PASET 8
No Dumteng ti Trahedia
“Agragrag-okayo unay, nupay iti apagbiit a kanito iti agdama, no isu ti masapul, napagleddaangkayo babaen iti nadumaduma a pakasuotan.”—1 Pedro 1:6
Uray no ikagumaanyo nga agbalin a naragsak ti panagasawa ken pamiliayo, adda latta dagiti mapasamak a mangpaladingit kadakayo. (Eclesiastes 9:11) Siaayat a mangipaay ti Dios iti tulong no maipasangotayo iti pakarigatan. No iyaplikaryo dagiti prinsipio ti Biblia, mapagballigianyo a sangapamiliaan uray dagiti karirigatan a kasasaad.
1 AGTALEK KEN JEHOVA
TI KUNA TI BIBLIA: “Iyallatiwyo kenkuana ti isuamin a pakaringgoranyo, agsipud ta isu maseknan kadakayo.” (1 Pedro 5:7) Laglagipenyo a saan a gapuanan ti Dios dagiti pakarigatanyo. (Santiago 1:13) No sumingedka kenkuana, masiguradom a tulongannaka. (Isaias 41:10) “Iparukpokyo ti pusoyo” iti sanguananna.—Salmo 62:8.
Maliwliwaka met no inaldaw a basaem ken adalem ti Biblia. Kas resultana, mapasaram ti panangliwliwa ni Jehova iti amin a rigattayo. (2 Corinto 1:3, 4; Roma 15:4) Inkarina a mangted iti “talna ti Dios a mangringbaw iti isuamin a panunot.”—Filipos 4:6, 7, 13.
NO ANIA TI MAARAMIDAM:
-
Agpatulongka ken Jehova tapno agbalinka a kalmado ken makapagpanunotka a naimbag
-
Ammuem dagiti maaramidam ken piliem ti kasayaatan para kenka
2 AYWANAM TI BAGIM KEN TI PAMILIAM
TI KUNA TI BIBLIA: “Ti puso daydiay mannakaawat gumun-od iti pannakaammo, ket ti lapayag dagidiay masirib ikagumaanna ti makasarak iti pannakaammo.” (Proverbio 18:15) Ammuem ti amin nga impormasion ken ti kasapulan ti tunggal miembro ti pamiliam. Makisaritaka ken dumngegka kadakuada.—Proverbio 20:5.
Ania ti aramidem no adda matay nga ipatpategmo? Dika koma bumdeng a mangipeksa iti riknam. Laglagipem nga adda idi gundaway a “nagarubos dagiti lua ni Jesus.” (Juan 11:35; Eclesiastes 3:4) Napateg met nga adda umdas nga inana ken turogmo. (Eclesiastes 4:6) Iti kasta, nalaklakam a daeran ti narigat a kasasaad.
NO ANIA TI MAARAMIDAM:
-
Sakbay a dumteng ti trahedia, iyugalim ti makisarita iti pamiliam ta nalaklakada a makisarita kenka no adda problema
-
Makisaritaka kadagiti nakapasar iti kasta a problema
3 AGPATULONGKA
TI KUNA TI BIBLIA: “Ti pudno a kadua [wenno gayyem] agayat iti isuamin a tiempo, ken ti kabsat a mayanak no adda rigat.” (Proverbio 17:17) Kayatnaka a tulongan dagiti gagayyemmo, ngem mabalin a dida ammo no ania ti aramidenda. Dika bumdeng a mangibaga no ania a talaga ti kasapulam. (Proverbio 12:25) Agkiddawka met iti naespirituan a tulong kadagiti makatarus iti Biblia. Makatulong kenka ti panangiwanwan nga ipaayda manipud iti Biblia.—Santiago 5:14.
No kanayon a makikaduaka kadagiti addaan pudno a pammati ken panagtalek kadagiti kari ti Dios, magun-odam ti tulong a kasapulam. Maliwliwaka met no tulongam ti dadduma nga agkasapulan iti pammaregta. Isaritam iti sabsabali ti pammatim maipapan ken Jehova ken kadagiti karina. Tulongam dagiti agkasapulan ken dimo isinsina ti bagim kadagiti mangay-ayat ken maseknan kenka.—Proverbio 18:1; 1 Corinto 15:58.
NO ANIA TI MAARAMIDAM:
-
Makisaritaka iti nasinged a gayyemmo ken awatem ti tulongna
-
Ibagam no ania a talaga ti kasapulam
Baka Kayatmo Met ti
AGRIINGKAYO!
No Agsaludsod ti Anakmo Maipapan iti Ipapatay
Uppat a pamay-an a makatulong kenka a mangsungbat kadagiti saludsodda ken mangisuro no kasanoda nga iliwliwag ti riknada no adda matay nga ay-ayatenyo.
AGRIINGKAYO!
No Dumteng ti Trahedia—Ipapatay ti Ay-ayaten iti Biag
Lima kadagiti nasinged a kapamilia ni Ronaldo ti natay iti aksidente iti lugan 16 a tawenen ti napalabas. Uray no kasla adda latta kurang iti biagna, timmalnan ti panunotna.
