Agserserbi ni Crystal idiay Sierra Leone kas misionera iti teritoria ti sign language. Maysa nga aldaw, sakbay a mapan iti teritoria, inkararagna a makabirok koma kadagiti umel, ket idi mapanen agsarungkar, nagna iti dalan a saanna a gagangay a pagpagnaan. Nagsalsaludsod ni Crystal kadagiti lumugar no adda am-ammoda nga umel, ket adda intudoda a balay. Naam-ammona sadiay ti  maysa a mannakigayyem nga agtutubo a babai nga interesado iti naimbag a damag ken kayatna ti umatender iti gimong iti sign language. Kalpasanna, insaludsod dagiti tattao iti compound no kayat ni Crystal a maam-ammo ti maysa pay nga umel. Isu a nakabirok manen iti napakumbaba a tao nga agbirbirok iti kinapudno. Saan laeng idi a namnaminsan a nangasaba ni Crystal iti dayta a kalsada ngem iti dayta laeng nga agsapa a naam-ammona ti dua nga umel. Kombinsido ni Crystal a saanna koma a nabirokan dagiti interesado no saan a tinulongan ni Jehova.

Agmanmaneho ni Emmanuel a taga-Liberia a mapan iti Kingdom Hall tapno umatender iti gimong iti ngudo ti lawas. Nakitana ti maysa a lalaki a desente ti panagbadbadona a nakatakder iti igid ti kalsada. Permi ti liday ti lalaki. Naasian ni Emmanuel isu a nagsardeng tapno kitaenna no ania ti maitulongna. Naammuanna a Moses ti nagan ti lalaki. Iti napalabas a rabii, natakaw ti amin a kuartana, ket pampanunotennan ti agpakamatay. Dimngeg ni Emmanuel ken Moses sa imbagana, “Pangngaasim, sumurotka kaniak idiay Kingdom Hall.” Nagkaduada a napan iti Kingdom Hall. Nakasangit ni Moses iti nangngegna iti gimong. Kalpasan ti palawag, imbagana: “Para kaniak dayta a palawag! Naidumduma dagiti Saksi  ni Jehova.” Kalpasan ti gimong, immanamong ni Moses a mayadalan iti Biblia ket regular itan a makigimgimong.

Aggigian idiay Guinea-Bissau ti 15 anyos nga estudiante a ni Aminata. Idi 13 ti tawenna, imbaga ti titserna iti arts kadagiti estudiantena nga agdrowingda kadagiti maskara ken dadduma pay a banag nga adda koneksionna iti piesta. Ngem nagdrowing ni Aminata kadagiti animal ken mula iti papel sa insuratna ti “Paraiso.” Idi kinolekta ti titser dagiti drowing, imbagana ken Aminata nga awan ti koneksion ti drowingna iti topiko ket zero ti intedna nga iskor. Kalpasan ti klase, immasideg ni Aminata iti titserna ket insaludsodna, “Asino ti agselselebrar iti piesta?”

“Dagiti pagano,” insungbat ti titser.

Imbaga ni Aminata: “Saanak a pagano, isu a saanak nga agselselebrar iti piesta. Mamatiak nga asidegen a pagbalinen ti Dios a paraiso ti daga, ket dayta ti indrowingko.” Imbaga ti titser nga ikkanna lattan ni Aminata kadagiti saludsod a sungbatanna iti papel. Ti resulta? Dua laeng ti kamalina iti 20 a saludsod.

Pito laeng ti agibumbunannag iti maysa a grupo iti adayo a purok ti Malawi. Naaramid iti kayo, ruot, ken nalaga a runo ti paggigimonganda. Natignayda iti panagbisita ti manangaywan iti sirkito isu a sireregta nga inyawisda ti Pananglaglagip iti ipapatay ni Kristo. Bayat  ti Memorial, nangibitinda kadagiti lampara tapno adda pagsilawanda. Ngem saan unay a makagaraw ti ispiker iti kinaadu dagiti interesado iti aglawlawna. Nakaragragsak ti 7 nga agibumbunannag idi naammuanda a 120 ti bilang ti immatender!

Kaaduanna a saan a dagus a makita ti nasayaat a resulta ti special metropolitan public witnessing. Idiay Lomé, a kabesera ti Togo, immasideg ti maysa a babai iti literature stand ket nangala iti broshur a Posible nga Agbalin a Naragsak ti Pamiliam uray agpangadua idi damo. Kalpasanna, inlawlawag kenkuana dagiti kakabsat ti Efeso 5:3. Innala dagiti Saksi ti numero ti telepono ti babai ket intedda met ti numeroda. Kalpasan ti dua a lawas, timmawag ti babai ket imbagana: “Ti agpayso, diak kayat dagiti Saksi ni Jehova. Ngem binasak latta ti broshur, ket nakamaymayat. Natulongannak dayta tapno masolusionanmi dagiti problemami nga agassawa, ken natulongak pay ti dua a agassawa. Kamali ti panangkitak kadagiti Saksi ni Jehova. Pangngaasiyo ta umaydak iyadalan iti Biblia.” Nairugi a nayadalan ti babai ken ti maysa kadagiti agassawa a tinulonganna.

Ti Ankasie ket maysa a bassit nga ili idiay Ghana. Adda sumagmamano a negosiante sadiay a mangipuespuesto kadagiti lakoda iti kalsada. Kada Lunes, adda met maikabkabil a literature stand para iti panangasaba iti publiko. Kinasabaan ti maysa a brother a ni Samuel ti lalaki nga agnagan Enoch sa inikkanna iti broshur a Listen to God. Dinamag ni Enoch no adda publikasionda iti lengguahe a Kusaal.

 Insungbat ni Samuel: “Pasensiakan, awan. Ngem adda broshurmi iti Frafra,” maysa a lengguahe a medio kapadpada ti Kusaal. Idi agangay, sakbay a nagawid ni Enoch iti lugarda iti adayo nga amianan, dimmawat pay kadagiti publikasion nga itedna kadagiti kabagianna.

Idi nagsubli ni Enoch idiay Ankasie, dagus a napan ken Samuel ket adda intedna a papel. Impatarus ni Enoch ti broshur a Listen to God iti Kusaal! Makigimgimongen ni Enoch ken regular a makipagad-adal iti Biblia.