumbaba,Ken ipangatona dagiti naliday tapno isalakanna ida.
12 Paayenna dagiti panggep dagiti nasikap,Tapno saan nga agballigi dagiti aramidda.
13 Tiliwenna dagiti masirib iti bukodda a kinasikap,+Tapno malapdan ti plano dagiti nalaing.
14 Masabatda ti sipnget uray iti aldaw,Ken agar-arikapda iti tengnga ti aldaw a kas man la iti rabii.
15 Isalakanna ida iti kasla espada a dila dagiti manangirurumen,Salbarenna dagiti napanglaw iti ima dagiti napigsa,
16 Tapno adda namnama para kadagiti napakumbaba,Ngem maapput ti ngiwat dagiti managdakdakes.
17 Kitaem! Naragsak ti tao a tubngaren ti Dios;Isu a saanmo a laksiden ti disiplina ti Mannakabalin-amin!
18 Ta mangpataud iti ut-ot, ngem bedbedanna ti sugat;Mangrangrangkay, ngem mangpaimbag dagiti mismo nga imana.
19 Isalakannaka iti innem a kalamidad,Saankanto a maan-ano uray iti maikapito.
20 Dinanto ipalubos a matayka bayat ti nakaro a bisin,Ken iti bileg ti espada bayat ti gubat.
21 Masalaknibankanto iti mangpadpadakes a dila,+Ken saanmonto a kabuteng ti dumteng a didigra.
22 Katawaamto ti pannakadadael ken bisin,Ken dimonto kabuteng dagiti atap nga animal iti daga.
23 Ta saandakanto a dangran* dagiti bato iti tay-ak,Ket naamonto kenka dagiti atap nga animal iti tay-ak.
24 Masiguradomton a natalged* ti toldam,Ken inton kitaem dagiti tarakenmo, awan ti napukaw kadakuada.
25 Umadunto dagiti annakmoKen kas iti kaadu dagiti mula iti daga ti kaadunto dagiti kaputotam.
26 Napigsakanto pay laeng inton matayka,Kas iti naurnong a trigo a naapit iti panawenna.
27 Kitaem! Inad-adalmi dayta, ket kasta a talaga.
Denggem ken awatem dayta.”
