“Mangsalbar Daytoy a Video!”

IDI 1999, nagaramid dagiti Saksi ni Jehova iti video a nangnangruna nga agpaay kadagiti agtutubo. Napauluan dayta iti Young People Ask​—How Can I Make Real Friends? Iti agdama, nairuar daytan iti nasurok a 30 a pagsasao. Kastoy ti insurat ti maysa a manangaywan iti kongregasion idiay Ukraine: “Daytoy a video dakkel ti naitulongnan kadakami amin! Dadduma ti naminlima a nangbuyan iti dayta, dadduma met ti uray la namimpiton a nangbuya iti dayta! Idi agangay, siraragsak a nagsasaritaan ti adu nga agtutubo dagiti kangrunaan a pasetna. Nakasangit ti adu kadakuada. Nariknami amin ti ayat ken napasnek a pannakaseknan ni Jehova kadagiti agtutubo. Lallalo a maawatak itan ti kasapulan dagiti agtutubo, isu nga ad-adda a kayatko idan a tulongan tapno agbalinak a nasingsinged a gayyemda.”

Natukay unay dagiti agtutubo iti intero a lubong iti daytoy a video. Kas pagarigan, kastoy ti insurat ti agtawen iti 17 a ni Leticia a taga-Uruguay (makinkannigid a retrato): “Naragsakanak unay saan laeng a gapu iti nailawlawag no di ket gapu ta nakitak ti pannakaseknan ni Jehova ken ti organisasionna kadakami nga agtutubo. Kasta unay ti panagyamanko gapu iti daytoy nagpateg a video. Iti ababa a pannao, agyamanak unay!”

Maysa a nataengan a Saksi idiay Estados Unidos ti namin-adu a nangbuya iti video isu a nausarna dayta a tumulong iti balasitang a doble-kara ti panagbiagna. Kastoy ti insuratna: “Mangnginum, dakes dagiti kabarkadana, ken agdrogdroga idi ni Annette. * Ngem dakkel ti naitulong ti video kenkuana. Di nagbayag, insardengnan dagiti dakes nga aramidna ken ti pannakikaduana kadagiti kabarkadana. Innem a bulan kalpasanna, nabautisaran. Talaga a mangsalbar daytoy a video!”

▪ Idi 2004, nangiruar dagiti Saksi ni Jehova iti sabali pay a video agpaay kadagiti agtutubo. Napauluan dayta iti Young People Ask​—What Will I Do With My Life? Sapay koma ta babaen daytoy a video nga adda iti DVD, adu nga agtutubo ti maparegta a mangyun-una iti panagdayaw ken Jehova a Dios iti biagda.​—Mateo 6:33.

[Footnote]