Manipud Kadagiti Agbasbasa

Gagayyem Sipud idi natay ni nanangko dandani uppat a tawen ti napalabasen, naaddaanak kadagiti nakaim-imbag a gagayyem a patpatgek ken nasinged kaniak. Pinagpanunotnak ti serye a “No Kasano ti Maaddaan iti Pudno a Gagayyem” (Disiembre 8, 2004) a nakaragragsakak gayam gapu iti kaaddada kas gagayyemko!

O. B., Estados Unidos

Agtawenak iti 11, ket no dadduma, marigatanak a makigayyem. Kalpasan a nabasak daytoy a serye, simmayaaten ti kasasaad. Intedko dayta a magasin iti kaklasek a masansan nga adda dakes a masaona iti sabsabali. Sipud idi nabasana dagiti artikulo, ikagkagumaannan a di ar-aramiden dayta.

J. K., Poland

Gapu iti panagbasak kadagitoy nga artikulo, napasingkedan a rumbeng nga agbalinak a gayyem no kayatko ti makigayyem​—kaipapananna a rumbeng a sidadaanak a tumulong iti sabsabali, sigun iti pammaregta a mabasa iti Aramid 20:35. Nagsayaat ti imbalakadyo.

A. K., Poland

Kanayon idi a marigatanak a makigayyem, uray iti kongregasion Kristiano. Naawatakon a rumbeng nga agbalinak a napudno ken siak nga umuna ti makigayyem ken saanak nga agbalin a perpeksionista. Talaga a mangipapaay ni Jehova kadagiti sungbat iti umiso a tiempo!

L. Z., Russia

Gapu iti adu a sakitko, marigatanak a makigayyem. Inkeddengko nga iyaplikar ti impormasion iti daytoy a serye. Natulongannak ti balakad nga agbalinak a napudno ken in-inut nga ipudnok ti pudno a kapanunotak ken riknak.

N. M., Japan

Inranudko kadagiti kaeskuelaak daytoy a serye bayat ti pangngaldaw. Gapu iti daytoy a magasin, maam-ammuandan ti Sao ti Dios. Pangngaasiyo ta itultuloyyo ti mangipablaak kadagiti artikulo a mangipaganetget iti praktikal a kinapateg ti Biblia agpaay iti amin a tattao.

M. N., Japan

Nagagaranak a nangbasa iti sungbat ti saludsod iti kahon a “Mabalin Aya nga ‘Aggayyem Laeng’ Dagiti Lallaki ken Babbai?” Dayta pay laeng ti nakaipaay kaniak iti simple ken nalawag a sungbat a saan a naipaay ti sabali a magasin wenno libro.

R. K., Alemania

Kanayon a dakkel ti maitultulong dagiti artikuloyo. Pabpabilgendakami iti kalatmi nga agaramid iti ad-adu agpaay ken Jehova ken makigayyem kenkuana. Agyamankami unay iti pammaregtayo!

R.V.H., Alemania

Daytoy a serye ti eksakto a kasapulak. Agtawenak iti 15, ket marigatanak a makigayyem. Ti imbalakadyo ket makatulong kaniak iti pannakigayyem ken panangtaginayon iti dayta. Agasenyo, dimteng dayta a serye kalpasan nga inkararagko a mabalakadanak koma no kasano ti napudno a pannakisaritak iti sabsabali!

B. E., Francia

Nakalkaldaang ta dadduma a gagayyemko ti nabiit pay a nangsair kaniak, isu nga agsagsagabaak iti nakaro tangay panagriknak ket agmaymaysaak. Naparegtaak idi naammuak a saannatayo a baybay-an ni Jehova. Nagsayaat a basaen ken iyaplikar ti praktikal a balakad no kasano ti maaddaan iti pudno a gagayyem.

C. C., Italia

Kayatko a rumang-ay ti espiritualidad ti balasangko. Impaganetget daytoy a magasin a mabalinmo ti makigayyem kadagiti tattao aniaman ti edadda. Ammok a makatulong kenkuana daytoy a serye tangay tinulongannak.

A. L., Estados Unidos

Ammok itan a rumbeng a maseknanak iti sabsabali ken balbaliwak ti kinataok tapno agbalinak a pudno a gayyem. Siguradok a tulongannak ni Jehova.

M. Y., Canada