Nakadanon ti Biblia agingga iti panawentayo. Isu a mabalinmon ti maaddaan iti Biblia ken basaen dayta. Ken no nasayaat ti patarus ti Biblia a piliem, masiguradom a ti basbasaem ket mapagtalkan a kopia ti orihinal. * Ngem adu dagiti nakaskasdaaw a nalasatan ti Biblia. Apay nga adda pay laeng ti Biblia agingga ita uray mabalin a narunot koma idin, dimmalan iti nakakarkaro nga ibubusor, ken adda dagiti nangiranta a mangbalbaliw iti mensahena? Ania la unay ti espesial iti dayta a libro?

Adu a mangad-adal iti Biblia ti naaddaan iti konklusion a kas met laeng iti insurat ni apostol Pablo: “Amin a Kasuratan impaltiing [wenno, naggapu iti ngiwat] ti Dios.” (2 Timoteo 3:16) Patienda a saan a nadadael ti Biblia ta dayta ket espesial a Sao ti Dios ken prinotektaranna tapno makadanon iti panawentayo. Ni Faizal, a naibaga iti umuna nga artikulo, ket nagdesision nga adalenna ti Biblia tapno makitana no husto met laeng dagiti naisuro kenkuana. Kasla saan a mamati iti nadiskobrena. Di nagbayag, nasursurona nga awan iti Biblia ti adu kadagiti gagangay nga isursuro dagiti makunkuna a Kristiano a relihion. Maysa pay, naragsakan a nakaammo iti panggep ti Dios para iti daga kas mabasa iti Biblia.

“Kombinsidoakon a ti Bibliak ket regalo ti Dios,” kunana. “Ngamin, no nakaya ti Dios nga aramiden ti uniberso, saanna ngata a kaya ti mangted iti maysa a libro sa protektaranna dayta para kadatayo? No ibagatayo a saanna a kaya, kasla ibagbagatayo a limitado ti pannakabalin ti Dios. Sinoak koma tapno limitarak ti pannakabalin ti Mannakabalin-Amin a Dios?”—Isaias 40:8.