DA Santiago ken Judas ket kakabsat ni Jesus iti ina. Karaman da Pedro ken Juan kadagiti 12 nga apostol. Dagitoy uppat a lallaki ti nangputar iti pakadagupan a pito a surat a paset ti Kristiano a Griego a Kasuratan. Tunggal surat ket naipanagan iti nangisurat iti dayta. Dagiti naipaltiing a balakad kadagitoy a surat ket nairanta a tumulong kadagiti Kristiano a mangtaginayon iti kinasungdoda ken Jehova ken iti Pagarianna.

Mangipakita iti pammati. Saan nga umdas ti basta panangibaga ti maysa nga adda pammatina. Tignayennaka ti pudno a pammati. “Pudno unay, . . . ti pammati nga awanan ar-aramid natay,” insurat ni Santiago. (Santiago 2:26) No ti maysa a Kristiano sanguenna dagiti pakasuotan buyogen ti pammati, makatulong dayta iti panagibturna. Tapno agballigi, masapul nga agkiddaw iti sirib iti Dios, a patienna nga ipaay ti Dios dayta. Ti panagibtur agresulta iti anamong ti Dios. (Santiago 1:2-6, 12) No ti agdaydayaw agtalinaed a natarnaw buyogen ti pammati, tumulong kenkuana ni Jehova a Dios. Kinuna ni Santiago: “Umadanikayo iti Dios, ket isu umadaninto kadakayo.”—Santiago 4:8.

Masapul a nabileg ti pammati ti maysa a Kristiano tapno masarangetna dagiti sulisog ken dakes nga impluensia. Gapu iti agraraira a dakes nga ar-aramid, indagadag ni Judas kadagiti kapammatianna a ‘makidangadangda a sipipinget maipaay iti pammati.’—Judas 3.

Taginayonen ti nasayaat a kababalin. Namnamaen ni Jehova a dagiti agdaydayaw kenkuana agbalinda a nasantuan, kayatna a sawen, nadalusda iti amin a banag. Insurat ni Pedro: “Agbalinkayo met a nasantuan a mismo iti isuamin a kababalinyo, agsipud ta adda a naisurat: ‘Masapul a nasantuankayo, agsipud ta [siak ni Jehova] nasantuanak.’” (1 Pedro 1:15, 16) Addaan dagiti Kristiano iti nagsayaat nga ulidan. Kinuna pay ni Pedro: “Ni Kristo nagsagaba a maipaay kadakayo, a nangibati kadakayo iti pagwadan tapno sisisinged a surotenyo dagiti addangna.” (1 Pedro 2:21) Nupay agsagaba dagiti Kristiano gapu ta an-annurotenda dagiti pagalagadan ti Dios, masalimetmetanda ti “naimbag a konsiensia.” (1 Pedro 3:16, 17) Indagadag ni Pedro kadagiti Kristiano a napnuanda koma iti nasantuan a kababalin ken ar-aramid a mangipakita nga addaanda iti nadiosan a debosion bayat nga ur-urayenda ti aldaw a panangukom ti Dios ken ti naikari a baro a lubong a ditoy “agtataeng ti kinalinteg.”—2 Pedro 3:11-13.

Mangipakita iti ayat. “Ti Dios ket ayat,” insurat ni Juan. Inlawlawag ti apostol nga impakita ti Dios ti naindaklan nga ayatna babaen ti panangibaonna ken Jesus kas maysa a “sakripisio maipaay kadagiti basoltayo.” Ania ti rumbeng nga ipakita dagiti Kristiano? Inlawlawag ni Juan: “Dungdungnguen, no kastoy ti panangayat kadatayo ti Dios, ngarud datayo pagrebbengantayo nga ayaten ti maysa ken maysa.” (1 Juan 4:8-11) Maysa a pamay-an a maipakita ti kasta nga ayat ket babaen ti panagbalintayo a managpadagus kadagiti kapammatiantayo.—3 Juan 5-8.

Ngem kasano a maipakita dagiti agdaydayaw ken Jehova ti panagayatda kenkuana? Kinuna ni Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3; 2 Juan 6) Dagidiay ngarud agtulnog iti Dios masiguradoda nga itultuloy nga ayaten ida ti Dios, a manamnamada ti “agnanayon a biag.”—Judas 21.

—Naibasar iti Santiago; 1 Pedro; 2 Pedro; 1 Juan;, 2 Juan; 3 Juan; Judas.