Adda dagiti mangpampanunot no nabaliwan ti naisurat a Sao ti Dios. Imbaga ni propeta Isaias nga ‘agtalinaed iti agnanayon ti sao ti Dios.’ (Isaias 40:8) Kasanotayo a masigurado a saan a nabaliwan dagiti naisurat a kari ti Dios?

Adda pannakabalin ti Dios a mangpreserba ken mangprotektar iti Saona tapno saan a mabaliwan. Idi un-unana, no mangaramid iti kopia ti Sao ti Dios dagiti parakopia, siaannad a bilangenda ti tunggal letra tapno masiguradoda nga awan ti mainayon, masukatan, wenno maikkat. Ngem imperpektoda isu nga adda latta babassit a kamalida.

Rinibu ti kopia ti nagkauna a manuskrito ti Nasantuan a Kasuratan. No adda kamali ti maysa a kopia, maikompara dayta kadagiti dadduma a kopia tapno makita no ania ti umiso.​—Tapno maammuam ti ad-adu pay, kitaem ti artikulo a “Nabalbaliwan Wenno Nasuktan Kadi ti Linaon ti Biblia?” iti jw.org/ilo.

Kas pagarigan, usigem ti nagkauna a dokumento a maawagan iti Dead Sea Scroll a nadiskobre dagiti bedouin kadagiti kueba nga asideg iti Dead Sea idi 1947. Dagitoy a nagkauna a sursurat ket naglaon kadagiti paset ti Nasantuan a Kasuratan a nasurok a dua ribu a tawenen sipud idi naisurat. Inkompara dagiti eksperto dagitoy a nagkauna a manuskrito iti Nasantuan a Kasuratan nga us-usarentayo ita. Ania ti napaneknekanda?

Babaen ti naannad a panangadal kadagiti nagkauna a manuskrito, napaneknekan dagiti eskolar a ti linaon ti Sao ti Dios nga us-usarentayo ita ket kapada ti orihinal a sursurat. * Makapagtalektayo a sinigurado ti Dios a mapreserba ti kinaumiso ti Nasantuan a Sursuratna para kadatayo ita.

No basaentayo ti Sao ti Dios, naan-anay ngarud a makapagtalektayo nga umiso dayta. Maitunos iti dayta, usigentayo no ania ti masursurotayo kadagiti propeta maipapan iti Dios.