Introduksion iti Seksion 2
Apay a dinadael idi ni Jehova ti lubong babaen iti layus? Iti rugi ti pakasaritaan ti tao, nangrugi ti panagbinnusor iti nagbaetan ti naimbag ken dakes. Pinili ti dadduma a tattao, kas kada Adan, Eva, ken ti anakda a ni Cain, ti dakes. Pinili met ti dadduma, kas kada Abel ken Noe, ti naimbag. Adu ti nagbalin a nakadakdakes isu a dinadael idi ni Jehova ti lubong. Masursurotayo iti daytoy a seksion a makitkita ni Jehova no ania ti pilientayo ken saanna nga ipalubos nga abaken ti dakes ti naimbag.
ITI DAYTOY A SEKSION
LEKSION 3
Nagsukir da Adan ken Eva iti Dios
Apay a naidumduma ti maysa a kayo iti hardin ti Eden? Apay a nangan ni Eva iti bunga dayta a kayo?
LEKSION 4
Pimmatay Gapu iti Gura
Inawat ti Dios ti daton ni Abel ngem dina inawat ti daton ni Cain. Idi naammuan dayta ni Cain, nakapungtot ket nakaaramid iti dakes.
LEKSION 5
Ti Daong ni Noe
Idi nangasawa dagiti dakes nga anghel kadagiti babbai ditoy daga, naaddaanda kadagiti higante nga annak. Napno ti daga iti kinaranggas. Ngem naiduma ni Noe ta natulnog ken ay-ayatenna ti Dios.
LEKSION 6
Walo ti Naisalakan iti Layus
Nagtudo iti 40 nga aldaw ken 40 a rabii ket naglayus. Nagyan ni Noe ken ti pamiliana iti daong iti nasurok a makatawen. Idi kuan, mabalindan ti rummuar.
