Apay a nagustuam ti agsirarak maipapan iti siensia?

Idi addaak iti unibersidad, inadalko ti chemistry. Nagsiddaawak a nangnangruna kadagiti protina ken nucleic acids, a kakokomplikaduan a molekula ditoy daga. Idi agangay, naginteresak iti reaksion ti dadduma a molekula iti silnag ti init.

Mamatika kadi idi iti Dios?

Wen idi ubingak pay. Ngem idi ages-eskuelaakon iti Catholic University of Leuven, naisuro kaniak a dagiti sibibiag a banag ket naaddaan kadagiti disenio gapu kadagiti natural a proseso. Pinagbalin dagiti propesor a komplikado unay ti dadduma kadagita a proseso. Gapu ta sientistada nga aduanen iti kapadasan, namatiak kadakuada. Idi agangay, marigatanakon a mamati nga adda Dios.

Apay a nagbaliw ti panunotmo maipapan iti nagtaudan ti biag?

Idi 1999, nagkitakami iti maysa a gayyemko idi ages-eskuelaak pay. Maysa isunan kadagiti Saksi ni Jehova ket timmabunoak iti maysa kadagiti gimongda. Agarup iti dayta met la a tawen, maysa kadagiti Saksi ni Jehova ti immay iti balaymi ken nangibati iti libro nga Is There a Creator Who Cares About You? *

Ania ti makunam iti libro?

Bilibak iti kalidad ti panagsirarak a naaramid iti dayta a libro. Pinagpanunotnak no talaga met laeng a ti ebolusion ti makagapu iti kaadda dagiti disenio iti nakaparsuaan.

Ania dagiti pagsidsiddaawam a disenio iti nakaparsuaan?

Karaman iti trabahok kas maysa a biochemist ti panangadal iti disenio ti dadduma a molekula a masarakan kadagiti cyanobacteria nga agnanaed iti taaw.  Dagita ket bassiusit nga organismo a saan nga agpannuray iti dadduma a sibibiag a banag para iti taraonda. Pagarupen ti dadduma a managsirarak a dagita nga organismo ti kaunaan a sibibiag a bambanag ditoy daga. Iti panagusar dagitoy a mikrobio iti enerhia manipud iti lawag ti init, ar-aramatenda ti komplikado unay a kemikal a proseso, a saan pay a naan-anay a maawatan, tapno ti danum ken carbon dioxide ket mapagbalinda a taraon. Nasdaawak met iti nagpaiduma a kinalaing dagiti cyanobacteria a mangagsep iti lawag.

Dagiti bulong ket us-usarenda met ti init tapno agaramid iti taraon. Ania ngarud ti nakaskasdaaw kadagita a bakteria?

Bayat nga umun-uneg ti madanonmo iti baybay, bumasbassit ti makitam a lawag. Masapul ngarud nga agsepen dagiti cyanobacteria nga agnanaed sadiay ti amin a makadanon kadakuada nga enerhia ti lawag. Ar-aramidenda dayta babaen kadagiti sopistikado unay nga antenada. Ti naurnong nga enerhia ket dandani siento porsiento a siaannayas a mayallatiw kadagiti benneg a pakaaramidan iti taraon. Ti disenio daytoy a mangagsep-lawag a makinaria ket naginteresan metten dagiti agar-aramid kadagiti solar panel. Siempre, dagiti napataud a solar panel ket di pulos makaartap iti kinaannayas ti sistema dagita a bakteria.

Ania ti naamirismo gapu iti dayta?

Napanunotko dagiti inheniero a mangikagkagumaan a mangtulad kadagiti nakaskasdaaw a mekanismo dagiti sibibiag a banag ket naamirisko a Dios la ketdi ti nangdisenio iti biag. Ngem ti pammatik ket saan laeng a naibasar iti naadalko iti siensia no di ket iti naannad a panagadalko iti Biblia.

Ania ti nakakombinsiram a ti Biblia ket nagtaud iti Dios?

Ti maysa kadagiti adu a nakakombinsirak ket ti detalyado a pannakatungpal dagiti padto ti Biblia. Kas pagarigan, ginasut a tawen a nasaksakbay, dineskribir ni Isaias ti adu a detalye maipapan iti ipapatay ken pannakaitabon ni Jesus. Ammotayo a naisurat dayta a padto sakbay ti ipapatay ni Jesus agsipud ta ti Lukot ni Isaias, a nasarakan idiay Qumran, ket nakopia agarup 100 a tawen sakbay a nayanak ni Jesus.

Kuna ti padto: “Aramidennanto ti lugar a pagitabonanna a kaduana a mismo dagidiay nadangkes, ken kadua ti klase nabaknang iti ipapatayna.” (Isaias 53:9, 12) Makapainteres ta napapatay ni Jesus a kadua dagiti kriminal ngem naitabon iti tanem ti maysa a nabaknang a pamilia. Maysa la dayta a pagarigan iti adu a natungpal a padto a nakakombinsirak a ti Biblia ket impaisurat ti Dios. (2 Timoteo 3:16) Idi agangay, nagbalinak a maysa kadagiti Saksi ni Jehova.

Apay a naragsakka iti panagbalinmo a maysa kadagiti Saksi ni Jehova?

Dagiti met prinsipio a sursurotenmi ket naan-anay a naibasar iti Biblia. Kas maysa kadagiti Saksi ni Jehova, maragragsakanak a mangiranud kadagiti makaliwliwa a mensahe ti Biblia ken tumulong kadagiti tattao a mangammo kadagiti sungbat dagiti saludsodda.