Ebanghelio ni Lucas 10:1-42
10 Kalpasanna, nangpili ti Apo iti 70 a dadduma pay ket imbaonna a sagdudua+ ken umun-una a mapan iti tunggal siudad ken lugar a papananna.
2 Kinunana kadakuada: “Adu ti anien ngem bassit ti agani. Ipakaasiyo ngarud iti Apo ti panagani a mangibaon kadagiti agani iti talonna.+
3 Ibaonkayo a kas karnero iti tengnga dagiti lobo.+
4 Dikay mangitugot iti pagikabilan iti kuarta wenno pagkargaan iti taraon wenno sandalias,+ ken diyo kablaawan* ti asinoman a masabatyo.
5 Sadinoman a sumrekanyo a balay, ibagayo nga umuna: ‘Adda koma talna iti daytoy a balay.’+
6 No adda managayat iti kappia* sadiay, agbatinto kenkuana ti talnayo. Ngem no awan, agsublinto dayta kadakayo.
7 Isu nga agdaguskayo iti dayta a balay.+ Kanen ken inumenyo dagiti ipaayda,+ ta ti trabahador ket maikari a matangdanan.+ Dikay agdagus iti nadumaduma a balay.
8 “Ket no adda mangpasangbay kadakayo iti sadinoman a siudad a papananyo, kanenyo ti maidasar kadakayo
9 ken paimbagenyo dagiti masakit iti dayta a lugar ken ibagayo kadakuada: ‘Asidegen kadakayo ti Pagarian ti Dios.’+
10 Ngem no awan ti mangpasangbay kadakayo iti siudad, mapankayo kadagiti dadakkel a kalsada ket ibagayo:
11 ‘Uray ti tapok iti siudadyo a kimpet kadagiti sakami ket punasenmi maibusor kadakayo.+ Ngem uray no kasta, ammuenyo nga asidegen ti Pagarian ti Dios.’
12 Ibagak kadakayo, iti dayta nga aldaw, nalaklakanto a makaibtur ti Sodoma ngem iti dayta a siudad.+
13 “Kaasika pay, Corazin! Kaasika pay, Betsaida! No napasamak koma idiay Tiro ken Sidon dagiti milagro a napasamak kadakayo, nabayag koman a nagbabawida babaen ti panagbadoda iti nakersang a lupot ken panagtugawda iti dapdapo.+
14 Iti kasta, nalaglag-anto ti dusa ti Tiro ken Sidon ngem dakayo inton panangukom.
15 Ket sika, Capernaum, maitan-okkanto kadi idiay langit? Maipababakanto iti Tanem!*
16 “Ti dumdumngeg kadakayo, dumdumngeg kaniak.+ Ti di mangipangpangag kadakayo, dinak met ipangpangag. Ket ti saan a mangikaskaso kaniak, saanna met nga ikaskaso Daydiay nangibaon kaniak.”+
17 Maragragsakan a nagsubli ti 70 nga ibagbagada: “Apo, uray dagiti demonio nagtulnogda kadakami idi inusarmi ti naganmo.”+
18 Iti kasta kinunana kadakuada: “Makitak ni Satanas a kasla kimat a natnagen+ manipud langit.
19 Kitaenyo! Intedko kadakayo ti autoridad a mangbaddek kadagiti uleg ken manggagama, ken mangparmek iti amin a pannakabalin ti kabusor,+ ket awanto a pulos ti mangdangran kadakayo.
20 Nupay kasta, dikay agragsak gapu ta nagtulnog kadakayo dagiti demonio. Agragsakkayo ketdi gapu ta naisuraten idiay langit dagiti naganyo.”+
21 Iti dayta met la nga oras, napno ni Jesus iti nasantuan nga espiritu isu a napalalo ti ragsakna ket kinunana: “Idaydayawka, Ama, Apo ti langit ken daga, gapu ta inlemmengmo a naimbag dagitoy kadagiti masirib ken nalaing+ ket impakitam kadagiti ubbing. Wen, O Ama, naaramid daytoy maitunos iti pagayatam.+
22 Inyawaten kaniak ni Amak ti amin a banag, ket awan ti makaam-ammo iti Anak no di ti Ama, awan met ti makaam-ammo iti Ama no di ti Anak+ ken ti asinoman a kayat ti Anak a pangipakaammuan.”+
23 Kinasaritana dagiti adalanna nga is-isuda ket kinunana: “Naragsak dagiti makakita iti bambanag a makitkitayo.+
24 Ibagak kadakayo, kayat ti adu a propeta ken ar-ari a makita dagiti makitkitayo ngem saanda a nakita,+ ken kayatda a mangngeg dagiti mangmangngegyo ngem saanda a nangngeg.”
25 Adda lalaki nga eksperto iti Linteg nga immasideg ken Jesus tapno subokenna: “Mannursuro, ania ti masapul nga aramidek tapno magun-odak ti biag nga agnanayon?”+
26 Kinunana kenkuana: “Ania ti naisurat iti Linteg? Ania ti pannakaawatmo iti dayta?”
27 Kas sungbat kinunana: “‘Masapul nga ayatem ni Jehova* a Diosmo iti amin a pusom ken amin a kararuam* ken amin a pigsam ken amin a panunotmo’+ ken ‘ti kaarrubam a kas iti bagim.’”+
28 Kinuna ni Jesus kenkuana: “Husto ti sungbatmo; itultuloymo nga aramiden dayta ket magun-odamto ti biag.”+
29 Ngem kayatna a paneknekan ti bagina a nalinteg+ isu nga insaludsodna ken Jesus: “Asino a talaga ti kaarrubak?”
30 Insungbat ni Jesus: “Adda lalaki a naggapu idiay Jerusalem a sumalsalog a mapan idiay Jerico. Sinabat dagiti mannanakaw ket linabusanda ken innalada ti amin nga adda kenkuana sada kinabkabil ken pinanawan a dandanin matay.
31 Adda padi a nairana a simmalog iti dayta a dalan. Ngem idi makitana ti lalaki, nagna iti bangir ti dalan.
32 Nagna met iti dayta a dalan ti maysa a Levita. Idi makitana ti lalaki, nagna met iti bangir ti dalan.
33 Ngem adda Samaritano+ nga agbibiahe iti dayta a dalan ket naasian idi nakitana ti lalaki.
34 Isu nga inasitganna ket binukbokanna iti lana ken arak dagiti sugat ti lalaki sana binedbedan. Kalpasanna, insakayna iti asnona ken impanna iti maysa a pagdagusan ket inaywananna.
35 Kabigatanna, inikkanna iti dua a denario* ti agpadpadagus ken imbagana kenkuana: ‘Aywanam daytoy a lalaki, ket bayadakto ti dadduma pay a magastom inton agsubliak.’
36 Kadagitoy a tallo, asino ti pagarupmo a nangibilang iti bagina a kas kaarruba+ ti lalaki a biktima dagiti mannanakaw?”
37 Insungbatna: “Daydiay naasian ken timmulong kenkuana.”+ Imbaga ni Jesus: “Inkan. Kasta met ti aramidem.”+
38 Bayat a magmagnada, simrekda iti maysa a purok. Adda maysa a babai sadiay nga agnagan Marta+ a nangsangaili ken Jesus iti balayna.
39 Adda met adingna nga agnagan Maria a nagtugaw iti sakaanan ti Apo ken dumdumngeg kadagiti ibagbagana.*
40 Ngem maringgoran ni Marta iti adu nga as-asikasuenna isu nga immasideg ket kinunana: “Apo, dimo kadi madlaw a binaybay-annak ni adingko a sisiak ti mangasikaso kadagiti bambanag? Ibagam man kenkuana a tulongannak.”
41 Kinuna kenkuana ti Apo: “Marta, Marta, adu ngamin ti as-asikasuem ken pakaringgoram.
42 Sumagmamano la a banag ti kasapulantayo wenno maysa laeng. Nasayaat* ti pinili+ ni Maria, ket saanto a maikkat dayta kenkuana.”
Footnotes
^ Wenno “kablaawan babaen ti arakup.”
^ Lit., “anak ti kappia.”
^ Lit., “iti saona.”
^ Wenno “Kasayaatan a bingay.”
