GAPU iti napartak nga irarang-ay ti organisasion ni Jehova, umad-adu ti kasapulan a Kingdom Hall, Assembly Hall, pasilidad para kadagiti teokratiko nga eskuelaan, remote translation office, ken uray kadagiti pasilidad ti sangay iti nadumaduma a lugar. Gapuna, idi Oktubre 2013, nangbuangay ti Bagi a Manarawidwid iti baro a departamento tapno ti panagdisenio, panagibangon, panangtarimaan, ken panangmantener kadagiti pasilidadtayo ket maaramid iti kasayaatan ken naekonomia a pamay-an. Daytoy a baro a departamento a maawagan iti Worldwide Design/Construction Department (WDC), ket adda iti sangalubongan a hedkuartertayo iti Brooklyn,  New York, ken iwanwanwan ti Publishing Committee ti Bagi a Manarawidwid.

Iwanwanwan ti WDC dagiti Regional Design/Construction Department, nga adda kadagiti sanga nga opisina iti Australia, Germany, South Africa, ken United States. Dagitoy a departamento ti mangpili kadagiti disenio, mangiwanwan iti panagibangon, ken mangmantener kadagiti pasilidad iti masakupanda. Panggepda a naparpartak ti panagipatakder kadagiti Kingdom Hall. Iti naglabas, maibangbangon dagiti Kingdom Hall babaen ti tulong ti Regional Building Committee wenno ti programa para kadagiti pagilian a limitado ti pondoda. Napagmaymaysa dagitoy dua nga urnos tapno naan-anay a mausar dagitoy iti kasayaatan a pamay-an a mangpapartak iti panagibangon.

Tapno maipaay dagiti umad-adu a kasapulan a Kingdom Hall ken Assembly Hall, nabukel ti Local Design/Construction Department iti tunggal sangay. Direkta nga agreport daytoy a departamento iti Komite ti Sangay (Branch Committee). Nagsayaat daytoy nga urnos ta mabalinen dagiti sangay ti mangdutok kadagiti amin-tiempo a construction servant a tumulong kadagiti kakabsat iti lugar a pakaibangonan dagiti Kingdom Hall ken Assembly Hall.

Idi Abril 2014, addan nasurok a 270 a dadakkel a proyekto a masapul a malpas, a pakairamanan ti 90 a remote translation office, 35 nga Assembly Hall, ken 130 a proyekto iti sangay. Kanayonanna, kasapulan unay dagiti Kingdom Hall ta nasurok a 14,000 ti masapul a maibangon wenno agkasapulan iti dakkel a pannakatarimaan.

Talaga a makapabileg a makita ti agkaykaysa nga ili ni Jehova a mangibangon iti pasilidad para iti pakaidayawan ti nasantuan a naganna uray nagduduma ti nasion,  kultura, ken lengguaheda! Kinuna ni Dan Molchan nga agtrabtrabaho iti Personnel Committee Office iti sangalubongan a hedkuarter: “Adu pay a trabaho ti masapul a maipalpas, isu nga apresiarenmi ti kararag dagiti kakabsat agraman dagiti donasionda tapno masuportaran ti trabaho. Agyamyamankami met unay kadagiti kakabsat nga agbolboluntario a tumulong iti proyekto.”