Ebanghelio ni Mateo 21:1-46
-
Naballigi nga iseserrek ni Jesus (1-11)
-
Dalusan ni Jesus ti templo (12-17)
-
Nailunod ti kayo a higos (18-22)
-
Naisaludsod ti naggapuan ti autoridad ni Jesus (23-27)
-
Ilustrasion maipapan iti dua nga annak (28-32)
-
Ilustrasion maipapan kadagiti manangpapatay a makitaltalon (33-46)
-
Naibelleng ti bato a pasuli (42)
-
21 Idi asidegdan iti Jerusalem ken addadan iti Bantay Dagiti Olibo nga ayan ti Betfage, imbaon ni Jesus ti dua nga adalanna.+
2 Kinunana kadakuada: “Mapankayo iti masungad a purok, ket makakitakayto iti naigalut nga asno nga adda urbonna. Warwaranyo dagita ken iyegyo kaniak.
3 No adda agsaludsod kadakayo, ibagayo, ‘Kasapulan dagitoy ti Apo.’ Iti kasta, dagus nga itednanto dagita.”
4 Napasamak daytoy tapno matungpal ti kinuna ti propeta:
5 “Ibagayo iti anak a babai ti Sion: ‘Kitaem! Um-umayen kenka ti arim,+ naalumamay+ ken nakasakay iti asno, wen, iti urbon nga asno.’”+
6 Napan dagiti adalan ket tinungpalda ti imbilin ni Jesus.+
7 Innalada ti asno ken ti urbonna, ket inyap-apda kadagita ti makinruar a badoda sa nagtugaw ni Jesus kadagita.+
8 Inyaplag ti adu a tattao ti makinruar a badoda iti dalan,+ ket nangtukkol met ti dadduma iti sangsanga ti kayo sa inyaplagda iti dalan.
9 Ipukpukkaw met dagidiay magmagna iti sango ken iti likud ni Jesus: “Maisalakan koma ti Anak ni David!+ Mabendisionan koma daydiay umay iti nagan ni Jehova!*+ Isalakan koma daydiay agnanaed iti langit!”+
10 Idi simrek iti Jerusalem, nagaariwawa dagiti tattao iti siudad ket kinunada: “Asino daytoy?”
11 Insungbat dagiti tattao: “Daytoy ni Jesus a propeta,+ a taga-Nazaret idiay Galilea!”
12 Simrek ni Jesus iti templo ket pinapanawna ti amin nga aglaklako ken aggatgatang, ken binalintuagna dagiti lamisaan dagiti agsuksukat iti kuarta ken dagiti tugaw dagiti aglaklako iti kalapati.+
13 Imbagana kadakuada: “Kas naisurat, ‘Ti balayko ket maawaganto iti balay a pagkararagan,’+ ngem pagbalbalinenyo a kueba dagiti mannanakaw.”+
14 Immasideg met kenkuana idiay templo dagiti bulsek ken pilay, ket pinaimbagna ida.
15 Nakapungtot dagiti panguluen a papadi ken dagiti eskriba+ idi nakitada dagiti milagro nga inaramidna ken nangngegda nga ipukpukkaw dagiti ubbing iti templo: “Maisalakan koma ti Anak ni David!”+
16 ket kinunada kenkuana: “Mangmangngegmo kadi ti ibagbagada?” Insungbat ni Jesus: “Wen. Saanyo kadi a nabasa daytoy, ‘Manipud iti ngiwat dagiti ubbing ken maladaga, maidaydayawka’?”+
17 Kalpasanna, rimmuar iti siudad ket napan idiay Betania ken imyan sadiay.+
18 Iti agsapa, nagbisin ni Jesus bayat nga agsubsubli iti siudad.+
19 Nakakita iti kayo a higos iti igid ti dalan ket inasitganna, ngem awan ti nakitana a bunga no di ket bulbulong laeng.+ Kinunana iti kayo: “Saankanto koman a pulos agbunga.”+ Dagus a nalaylay ti kayo a higos.
20 Idi nakita daytoy dagiti adalan, nagsiddaawda ket kinunada: “Kasano a nalaylay a dagus ti kayo a higos?”+
21 Insungbat ni Jesus: “Pudno kunak kadakayo, no addaankayo iti pammati ken saankayo nga agduadua, saanyonto laeng a maaramid ti kas iti inaramidko iti kayo a higos, no di ket maibagayo pay iti daytoy a bantay, ‘Umaliska ket tumpuakka iti baybay,’ ket mapasamakto dayta.+
22 No adda pammatiyo, mapatganto ti amin nga ikararagyo.”+
23 Idi napan ni Jesus iti templo, immasideg kenkuana dagiti panguluen a papadi ken panglakayen dagiti umili bayat a mangisursuro ket kinunada: “Nangalaam iti autoridadmo a mangaramid kadagitoy a banag? Ken asino ti nangted kenka iti kasta nga autoridad?”+
24 Insungbat ni Jesus: “Adda met saludsodek kadakayo. No sungbatanyo, ibagak kadakayo no naggapuan ti autoridadko a mangaramid kadagitoy a banag:
25 Naggapuan ti autoridad ni Juan a mangbautisar? Idiay langit wenno kadagiti tattao?” Ngem kinunada iti maysa ken maysa: “No ibagatayo, ‘Naggapu idiay langit,’ kunananto kadatayo, ‘Apay ngarud a saanyo a pinati?’+
26 Ngem no ibagatayo, ‘Naggapu kadagiti tattao,’ agpeggadtayo kadagiti tattao, ta mamatida amin a maysa a propeta ni Juan.”
27 Isu nga insungbatda ken Jesus: “Saanmi nga ammo.” Kinuna met ni Jesus kadakuada: “Diak met ngarud ibaga no naggapuan ti autoridadko a mangaramid kadagitoy a banag.
28 “Ania ti panagkunayo? Adda lalaki a dua ti annakna. Napan iti inauna ket kinunana, ‘Anak, inka agtrabaho ita idiay kaubasan.’
29 Insungbat ti anak, ‘Diak kayat,’ ngem nagbabawi ket napan met laeng.
30 Kasta met laeng ti imbagana idi napan iti inaudi. Kinuna ti inaudi, ‘Wen, Tatang,’ ngem saan a napan.
31 Siasino kadakuada ti nangaramid iti pagayatan ti amada?” Insungbatda: “Ti inauna.” Imbaga ni Jesus: “Pudno kunak kadakayo, umun-unanto ngem dakayo a sumrek iti Pagarian ti Dios dagiti agsingsingir iti buis ken dagiti balangkantis.
32 Ta immay ni Juan tapno ipakitana kadakayo ti dalan ti kinalinteg, ngem saankayo a namati. Nupay kasta, namati kenkuana dagiti agsingsingir iti buis ken dagiti balangkantis.+ Uray idi nakitayo daytoy, saankayo a nagbabawi ken namati kenkuana.
33 “Daytoy ti sabali pay nga ilustrasion: Adda tao a nagmula kadagiti ubas iti talonna.+ Inaladanna dayta ken nangaramid iti pagpespesan iti ubas ken nangipatakder iti torre.+ Kalpasanna, impaabangna dayta kadagiti makitaltalon sa napan iti sabali a pagilian.+
34 Idi panagbuburasen, imbaonna dagiti adipenna kadagiti makitaltalon tapno alaenda ti bingayna a bunga.
35 Ngem tiniliw ida dagiti makitaltalon ket kinabkabilda ti maysa, pinapatayda ti sabali, ken adda pay inuborda.+
36 Nangibaon manen kadagiti adipen nga ad-adu ngem iti immuna a grupo, ngem kasta met laeng ti inaramidda.+
37 Kamaudiananna, imbaonna ti anakna ta kinunana, ‘Raemendanto ti anakko.’
38 Idi makita dagiti makitaltalon ti anakna, imbagada iti maysa ken maysa, ‘Daytoy ti agtawid.+ Umaykayo ket patayentayo ken alaentayo ti tawidna!’
39 Isu a tiniliwda ket inruarda iti kaubasan sa pinatayda.+
40 Gapuna, inton umay ti makinkukua iti kaubasan, ania ti aramidenna kadagiti makitaltalon?”
41 Insungbatda: “Gapu ta dakesda, nakaronto* ti panangdadaelna kadakuada ket ipaabangna ti kaubasan kadagiti sabali a makitaltalon, a mangted iti bingayna no dumteng ti panagbuburas.”
42 Kinuna ni Jesus: “Diyo kadi pulos nabasa iti Kasuratan, ‘Ti bato nga imbelleng dagiti agibangbangon ket nagbalin a kangrunaan a bato a pasuli.*+ Naggapu daytoy ken Jehova,* ket nakaskasdaaw dayta kadatayo’?+
43 Daytoy ti makagapu a kunak kadakayo, maikkatto kadakayo ti Pagarian ti Dios ket maited iti nasion a mangar-aramid iti pagayatanna.*
44 Kasta met, maburakto ti asinoman a matnag iti daytoy a bato,+ ket marumekto ti asinoman a matupakanna.”+
45 Idi nangngeg dagiti panguluen a papadi ken Fariseo dagiti ilustrasionna, naawatanda nga isuda ti tuktukoyenna.+
46 Nupay kayatda a tiliwen,* mabutengda kadagiti tattao ta mamatida a maysa a propeta ni Jesus.+
Footnotes
^ Wenno “dakesto.”
^ Lit., “nga ulo iti nagsulian.”
^ Lit., “mangpatpataud iti bungana.”
^ Wenno “nga arestuen.”
