Makagunggona ti Kinamapagpiaran

“Ti tinapay a nagun-odan babaen iti kinaulbod makaparagsak iti maysa a tao, ngem kalpasanna ti ngiwatna mapnonto iti graba.” ​—Proverbio 20:17.

KASAPULAN kadi ti panagkusit tapno agballigi iti negosio? Saan. Kinapudnona, dagiti nakusit ti masansan a malugi. Apay? Gapu ta ad-adu ti magunggona dagiti mapagpiaran. No mapagpiaran ti maysa, sigurado nga adu ti agtalek kenkuana ken napateg dayta iti agpaut a balligi.

Ti Pateg ti Panagtalek

Ti reputasionmo kas mapagpiaran apektaranna ti panagballigim​—madmadlawmo man dayta wenno saan. Paneknekan dayta ti kapadasan ni Franz a nadakamat iti panid 4. “Idi nabiitak pay iti trabahok, diak nadlaw a namin-adu gayam a sinubok dagiti amok no talaga a mapiardak ken napudnoak kadakuada. Idi naammuak dayta, nakapasaak gayamen isu nga ad-adun a responsabilidad ken wayawaya ti intalekda kaniak ken ginunggonaandak pay. Ammok nga adda dagiti mas kualipikado ken nalalaing ngem siak. Ngem panagkunak, natalged ti trabahok gapu ta pagtalkandak dagiti amok.”

Liklikam Dagiti Mapagduaduaan a Transaksion

Napaliiw ti negosiante a ni David a nadakamat iti panid 5: “Idi nakitak a balballikugen ti dadduma dagiti pagannurotan tapno laeng makakurakotda, napanunotko, ‘No ania ti imulmulada, isunto met la ti apitenda.’ Iti sabali a pannao, sigurado nga adunto a problema ti ibunga ti kinakusit. Dimi pinatgan ti adu a kuestionable a transaksion. Adu kadagiti kompania a nakiraman kadagita ket awanen, sa naidarum ti dadduma nga indibidual. Naliklikan ti kompaniami dagita a problema.”

Idi mangrugrugi pay laeng ni Ken iti negosiona a panagtaraken kadagiti baka idiay makin-abagatan a daya nga Africa, adu a gundaway a mabalinna koma a pasuksokan dagiti opisial tapno pumartak ti panagimportna ken maliklikanna ti agbayad iti buis. Kunana: “Adu a rantsero ti timmulok iti kasta a gagangay nga aramid. Gapu ta dimi kayat ti agkusit, immabut iti 10 a tawen sakbay a simmayaat ti taray ti negosiomi. Adda kadi nagimbaganna? Adda! Dagidiay nagpasuksok ket kanayon a gatgatasan dagiti korap nga opisial nga agdawdawat iti kanayonan a pasuksok.”

Panangsango Kadagiti Problema iti Ekonomia

No agngangabit a malugi ti maysa a negosio, napigsa ti pannakapilit nga agkusit. Ngem kadagita met a kasasaad nga agminar ti kinapateg ti kinamapagpiaran.

Usigem ti kapadasan ni Bill. Nalugi ti negosiona iti konstruksion idi kimmapuy ti industria ti panagbangon kadagiti balay idiay Estados Unidos. Kinunana: “Nabangkrap ti adu kadagiti napigsa a kostumermi ket ginasut a ribu a doliar ti utangda kadakami. Idi kasla awanen ti namnama, kinasaritak ti maysa a kakompetensia a kompania no mabalinda nga alaen ti siasinoman kadakami kas empleadoda. Kalpasan ti dua nga aldaw, imbagada nga alaendak ken ti kaaduan nga empleadok. Agdindinamag  kano ngamin a mapagpiaranak ken nasayaat ti serbisiok.”

Amin a nangisalaysay kadagiti nadakamat a kapadasan ket Saksi ni Jehova. Kas iti amin nga aspeto ti biagda, naibasar iti Biblia dagiti prinsipioda iti negosio. Nalawag ngarud a makitam nga imbes a nakalugianda, adu ti nagunggonada gapu iti kinamapagpiaranda.

Kaskasdi, addanto latta dagiti kasasaad a kasla nasaysayaat ti agkusit. Ngem kuarta la kadi ti kakaisuna a pangrukodan iti balligi?

[Blurb iti panid 6]

Ti reputasionmo kas mapagpiaran apektaranna ti panagballigim​—madmadlawmo man dayta wenno saan

[Ladawan iti panid 7]

“Agdindinamag kano ngamin a mapagpiaranak ken nasayaat ti serbisiok.”​—Bill, Estados Unidos