Ti panagpakamatay ket naawagan kas “permanente a solusion iti temporario a problema.” Nupay kasla imposible, ti maysa a nakalkaldaang a kasasaad—uray kasla awanen ti maaramidam—ket mabalin a temporario laeng. Kinapudnona, mabalin a sumayaat dayta a dimo ninamnama.—Kitaem ti kahon a  “Nagbalbaliw Dagiti Kasasaadda.”

No saan man a mapasamak dayta, nasaysayaat no sanguem dagiti problemam a rumsua iti kada aldaw. “Dikay pulos maringgoran maipapan iti sumaganad nga aldaw,” kinuna ni Jesus, “ta ti sumaganad nga aldaw addaanto kadagiti bukodna a pakaringgoran. Umdasen iti tunggal aldaw ti bukodna a kinadakes.”—Mateo 6:34.

Ngem kasanon no saanen nga agbalbaliw ti kasasaadmo? Kas pagarigan, kasanon no malmaldayka unay ta din maagasan ti sakitmo, wenno nagsinakayo iti asawam, wenno natay ti maysa a patpatgem?

Uray kadagita a kasasaad, adda kabaelam a balbaliwan: ti panangmatmatmo iti dayta a situasion. No sursuruem nga akseptaren ti dimon mabalbaliwan, dakdakkel ti posibilidad nga agbalin a mas positibo ti panangmatmatmo kadagiti bambanag. (Proverbio 15:15) Mas posible met nga agbirokka kadagiti pamay-an tapno madaeram ti situasion imbes a basta gibusam lattan ti biagmo. Ti resultana? In-inut a makontrolmo ti maysa a situasion a pagarupem a dimo makontrol.—Job 2:10.

LAGLAGIPEM DAYTOY: Dimo mauli ti maysa a bantay iti maysa la nga addang, ngem mabalin nga in-inut a maulim dayta iti mamin-adu nga addang. Kasta met laeng iti kaaduan a problema a pakaipasanguam, uray no kasla bantay ti kadakkelda.

TI MABALINMON NGA ARAMIDEN: Makisaritaka—nalabit iti maysa a gayyem wenno kapamilia—maipapan iti kasasaadmo. Mabalin a matulongannaka a maaddaan iti mas balanse a panangmatmat.—Proverbio 11:14.