No bagim laeng ti pampanunotem, posible nga agbalinka a manangidumduma. Ti kasta a tao ket nangato ti panangmatmatna iti bagina ken ibilangna a nababbaba dagiti tattao a naiduma kenkuana. Posible nga agbalin a kasta ti asinoman. Kuna ti Encyclopædia Britannica: “Ibilang ti kaaduan a grupo a ti wagas ti panagbiagda, makan, bado, kaugalian, patpatien, kababalin, ken dadduma pay ket nasaysayaat ngem iti dadduma a grupo.” Kasanotayo a maliklikan ti kastoy a kapanunotan?

“Agpakumbabakayo, nga ibilangyo a nangatngato ti sabsabali ngem dakayo.”​—FILIPOS 2:3.

Ania ti kaipapananna? Tapno saantayo nga agpannakkel, masapul nga agbalintayo a napakumbaba. No napakumbabatayo, mabigbigtayo nga adda paglaingan ti dadduma nga awan kadatayo. Awan ti grupo nga adda kadakuada ti amin a nasasayaat a kualidad ken abilidad.

Usigem ti kapadasan ni Stefan. Dimmakkel iti Komunista a pagilian ngem naikkatna ti panangidumduma kadagiti tattao manipud kadagiti saan a Komunista a pagilian. Kinunana:  “No ibilangtayo a nangatngato ti sabsabali, malabanantayo ti panangidumduma. Adu ti saanko nga ammo. Adda maadalko iti tunggal tao.”

Agbalinka a realistiko ken bigbigem a makaaramidka iti kamali. Aminem nga adda dagiti banag a nalalaing ti sabsabali ngem sika. Saanmo nga ipapan nga agpapada ti pagkapuyan ti amin a tao iti maysa a grupo.

Imbes a negatibo ti panunotem iti maysa a tao manipud iti maysa a grupo, isaludsodmo iti bagim:

• ‘Ti kadi ugali a saanko a kayat iti maysa a tao ket talaga a dakes, wenno naiduma laeng kaniak?’

• ‘Adda met ngata saanna a kayat kaniak?’

• ‘Ania dagiti banag a nalalaing daytoy a tao ngem siak?’

No napudno ti sungbatmo kadagitoy a saludsod, maikkatmo ti panangidumduma ken makadiskobreka pay kadagiti banag a maapresiarmo iti dayta a tao.