No Kasla Dimo Kayaten ti Agbiag

KADA tawen idiay Estados Unidos, pinullo a ribu ti agganggandat a mangkettel iti biagda. Ibaga ti Biblia ti kangrunaan a rason no apay nga adu ti naawananen iti namnama. Ilawlawagna kadatayo nga agbibiagtayon kadagiti “napeggad a tiempo a narigat a pakilangenan.” Dagiti kumarkaro a parikut iti biag nagdakkel ti epektoda kadagiti tattao. (2 Timoteo 3:1; Eclesiastes 7:7) No din madaeran ti maysa a tao ti adu a pakaringgoran iti biag, mabalin a panunotennan ti agpakamatay tapno agpatinggan ti marikriknana a saem. Ania ti mabalinmo nga aramiden no sumken dagiti kasta a kapanunotan?

Saanka nga Agmaymaysa!

No panagkunam ket kasla awanen namnama ti situasionmo, laglagipem a saanka nga agmaymaysa. Nakalkaldaang ta dandani amin ket addaan  iti problema nga ib-ibturan. Kuna ti Biblia: “Ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa.” (Roma 8:22) Nupay iti agdama ket kasla awan a pulos ti solusion ti problemam, masansan a sumayaat dagiti kasasaad iti panaglabas ti panawen. Kabayatanna, ania ti makatulong kenka?

Ipeksam ti riknam iti maysa a nataengan ken mapagtalkan a gayyem. Sigun iti Biblia: “Ti pudno a kadua agayat iti isuamin a tiempo, ken ti kabsat a mayanak no adda rigat.” (Proverbio 17:17) Ti nalinteg a tao a ni Job a nadakamat iti Biblia ket nakisarita iti sabsabali bayat ti panagsagabana. Idi nariknana a ‘nauman nga agbibiag,’ kinunana: “Ti sakit ti nakemko denggenyo ta ibagak.” (Job 10:1, Ti Baro a Naimbag a Damag Biblia) Ti pannakisaritam maep-epna ti saem a marikriknam, ket mabalin a dayta ti mangbalbaliw iti panangmatmatmo kadagiti problemam. *

Ikararagmo iti Dios ti linaon ti pusom. Para iti dadduma, ti kararag ket pangpakalma laeng iti isip, ngem saan a kasta ti kuna ti Biblia. Iti Salmo 65:2, naawagan ni Jehova a Dios kas “Managdengngeg iti kararag,” ken kuna ti 1 Pedro 5:7: “Isu maseknan kadakayo.” Maulit-ulit nga ipaganetget ti Biblia ti kinapateg ti panagpannuray iti Dios. Kas pagarigan:

“Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”​—PROVERBIO 3:5, 6.

“Ti tarigagay dagidiay agbuteng [ken Jehova] aramidennanto, ken ti panagpatulongda denggennanto, ket isalakannanto ida.” ​—SALMO 145:19.

“Daytoy ti adda kadatayo a panagtalek kenkuana, nga, uray ania ti dawatentayo maitunos iti pagayatanna, denggennatayo.”​—1 JUAN 5:14.

“Adayo ni Jehova kadagidiay nadangkes, ngem ti kararag dagidiay nalinteg denggenna.”​—PROVERBIO 15:29.

 No ipeksam iti Dios dagiti mapaspasaram a problema, tulongannaka. Isut’ gapuna a parparegtaennaka ti Biblia nga ‘agtalek kenkuana iti amin a tiempo. Iti sanguananna iparukpokmo ti pusom.’​—Salmo 62:8.

No Ad-adu Pay ti Kasapulan

Sigun kadagiti panagadal, agsagsagaba iti depresion ti kaaduan nga agpakpakamatay. * Ipaganetget dayta a mabalin a kasapulan ti panagkonsulta iti doktor a posible a mangireseta iti agas wenno mangirekomenda iti dieta a masapul a suroten. Iti dadduma a kasasaad, makatulong pay ti panangiraman iti panagehersisio. Adu ti nagunggonaan gapu iti panagpadoktorda. *

Naglaon ti Biblia iti adu nga impormasion a makatulong ken mangyeg kenka iti namnama. Kas pagarigan, iti Apocalipsis 21:4, kuna ti Biblia maipapan ken Jehova a Dios: “Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Kari daytoy ti Dios, ket makapabang-ar ti panangpampanunot iti dayta.

Daytoy naibasar-Biblia a namnama ket iranranud dagiti Saksi ni Jehova iti minilion a tattao iti intero a lubong. Gapu iti dayta, adu ti naaddaan iti pudno a namnama kadagitoy nariribuk a tiempo. Tapno ad-adu pay ti maammuam, kontakem dagiti kalugaram a Saksi ni Jehova. Mabalinmo met ti mapan iti Kingdom Hall-da wenno agsurat iti maitutop nga adres iti panid 5 daytoy a magasin. Mabalinmo pay a kitaen ti Web site-mi a www.watchtower.org.

[Footnotes]

[Kahon iti panid 16]

TULONG MANIPUD ITI BIBLIA

● “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.”​—Filipos 4:6, 7.

● “Nagimtuodak ken Jehova, ket sinungbatannak, ket kadagiti amin nga aliawko inispalnak.”​—Salmo 34:4.

● “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”​—Salmo 34:18.

● “Paimbagenna dagidiay nasnaayan ti pusona, ket bedbedanna dagiti naut-ot a pasetda.”​—Salmo 147:3.

[Kahon iti panid 17, 18]

NO MAPAMPANUNOTMO TI AGPAKAMATAY . . .

Ipeksam ti riknam iti mapagtalkan a gayyem

Ikararagmo iti Dios ti linaon ti pusom

Agkonsultaka iti doktor

[Kahon/Ladawan iti panid 18]

KADAGITI GAYYEM KEN KAPAMILIA

Masansan a dagiti kapamilia ken nasinged a gagayyem ti umuna a makadlaw no agpampanunot nga agpakamatay ti maysa a malmalday. Masalbarmo ti biagna no agtignayka a dagus! Dumngegka a naimbag ken makipagriknaka. Bigbigem a pudno ti mapaspasaranna a rigat. Kuna ti Biblia: “Agsaokayo iti makaliwliwa kadagiti malmaldaangan a kararua.” (1 Tesalonica 5:14) Paregtaem nga agpatulong, ket no kasapulan, siguraduem a maaw-awatna ti kasta a tulong.