Saan Laeng nga Arapaap ti Sangalubongan a Talna!

NO TALIAWEN ni Alfred Nobel ti napalabas a siglo, natalged pay laeng aya ti pananginanamana a maaddanto ti sangalubongan a talna? Di pagduaduaan a maragsakan a makaammo nga adu ti sipapasnek a mangikagkagumaan a mamagpatingga iti gubat. Nupay kasta, sarangtenna met ti nakalkaldaang a kinapudno. Nagsayaat ti pananggupgop iti dayta ni Propesor Hugh Thomas: “Ti maikaduapulo a siglo​—nupay kaaduanna ket agdinamag a nangparang-ay iti kagimongan ken nangtignay iti ad-adda a pannakaseknan dagiti gobierno iti biag dagiti napanglaw​—ket nangnangruna nga agdinamag gapu iti masinggan, tangke, B-52, bomba nuklear ken, kamaudiananna, ti missile. Mailasin dayta a nakapasamakan dagiti nadawdawel ken ad-adda a makadadael a gubat ngem iti aniaman a panawen.” Kinuna pay ni Thomas a “mapagsusupiatan ngarud no talaga a mabalin nga ibilang dayta a narang-ay a panawen wenno saan.”

Dakdakkel aya dagiti pangnamnamaan a maadda ita ti sangalubongan a talna ta simrektayon iti maika-21 a siglo? Nikaanoman! Kuna ti magasin a Newsweek iti saan a direkta a panangdakamatna iti pannakaraut ti New York City ken Washington, D.C., idi Setiembre 11, 2001: “Iti lubong a dagiti komersial nga eroplano a 767 ket mabalinen nga usaren kas maigiya a missile, awanen ti kasla panglapped iti dayta.”

Kuna ti dadduma a tapno pumayso ti sangalubongan a talna, masapul a maaramid ti dua a banag: Umuna, masapul a balbaliwan dagiti tattao ti panangmatmat ken kababalinda; ken maikadua, masapul nga agkaykaysa ti amin a nasion nga agpaituray iti maymaysa a gobierno. Impadto ti Biblia nga addanto panawen a maadda ti talna​—ngem saan a babaen kadagiti panagregget ti sangatauan. Kuna ti Salmo 46:9 maipapan ti Namarsua a ni Jehova a Dios: “Pagsardengenna dagiti gubat agingga iti ungto ti daga.” Kasano nga ibanag ti Dios daytoy? Babaen ti Pagarianna, a maulit-ulit nga ikarkararag ti adu a napasnek a tattao. Dayta a Pagarian ket saan a ti narigat a maawatan a kasasaad ti puso, no di ket maysa a pudno a gobierno. Babaen iti dayta, ipasdek ti Dios ti talna iti intero a daga. Impadto ti napaltiingan a mammadto a ni Isaias a dagiti iturayan dayta a gobierno “saandanto met a sursuruenen ti pannakigubat.” (Isaias 2:4) Babaen ti sangalubongan a programa a panangisuro, masursuronto dagiti tattao ti agbiag a sitatalna ket iti kasta “pitpitendanto dagiti kampilanda a pagbalinen a subsob ti arado ken dagiti pikada a pagbalinen a pangarbas a getgetteng.”

Uray pay ita ket ar-aramidenen dagiti Saksi ni Jehova dayta. Dida kayat ti agusar kadagiti armas a pangpatay kadagiti padada a tattao, nupay naggapuda iti nadumaduma nga etniko a grupo ken agnanaedda iti nasurok a 200 nga agsasabali a pagilian. Agdinamag ti neutral a takderda iti tengnga ti dinadael ti gubat a lubong, daytat’ mangpaneknek a saan laeng a maysa nga arapaap ti talna no di ket talaga a pumaysonto.

Kayatmo kadi a maammuan ti ad-adu pay maipapan iti daytoy a pudno a namnama a naibasar iti Biblia? Pangngaasim ta agsuratka kadagiti nangipablaak iti daytoy a magasin. Usarem ti address a nailista iti panid 5 a kaasitgan kenka, wenno makiumanka kadagiti Saksi ni Jehova iti lugarmo.