Ti nabayagen nga ur-urayentayo a Pagarian ti Dios—maysa a sangalubongan a gobierno nga impasdek ti Dios—ket asidegen a mangyeg iti talna ken panagkaykaysa ditoy daga. “Agsaknapto ti talna,” kas inkari ti Salmo 72:7. Ngem kaano nga iturayan ti Pagarian daytoy daga? Kasano a mangrugi ti panangiturayna iti daga? Ken kasanoka a magunggonaan iti panangituray ti Pagarian?

Impadto ti Biblia dagiti naidumduma a pasamak kas pagilasinan nga asidegen ti Pagarian ti Dios. Dagitoy ti mangbukel iti ragup a “pagilasinan”​—gubat, bisin, sakit, adu a ginggined, ken ikakaro ti kinadakes iti intero a lubong.​—Mateo 24:3, 7, 12; Lucas 21:11; Apocalipsis 6:2-8.

Kuna ti sabali pay a padto: “Iti maudi nga al-aldaw, dumtengto dagiti delikado ken narigat a tiempo. Ta ay-ayatento laeng dagiti tattao ti bagbagida, managayat iti kuarta, . . . nasukir kadagiti nagannak, saan a managyaman, saan a matalek, awanan iti ayat iti padada a tao, saanda a kayat ti makitulag, manangpadakes, awanan panagteppel, nauyong, kagurada ti kinaimbag, . . . napannakkel, ayatenda ti ragragsak imbes a ti Dios.” (2 Timoteo 3:1-4) Nabayagen a kasta ti ugali ti dadduma, ngem ita, kastan ti kaaduan.

Nangrugi idi 1914 a matungpal dagita a padto. Nagkomento dagiti historiador, politiko, ken mannurat maipapan iti panagbalbaliw ti lubong kalpasan dayta a tawen. Kas pagarigan, insurat ti taga-Denmark a historiador a ni Peter Munch: “Ti gubat idi 1914 ti nangrugian ti dakkel a panagbalbaliw iti pakasaritaan ti tao. Sakbay dayta a tawen, naipagarup a sumaysayaat dagiti kasasaad, . . . ngem bigla a dimteng ti trahedia, buteng, gura, ken napeggaden ti amin a lugar.”

Ngem makaparagsak ta sigurado a kalpasan dagita, natalnanton dagiti kasasaad. Ipakita dagita a ti intero a daga ket asidegen nga iturayan ti Pagarian. Kinapudnona, innayon ni Jesus daytoy a nasayaat a pasamak iti intedna a pagilasinan ti panungpalan: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.”​—Mateo 24:14.

Dayta a naimbag a damag ti kangrunaan a tema ti mensahe dagiti Saksi ni Jehova. Kinapudnona, ti kangrunaan a publikasionda ket napauluan Ti Pagwanawanan Mangibumbunannag iti Pagarian ni Jehova. Kanayon nga ilawlawagna dagiti nagsayaat nga aramidento ti Pagarian ti Dios para iti tattao ken iti daga.

Dagitoy nga uppat a napateg a kinapudno ti karaman iti sungbat:

1. Saan a dagiti lider ti politika iti agdama a lubong ti mangituray iti Pagarian.

2. Saanto a kayat dagiti lider ti politika daytoy a lubong nga isuko ti panagturayda ken minamaag a labananda ti Pagarian ti Dios.​—Salmo 2:2-9.

3. Masapul a dadaelento ti Pagarian ti Dios dagiti napolitikaan a pagarian a mayat nga agtultuloy a mangituray iti tattao. (Daniel 2:44; Apocalipsis 19:17-21) Daytoy a maudi a sangalubongan a gubat ket maawagan iti Armagedon.​—Apocalipsis 16:14, 16.

4. Amin a mayat nga agpaituray iti Pagarian ti Dios ket maisalakan iti Armagedon tapno agbiag iti natalna a baro a lubong. Isudanto ti mangbukel iti kuna ti Biblia a “dakkel a bunggoy,” a posible a minilion ti bilangda.​—Apocalipsis 7:9, 10, 13, 14.

Ti edukasion ti umuna a pamay-an tapno agbalinka nga iturayan ti Pagarian ti Dios. Inkararag pay ketdi ni Jesus iti Dios: “Maaddaanto iti biag nga agnanayon dagidiay mangam-ammo kenka, ti maymaysa a pudno a Dios, ken ti imbaonmo, ni Jesu-Kristo.”​—Juan 17:3.

No maam-ammo dagiti tattao ni Jehova a Dios kas maysa a Persona, adu ti magunggonada. Panunotem ti dua laeng: Umuna, maaddaanda iti natibker a pammati. Dayta a pammati a naibatay iti ebidensia ti mangkombinsir kadakuada nga agpayso ti Pagarian ti Dios ken asidegen nga agturay. (Hebreo 11:1) Maikadua, umuneg ti ayatda iti Dios ken iti padada a tattao. Gapu ta ay-ayatenda ti Dios, naimpusuan nga agtulnogda kenkuana. Gapu ta ay-ayatenda ti padada a tattao, aramidenda ti imbaga ni Jesus a maaw-awagan iti Nabalitokan a Bilin: “No ania ti kayatyo nga aramiden dagiti tattao kadakayo, aramidenyo met dayta kadakuada.”​—Lucas 6:31.

Kas iti nadungngo nga ama, kayat ti Namarsua kadatayo ti kasayaatan para kadatayo. Kayatna a masagraptayo ti aw-awagan ti Biblia a “ti pudpudno a biag.” (1 Timoteo 6:19) Ti biag ita ket saan a “ti pudpudno a biag.” Para iti minilion, nagrigat ti biag ken agpakpakarigatda nga agbiag. Kas panirpatan iti dayta a “pudpudno a biag,” kitaem ti dadduma kadagiti nagsayaat nga aramidento ti Pagarian ti Dios.