Ti “Kasang-atan a Kalsada”?

◼ Ania ti naisangsangayan iti Baldwin Street, nga adda idiay Dunedin, New Zealand? Nabayagen nga imbaga ti Dunedin a daytoy a kalsada ti kasang-atan a kalsada iti lubong. Nupay addan dagiti nangkuestion iti daytoy, adda banag a sigurado: Nagpaiduma ti kinasangat ti Baldwin Street.

Daytoy nalatak a kalsada ket nagbalin a nalatak a pagpasiaran dagiti turista manipud iti intero a lubong. Saan a kasapulan nga agbalinka nga umuuli iti bantay tapno modanonmo ti tapawna. Masang-atmo daytoy 359 a metro a kalsada babaen ti pannagnam, ngem saan a maiparparegta kadagiti motorista nga agluganda a sumang-at iti dayta.

Kaduaendakami a Sumang-at

Naariwanas ti aldaw idi tallokami a nagkakadua a nangsirpat iti intero a sang-atenmi. Idi sumangsang-atkamin, umanangsabkami a nakadarumog tapno agtalinaedkami a natimbeng. “Kaslatay la umul-uli iti sementado a pader,” umanangsab a kinuna ti maysa. Apag-isu a nakakitakami iti pagtugawan isu a naginanakami.

Intultuloymi ti simmang-at ket di nagbayag, addakamin iti tapaw nga umanangsab a mangbuybuya iti namarangmang nga aglawlaw. Adda iti babami ti naurnos ti pannakaintarda a balbalay ken hardin. Iti nagtugmokan ti langit ken daga, nakaberberde dagiti balang a babassit a kayo a naipataraigid kadagiti nalasbang a pasto​—a naibaskag iti asul a langit.

Saan a lumba ti isasang-atmi agingga iti tapaw. Idi nakasalogkamin, nagsardengkami a nangretrato iti sinang-atmi tapno maalami ti ited ti siudad a Sertipiko ti Nagapuanan. Naisurat iti dayta a simmang-atkami iti “Kasang-atan a Kalsada iti Lubong.”​—Naipatulod.