SAAN A LIBRO MAIPAPAN ITI SIENSIA TI BIBLIA, NGEM ADDAAN KADAGITI MODERNO NGA IMPORMASION. DAGITOY TI SUMAGMAMANO.

Adda kadi nangrugian ti pisikal nga uniberso?

Awan, kuna idi dagiti prominente a sientista. Ngem ita, awatenen ti kaaduan nga adda nangrugian ti uniberso. Nalawag idin a kasta ti ibagbaga ti Biblia.—Genesis 1:1.

Ania ti sukog ti daga?

Idi un-unana, adu ti mangipagarup a patag ti daga. Idi 400’s B.C.E., imbaga dagiti Griego a sientista a nagtimbukel ti daga. Ngem mabayag pay sakbay dayta—idi 700’s B.C.E.—tinukoyen ti mannurat iti Biblia a ni Isaias a “sirkulo ti daga,” a mabalin a maipatarus met kas nagtimbukel.—Isaias 40:22.

Agrakaya kadi ti nabituen a langlangit?

Insuro idi ti Griego a sientista a ni Aristotle, a nagbiag idi 300’s B.C.E., a ditoy laeng daga nga adda panagrakaya, idinto ta saan a pulos nga agbaliw wenno agrakaya ti nabituen a langlangit. Ginasut a tawen a kasta ti patpatien ti adu. Ngem idi 1800’s, nabukel ti ideya nga entropy. Ipakita dayta a posible nga in-inut a madadael ti amin a banag, idiay man langit wenno ditoy daga. Ni Lord Kelvin, maysa kadagiti sientista a nangidur-as iti dayta nga ideya, binigbigna ti kuna ti Biblia maipapan iti langit ken daga: “Kas iti maysa a kawes isuda amin marunotdanto.” (Salmo 102:25, 26) Ngem patien idi ni Kelvin ti isursuro ti Biblia a mabalin a lapdan ti Dios ti kasta a panagrakaya dagiti parsuana.—Eclesiastes 1:4.

Ania ti mangtengtengngel kadagiti planeta kas iti daga?

Insuro ni Aristotle nga amin a bambanag iti law-ang naikabilda iti uneg ti agsusukot a nagtimbukel ken simmarming a banag, ket ti daga ti makin-uneg iti amin. Idi 1700’s C.E., akseptarenen dagiti sientista a posible nga awan nakaibitinan dagiti bituen ken planeta. Ngem iti libro a Job, a naisurat idi 1400’s B.C.E., mabasatayo a ti Namarsua ‘imbitinna ti daga iti awan.’—Job 26:7.

SAAN A LIBRO TI MEDISINA TI BIBLIA, NGEM ADDAAN KADAGITI MODERNO A PRINSIPIO ITI SALUN-AT.

  Panangisina iti masakit.

Imbilin ti Mosaiko a Linteg—dagiti linteg nga inted idi ti Dios iti Israel—a maisina dagiti agkukutel. Idi laeng timmaud dagiti epidemia idi 1300’s ken 1400’s C.E., a nasursuro dagiti doktor daytoy a prinsipio, a maibilang nga epektibo agingga ita.—Levitico, kapitulo 13 ken 14.

Panagbuggo kalpasan ti panagiggem iti bangkay.

Agingga iti maudi a paset ti 1800’s, gagangay idi kadagiti doktor a saanda nga agbuggo no asikasuenda dagiti pasienteda uray kalkalpas a nagiggemda iti bangkay. Adu ti natay gapu iti dayta. Ngem iti Mosaiko a Linteg, maibilang a narugit dagiti nagiggem iti bangkay. Naibilin pay ti panagbuggo iti danum tapno maibilangda a nadalus. Sigurado nga adda met nagsayaatan dagita a kaugalian iti salun-atda.—Numeros 19:11, 19.

Panangibelleng iti rugit ti tao.

Tinawen a 500,000 nga ubbing ti matmatay iti diarrhea. Ti saan a nasayaat a pannakaibelleng ti rugit ti tao ti kangrunaan a makagapu. Ibaga ti Mosaiko a Linteg a masapul a maikali dagiti rugit ti tao, ken adayo dayta iti pagnanaedan ti tao.—Deuteronomio 23:13.

Tiempo ti pannakakugit.

Kiddawen idi ti Linteg ti Dios a makugit ti ubing a lalaki iti maikawalo nga aldawna. (Levitico 12:3) Kadagiti kayyanak, naammuan nga agbalin laeng a normal ti panagbalay ti darada kalpasan ti umuna a lawas. Idi panawen ti Biblia, sakbay ti moderno a panangagas, proteksion ti panaguray iti nasurok a makalawas sakbay ti pannakakugit.

Adda koneksion ti emosion iti pisikal a salun-at.

Ibaga dagiti sientista ken researcher iti medisina a pagimbagan ti salun-attayo dagiti positibo a kababalin, kas iti kinaragsak, namnama, panagyaman, ken sidadaan a panangpakawan. Kuna ti Biblia: “Ti puso a narag-o nasayaat a pangagas, ngem ti espiritu a nadanar magmaganna dagiti tulang.”—Proverbio 17:22.