PRINSIPIO TI BIBLIA: “Sigurado nga agballigi dagiti plano ti nagaget, ngem sigurado a pumanglaw ti amin a nadarasudos.”​—Proverbio 21:5.

TI KAIPAPANANNA: Mangaramidka kadagiti plano ket siguraduem a matungpal dagita tapno agballigika. Agplanoka ngarud sakbay nga aggastoka. Laglagipem a posible a saanmo a magatang ti amin a kayatmo isu a gastuem a nainsiriban ti kuartam.

TI MABALINMO NGA ARAMIDEN:

• Surotem ti imbadyetmo. Isuratmo amin a paggastuam ken igrupom dagita sigun iti kategoria. Sa ilasinmo ti gastuem para iti tunggal kategoria. No simmobraka iti imbadyetmo iti maysa a kategoria, kissayam ti kuarta iti sabali a kategoria tapno masuposupan dayta. Kas pagarigan, no ad-adu ti magastom iti krudo ti luganmo, mangkissayka iti kuarta a naibadyet kadagiti saan unay a napateg​—kas iti pannangan iti restawran.

• Liklikam ti di kasapulan a panagutang. No posible, liklikam ti umutang. Agurnongka ketdi iti igatangmo kadagiti masapulmo. No agusarka iti credit card, bayadam ti amin nga utangmo iti kada bulan tapno awan ti interesna. No adda utangmo ngem dimo mabayadan a dagus, in-inutem a bayadan agingga a mabayadam amin.

  Sigun iti maysa a panagadal, ad-adu ti magasto dagiti tattao no credit card ti paggatangda. No ngarud adda credit card-mo, kontrolem ti panangusarmo iti dayta.

PRINSIPIO TI BIBLIA: “Saan nga agarado ti sadut iti tiempo ti lam-ek, isu nga agpalimos bayat ti panagani inton awananen.”​—Proverbio 20:4.

 TI KAIPAPANANNA: Pumobreka no sadutka isu nga aggaggagetka ken sursuruem ti nainsiriban a panangiggem iti kuarta tapno addanto ti usarem iti masanguanan.

TI MABALINMO NGA ARAMIDEN:

• Aggaggagetka. Protektaram ti pangal-alaam iti pagbiagmo babaen ti panagbalinmo a nagaget ken mapangnamnamaan iti trabahom. Magustuan dagiti amo dagiti nagaget a trabahador.

• Agbalinka a napudno. Dimo takawan ti amom. No saanka a napudno, madadael ti reputasionmo ket marigatankanton nga agbirok iti pagtrabahuam.

• Dika agagum. No masobraam ti agbirok iti kuarta, dakes ti epektona iti salun-atmo ken iti relasionmo iti sabsabali. Laglagipem a napatpateg ti biag ngem iti kuarta.

SAANMO A SAYANGEN TI ORAS KEN KUARTAM KADAGITI DAKES A BISIO.

“Ta pumanglawto ti mammartek ken ti narawet, ket ti agayat iti turog agbadonto iti rigis.”​—PROVERBIO 23:21.

DIKA UNAY AGDANAG.

“Saankayon a madanagan iti biagyo, no anianto ti kanenyo wenno inumenyo, wenno pagbadoyo.”​—MATEO 6:25.

DIKA UMAPAL.

“Magagaran a bumaknang ti naapal a tao, ngem saanna nga ammo a pumanglawto.”​—PROVERBIO 28:22.