Dumaranudor ti danapeg dagiti sakada! Nabiag ti pannakailadawan ti uppat a nabileg a kabalio ken dagiti nakasakay nga uray la kasla lumagtoda iti panid ti Biblia! Puraw ti umuna a kabalio ket nadayag ken baro nga ari ti nakasakay. Adda iti likudanna ti kabalio a kasla apuy ti kolorna ket ti nakasakay daddadaelenna ti talna iti intero a daga. Sumarsaruno ti maikatlo, a kangisngisit ti tengnga ti rabii. Ti nakasakay ket nakaiggem iti paris a timbangan bayat a maipakpakaammo ti makapaladingit a mensahe maipapan iti kinakurang dagiti kangrunaan a taraon. Napusiaw ti kolor ti maikapat, kas seniales ti sakit ken dadduma pay a makapapatay a pangta. Nakasakay iti dayta ni Patay. Adda laeng iti likudanna ti Tanem, a mangal-alun-on iti adu a biag!—Apocalipsis 6:1-8.

“Idi damok a mabasa ti maipapan iti uppat a kumakabalio, napabutnganak. Panagriknak idi, um-umayen ti Aldaw ti Panangukom. Gapu ta saanak a nakasagana, baka saanak a makalasat.”—Crystal.

“Nasdaawak iti uppat a nadumaduma a nakasakay iti agduduma ti kolorna a kabalio. Idi naawatakon ti kaipapanan dayta a sirmata, naawatak metten no apay a kasdiay ti pannakailadawanda.”—Ed.

Kas kadi ken Crystal ti mariknam iti uppat a kumakabalio iti Apocalipsis? Wenno kas ken Ed? Aniaman kadagita, ti nakaskasdaaw a panagpataray dagidiay a kumakabalio ti mangbukel iti maysa a pagaammo nga eksena iti Apocalipsis, ti maudi a libro ti Biblia. Ammom kadi a pagimbagam no maawatam ti kayat a sawen dayta a sirmata? Kasano? Ikarkari ti Dios a maaddaanka iti pudpudno a kinaragsak no basaem, adalem, ken agbiagka sigun iti naisurat iti dayta a napnuan padto a libro.—Apocalipsis 1:1-3.

Adu ti mabuteng iti sirmata maipapan iti uppat a kumakabalio. Ngem saan a nairanta dayta a mangbutbuteng kenka. Ti agpayso, minilion ti napatibker ti pammatina gapu iti dayta ken nangted pay kadakuada iti namnama a naraniag a masakbayan. Mabalin met a kasta ti epektona kenka! Pangngaasim ta ituloymo ti agbasa.