Ebanghelio ni Marcos 3:1-35
3 Iti naminsan manen nga iseserrekna iti sinagoga, adda sadiay ti maysa a lalaki a paralisado* ti imana.+
2 Isu a sinipsiputanda no paimbagenna ti lalaki bayat ti Sabbath tapno adda pangakusaranda kenkuana.
3 Kinunana iti lalaki a paralisado* ti imana: “Tumakderka ket umayka ditoy tengnga.”
4 Kalpasanna, insaludsodna kadakuada: “Ania ti rumbeng nga aramiden iti Sabbath, naimbag wenno dakes, mangisalakan iti biag* wenno mangpapatay?”+ Ngem nagulimekda.
5 Nakapungtot a kimmita kadagiti Fariseo ta naladingitan unay iti kinaawan rikna ti pusoda.+ Kalpasanna, kinunana iti lalaki: “Unnatem ta imam.” Inunnatna ket immimbag ti imana.
6 Iti kasta, rimmuar dagiti Fariseo ket dagus a napanda kadagiti sumupsuporta ken Herodes+ tapno pagsasaritaanda ti panangpapatayda ken Jesus.
7 Ngem nagturong ni Jesus iti baybay a kaduana dagiti adalanna, ket simmurot ti adu a tattao a naggapu iti Galilea ken Judea.+
8 Adu met ti simmurot manipud Jerusalem, Idumea, ballasiw ti Jordan, ken iti aglawlaw ti Tiro ken Sidon idi nadamagda ti adu nga ar-aramidenna.
9 Imbagana kadagiti adalanna a mangisaganada iti bangka nga usarenna tapno saan nga agdidinnuron dagiti tattao nga umasideg kenkuana.
10 Gapu ta adu ti pinaimbagna, inaribungbongan ti amin nga adda nakaro a sakitna tapno sagidenda.+
11 Uray dagiti dakes nga espiritu,+ no makitada ni Jesus, agparintumengda kenkuana sada iriaw: “Sika ti Anak ti Dios!”+
12 Ngem namin-adu nga imbilinna a siiinget a saanda nga ipakpakaammo ti kinasiasinona.+
13 Immuli iti bantay ken inkuyogna dagidiay inawisna,+ ket simmurotda kenkuana.+
14 Nangbukel* iti grupo a buklen ti 12, nga inawaganna met iti apostol, a kumuyog kenkuana ken ibaonna a mangasaba
15 ken ikkanna iti pannakabalin a mangparuar kadagiti demonio.+
16 Ti grupo a binukelna* a buklen ti 12+ ket da Simon, a pinanagananna met iti Pedro,+
17 Santiago ken Juan nga annak ni Zebedeo (pinanagananna met ida iti Boanerges, kayatna a sawen “Annak ti Gurruod”),+
18 Andres, Felipe, Bartolome, Mateo, Tomas, Santiago nga anak ni Alfeo, Tadeo, Simon a Cananeo,*
19 ken ni Judas Iscariote, a nangtraidor kenkuana idi agangay.
Kalpasanna, simrek ni Jesus iti maysa a balay,
20 ket immay manen ti adu a tattao, isu a saanna payen a masango ken dagiti adalanna ti mangan.
21 Idi nadamag dayta dagiti kabagianna, immayda tapno ipanawda, ta ibagbagada: “Nadadaelen ti panunotna.”+
22 Ibagbaga met dagiti eskriba a naggapu idiay Jerusalem: “Linuganan ni Beelzebub!* Parparuarenna dagiti demonio babaen ti panguluen dagiti demonio.”+
23 Isu nga inayaban ni Jesus dagiti tattao ket nagsao kadakuada babaen kadagiti ilustrasion: “Kasano a maparuar ni Satanas ni Satanas?
24 No saan nga agkaykaysa ti maysa a pagarian, marpuog dayta;+
25 no saan nga agtutunos ti sangakabbalayan, masinasina dayta.
26 No lablabanan ni Satanas ti bagina ken agkokontra dagiti pasurotna, saan nga agpaut no di ket madadaelto.
27 Kinapudnona, awan ti makastrek ken makapagtakaw iti balay ti napigsa a tao no saanna nga igalut nga umuna ti napigsa a tao.
28 Pudno kunak kadakayo, mapakawan ti amin a banag kadagiti tattao, aniaman a basol nga aramidenda ken aniaman a dakes nga ibagada.
29 Ngem dinto pulos mapakawan ti asinoman nga agsao maibusor iti nasantuan nga espiritu+ no di ket nakabasolen iti agnanayon a basol.”+
30 Imbagana daytoy gapu ta adda dagiti agkunkuna: “Naluganan iti dakes nga espiritu.”+
31 Simmangpet ni nanangna ken dagiti kakabsatna a lallaki,+ ket pinaayabanda isuna bayat nga agtaktakderda iti ruar.+
32 Adu a tattao ti nakatugaw iti aglawlawna ket imbagada: “Adda ni nanangmo ken dagiti kakabsatmo idiay ruar. Birbirokendaka.”+
33 Ngem insungbatna: “Asino ti inak ken kakabsatko?”
34 Kinitana dagiti nakatugaw iti asidegna ket kinunana: “Kitaenyo, ti inak ken dagiti kakabsatko!+
35 Asinoman a mangaramid iti pagayatan ti Dios isu ti kabsatko a lalaki, kabsatko a babai, ken inak.”+
Footnotes
^ Lit., “nagango”
^ Lit., “nagango.”
^ Wenno “kararua.”
^ Wenno “Nangdutok.”
^ Wenno “dinutokanna.”
^ Wenno “naregta.”
^ Awag ken Satanas.
