ITI Bantay dagiti Olibo, a sadiay matannawagan ti nangayed a buya ti Jerusalem ken ti templona, uppat kadagiti apostol ni Jesus ti nagsaludsod kenkuana maipapan iti sumagmamano a banag a naibagana kadakuada. Kaibagbaga ni Jesus a madadaelto ti templo ti Jerusalem. Ken nadakamatna idin kadakuada ti maipapan iti “panungpalan ti sistema ti bambanag.” (Mateo 13:40, 49) Ita, insaludsod dagiti apostol: “Anianto ti pagilasinan ti kaaddam ken ti panungpalan ti sistema ti bambanag?”—Mateo 24:3.

Iti sungbatna, imbaga ni Jesus no anianto ti mapasamak sakbay a madadael ti Jerusalem. Ngem saan laeng a dayta ti kaipapanan ti sasaona. Ti padtona ket addanto dakdakkel a kaitungpalanna iti intero a lubong. Impadto ni Jesus ti maipapan iti ragup dagiti pasamak ken kasasaad iti lubong a mangbukel iti maysa a pagilasinan. Dayta a pagilasinan ipakitana kadagiti tattao ditoy daga a nangrugin ti kaadda ni Jesus kas Ari idiay langit. Iti sabali a pannao, ipakita ti pagilasinan a ni Jehova a Dios insaadnan ni Jesus kas Ari iti nabayagen a naikari a Mesianiko a Pagarian. Ti pagilasinan kaipapananna a ti Pagarian asidegen nga ikkatenna ti kinadakes ken iyegna ti pudpudno a talna iti sangatauan. No kasta, dagiti banag nga impadto ni Jesus ti mangtanda kadagiti maudi nga aldaw daytoy agdama a daan a sistema—a pakaibilangan ti relihion, politika, ken kagimongan—ken ti pangrugian ti baro a sistema.

Iti panangilawlawagna iti mapasamak ditoy daga bayat ti kaaddana kas Ari idiay langit, kinuna ni Jesus nga addanto sangalubongan a gubgubat, kinakirang ti taraon, napipigsa a ginggined, ken nasaknap a sakit. Kumaronto ti kinakillo. Dagiti pudno nga adalan ni Jesus ikasabadanto ti naimbag a damag ti Pagarian ti Dios iti intero a daga. Agpatingganto amin dagitoy iti “dakkel a rigat” a di pay pulos napasamak.—Mateo 24:21.

Kasanonto a maammuan dagiti pasurot ni Jesus nga asidegen dayta a rigat? “Agsursurokayo manipud iti kayo a higos,” kinuna ni Jesus. (Mateo 24:32) No agsaringiten dagiti sanga ti higos, nabatad dayta a tanda nga asidegen ti kalgaw. Umasping iti dayta, no mapasamak iti maymaysa a tiempo ti amin a banag nga impadto ni Jesus, nalawag dayta a tanda nga asidegen ti panungpalan. Ti laeng Ama ti makaammo iti eksakto nga aldaw ken oras a panangrugi ti dakkel a rigat. Gapuna, indagadag ni Jesus kadagiti adalanna: “Agtultuloykayo a siririing, ta saanyo nga ammo no kaano ti naituding a tiempo.”—Marcos 13:33.

—Naibasar iti Mateo kapitulo 24 ken 25; Marcos kapitulo 13; Lucas kapitulo 21.