Salmo 40:1-17
Iti direktor. Salmo ni David. Kanta.
40 Sipapasnek a nanginanamaak* ken Jehova,Ket inyasidegna ti lapayagna* kaniak ken impangagna ti panagpatulongko.+
2 Inaonnak iti gumgumluong nga abut,Manipud iti adalem a kapitakan.
Insagpatna dagiti sakak iti dakkel a bato;Pinatibkerna ti pagbatayan dagiti sakak.
3 Inkabilna met iti ngiwatko ti maysa a baro a kanta,+Kanta a pangidaydayaw iti Diostayo.
Adunto ti makakita ken agsiddaaw iti gapuanannaKet agtalekdanto ken Jehova.
4 Naragsak ti tao nga agtalek ken JehovaKen saan a makikadua kadagiti nasukir ken naulbod.
5 O Jehova a Diosko,Nakaad-adu ti inaramidmo,Dagiti nakaskasdaaw nga aramidmo ken pampanunotem para kadakami.+
Awan ti kas kenka;+No padasek nga ibaga ken estoriaen dagita,Diak masaggaysa gapu iti kinaaduda!+
6 Saanmo a tinarigagayan* dagiti sagut ken daton,+Ngem linuktam dagiti lapayagko tapno dumngegak.+
Saanka a nagkiddaw kadagiti daton a mapuoran ken daton gapu iti basol.+
7 Ket kinunak: “Adtoy, immayak.
Ti naisurat iti lukot* ket maipapan kaniak.+
8 Pagragsakak* ti panangaramid iti pagayatam, O Diosko,+Ken adda iti kaunggak ti lintegmo.+
9 Iwaragawagko ti naimbag a damag ti kinalintegmo iti dakkel a kongregasion.+
Kitaem! Saanko a lapdan dagiti bibigko,+Kas pagaammom, O Jehova.
10 Diak ilemmeng iti pusok ti kinalintegmo.
Iwaragawagko ti kinamatalekmo ken ti panangisalakanmo.
Saanko nga ilimed iti dakkel a kongregasion ti napudno nga ayatmo ken ti kinapudnom.”+
11 O Jehova, dimo ipaidam ti asim kaniak.
Ti koma napudno nga ayatmo ken ti kinapudnom ti kanayon a mangsaluad kaniak.+
12 Diak mabilang ti kaadu dagiti didigra a mapaspasarak.+
Nakaad-adu ti biddutko nga uray la diak makitan ti pagnaak;+Ad-aduda pay ngem iti buok ti ulok,Ken maup-upayen ti pusok.
13 Pangngaasim, O Jehova, ta isalakannak.+
O Jehova, darasem ti tumulong kaniak.+
14 Amin nga agpanggep a mangkettel iti biagko*Ket maibabain ken maumsi koma.
Dagidiay maragragsakan iti pannakadidigrakKet umatras koma gapu iti pannakaibabain.
15 Dagidiay agkunkuna kaniak: “Gunggonam!”
Madismayada koma gapu iti pannakaibabainda.
16 Ngem agragsak ken agrag-o koma kenka+Dagidiay mangbirbirok kenka.+
Kanayon koma nga ibaga dagidiay mangipatpateg kadagiti panangisalakanmo:
“Maidaydayaw koma ni Jehova.”+
17 Ngem kakaasiak ken napanglawak;Ni Jehova koma ti mangasikaso kaniak.
Sika ti tumulong ken mangisalakan kaniak;+O Diosko, saanka koma nga agtaktak.+
Footnotes
^ Wenno “Siaanus a nagur-urayak.”
^ Wenno “nagparintumeng tapno agimdeng.”
^ Wenno “pakaragsakan.”
^ Lit., “lukot ti libro.”
^ Wenno “Tarigagayak.”
^ Wenno “kararuak.”
