TI ESTORIA NI DAMI

Kasla simple la ti sakit ti ulo ni Daddy idi damo. Ngem idi kimmaro, timmawag ni Mommy iti ambulansia. Malagipko pay idi inlugan ken impanawda isuna. Diak man la napanunot a daydin ti maudi a pannakakitak kenkuana a sibibiag. Kalpasan ti tallo nga aldaw, natay ni Daddy gapu iti pimmutok nga urat iti utekna. Innem la ti tawenko idi.

Adu a tawen a pinabpabasolko ti bagik iti ipapatay ni Daddy. Malaglagipko no kua ti eksena idi innalada, sa isaludsodko: ‘Apay a nakatakderak laeng idi? Apay nga awan inaramidko?’ No makitak dagiti adda sakitna a lallakay ken babbaket, mapanunotko, ‘Apay a sibibiagda ket saan ni Daddy?’ Idi agangay, tinulongannak ni Mommy tapno maibagak ti marikriknak. Ken nagdakkel ti naitulong dagiti padami a Saksi ni Jehova.

Para iti dadduma, agladingitka a dagus kalpasan ti trahedia, ket mailiwliwagmonton dayta. Ngem saan a kasta ti napasamak kaniak. Saak la nagladingit idi tin-edyerakon.

Isu a ti maibagak kadagiti agtutubo a natayan iti nagannak, “Ibagam iti sabali a tao ti marikriknam. Pagsayaatam no nasapsapam nga iruar ti marikriknam.”

Nagrigat nga awan ni Daddy kadagiti nararagsak a pasamak iti biagko. Ngem naliwliwaak iti kari ti Biblia iti Apocalipsis 21:4 a dandanin ‘punasen ti Dios ti amin a lua kadagiti matatayo, ket awanton ni patay, awanto metten ti panagleddaang wenno panagsangit wenno ut-ot.’

TI ESTORIA NI DERRICK

Ti dadduma kadagiti kararagsakan a kapadasak ket ti panagkadkaduami ken Papa nga agbanniit ken agkamping iti bantay. Kaykayatna idi dagiti bantay.

Adda idin sakit ti puso ni Papa. Malagipko a naminsan wenno naminduak a binisita isuna iti ospital idi bassitak pay. Ngem diak idi ammo a grabe gayamen ti sakitna. Natay ni Papa iti sakit ti puso idi siam ti tawenko.

Sangitak a sangit idi natay. Kasla diak makaanges ken awan kayatko a katungtong. Idi la a nariknak ti kasta ken awanen gaganaygayak a mangaramid iti aniaman. Idi damo, nangipakita met iti interes dagiti agtutubo a karelihionanmi ngem apagbiit la dayta. Ibagada no kua, “Orasen ni tatangmo” wenno “Innalan ti Dios” wenno “Addan idiay langit.” Saanak a pulos nakontento kadagita nga imbagada ngem diak met ammo idi no ania a talaga ti isursuro ti Biblia.

 Idi kuan, nakipagadal iti Biblia ni Mama kadagiti Saksi ni Jehova, ket di nagbayag, nakipagadalkami met ken manongko. Naammuanmi ti kasasaad dagiti natay ken ti makaliwliwa a kari ti Dios a panagungar. (Juan 5:28, 29) Ngem ti permi a nakatulong kaniak ket ti sasao ti Dios iti Isaias 41:10: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto.” Idi agladladingitak ken agingga ita, nagdakkel a liwliwa nga ammok nga adda ni Apo Jehova para kaniak.

TI ESTORIA NI JEANNIE

Idi pito ti tawenko, natay ni Nanang iti kanser. Kasla tagtagainep laeng daydi nga aldaw. Malagipko a natay isuna iti balaymi ken adda idi da lolo ken lolak. Kalmado idi ti amin. Binatil nga itlog ti pinangrabiimi. Panagriknak, in-inut a nagtupak ti langit kaniak.

Panagriknak idi ken iti tawtawen kalpasan dayta, masapul nga agbalinak a natibker para iti adingko a babai isu a linaplapdak ti riknak. Agingga ita, adda tendensiak a di mangyebkas iti nasaem a marikriknak. Ammok a saan a nasayaat dayta.

Malaglagipko ti ayat ken suporta dagiti kalugaranmi a padami a Saksi ni Jehova. Uray no nabiitkam pay nga umat-atender kadagiti gimong iti Kingdom Hall, nagkaykaysada a timmulong kadakami a kas man la nabayagkamin nga agkakapamilia. Iti intero a makatawen, awan malagipko a nagluto ni Tatang iti pangrabiimi ta kanayon idi nga adda agur-uray a makan iti ridawmi.

Nagdakkel ti epektona kaniak ti sasao iti Salmo 25:16, 17. Impakaasi ti kompositor dayta a kanta iti Dios: “Tumaliawka kaniak, ket ipaayannak iti parabur; ta agmaymaysaak ken naparigatanak. Dagiti tuok ti pusok immaduda; manipud kadagiti pakarigatak O iruarnak.” Makapabang-ar a maammuan a saanka a pulos agmaymaysa no malidlidayanka. Adda ti Dios iti abaymo. Iti tulong ti Biblia, nakabangonak manen ken nakapagpokusak kadagiti positibo a bambanag, kas iti makaliwliwa a kari ti Biblia a panagungar. Adda namnamak a makitakto manen ni Nanang ken mas maam-ammokto isuna nga addaan iti perpekto a salun-at iti paraiso a daga.—2 Pedro 3:13.

Kayatmo kadi a maammuan ti ad-adu pay maipapan iti makaliwliwa a mensahe ti Biblia kadagidiay agladladingit? I-download-mo ti libre a kopia ti publikasion a “No Adda Matay nga Ay-ayatenyo.” Mapan iti www.mt1130.com/ilo ken kitaem ti PUBLIKASION > LIBRO KEN BROSHUR.