Nayanakak iti maysa a purok idiay Saxony, iti dati a German Democratic Republic (GDR). Napno ti ayat ti pagtaenganmi ken sinuruandak dagiti nagannakko kadagiti nagsasayaat a prinsipio. Komunista ti GDR isu a saan a napateg ti relihion para iti kaaduan a taga-Saxony. Ken diak idi patien nga adda Dios. Nagdakkel ti impluensia ti ateismo ken Komunismo iti umuna a 18 a tawen ti biagko.

Apay a naginteresak iti Komunismo? Kayatko ngamin ti ideya a patas ti amin a tao. Maysa pay, mamatiak idi a masapul a patas ti pannakabingaybingay dagiti daga ta mabalin a daytoy ti mamagpatingga iti nakaro a kinabaknang ken kinapanglaw. Isu a nagbalinak nga okupado iti Komunista nga organisasion dagiti agtutubo. Idi agtawenak iti 14, adu a tiempo a nagtrabtrabahoak para iti proyekto a mang-recycle kadagiti papel. Agyamyaman unay dagiti umili ti Aue nga uray la inikkandak dagiti opisialda iti award. Agtutuboak pay laeng idi ngem naam-ammokon ti dadduma a nangangato a politiko iti GDR. Panagriknak, umiso ti dalan a sursurotek ken naraniag ti masakbayak.

Ngem bigla a nagbaliw ti lubongko. Idi 1989, narba ti Berlin Wall ken ti aliansa dagiti Komunista iti Eastern Europe. Agsasaruno dagiti di ninamnama a pasamak. Idi kuan, naammuak a gagangay gayam idin ti di kinahustisia iti GDR. Kas pagarigan, matrato a nababbaba dagiti umili a di sumupsuporta iti Komunismo. Apay a kasdiay? Di met mamati dagiti Komunista a patas ti amin a tao? Saan sa met nga agpaypayso ti Komunismo? Naburiboranak unay.

Isu a binaliwak dagiti prioridadko ket nagpokusak iti musika ken panagpinta. Gapu ta nakapagadalak iti maysa nga eskuelaan ti musika ken posible a maituloyko iti unibersidad, kayatko ti agbalin a musikero ken pintor. Linipatko payen dagiti prinsipio a nasursurok idi ubingak. Ti napateg laengen kaniak ket panagragragsak, kas iti aggigiddan a pannakirelasion iti agduduma a babbai. Ngem saan a nakatulong ti musika, panagpinta, ken ti wayawaya nga adda kaniak tapno makissayan ti pannakaburiborko. Makita pay ketdi kadagiti impintak ti buteng a marikriknak. Ania ti masakbayak? Ania ti panggep ti biagko?

 Idi nabirokak met laengen dagiti sungbat, nasorpresaak unay! Maysa a rabii iti eskuelaan, nakiramanak kadagiti estudiante nga agtutungtong maipapan iti masanguanan. Maysa kadakuada ni Mandy * a Saksi ni Jehova. Iti dayta a rabii, inturongnak iti husto a direksion. Kinunana: “Andreas, no kayatmo a masungbatan dagiti saludsodmo maipapan iti biag ken iti masanguanan, adalem a naimbag ti Biblia.”

Nagduaduaak iti imbagana, ngem naginteresak. Impakita kaniak ni Mandy ti Daniel kapitulo 2 ket nakigtotak iti nabasak. Inlawlawag daytoy a padto ti agsasaruno a kabilgan a turay iti lubong—dagiti gobierno nga addaan iti dakkel nga impluensia agingga iti panawentayo. Impakita pay ni Mandy ti dadduma a padto ti Biblia maipapan iti masakbayantayo. Nasarakak met laengen ti sungbat dagiti saludsodko! Ngem siasino ti nangisurat kadagidiay a padto ken asino koma ti eksakto a makaibaga iti mapasamak iti masanguanan? Adda met laeng kadi Dios?

Inyam-ammo kaniak ni Mandy ti agassawa a Saksi a da Horst ken Angelika, a timmulong tapno mas matarusak ti Sao ti Dios. Dagus a nabigbigko a dagiti laeng Saksi ni Jehova ti relihion a kanayon a mangus-usar ken mangipakpakaammo iti personal a nagan ti Dios a Jehova. (Salmo 83:18; Mateo 6:9) Naadalko nga ikarkari ni Jehova a Dios ti namnama a biag nga agnanayon iti paraiso a daga. Kuna ti Salmo 37:9: “Dagidiay mangin-inanama ken Jehova isuda ti mangtagikuanto iti daga.” Naragsakanak a nakaammo a daytoy a namnama ket silulukat iti amin a mangikagkagumaan a mangsurot kadagiti pagalagadan ti Dios kas nailawlawag iti Biblia.

Ngem narigatanak nga agbalbaliw ken mangsurot iti ibagbaga ti Biblia. Nagbalinak a napannakkel gapu iti nagaw-atko kas musikero ken pintor isu a masapul a sursuruek nga umuna ti agbalin a napakumbaba. Narigatanak met a nangpanaw iti immoral a kabibiagko. Agyamyamanak unay ta an-anusan, kakaasian, ken maaw-awatan ni Jehova dagidiay determinado a mangyaplikar iti isursuro ti Biblia!

Iti immuna a 18 a tawen ti biagko, Komunismo ken ateismo ti nangmolde kaniak. Ngem kalpasan dayta, binalbaliwanen ti Biblia ti biagko. Napunas dagiti pakaringgorak maipapan iti masanguanan ken addan panggep ti biagko gapu kadagiti naadalko. Idi 1993, nabautisaranak kas Saksi ni Jehova, ket idi 2000, nagkasarkami ken Tabitha, a maysa a naregta a kapammatiak. Adu a tiempo ti us-usarenmi a mangtulong iti sabsabali a mangadal iti Biblia. Adu dagiti nakasaritami a namolde met iti Komunismo ken ateismo. Nagmayat ti riknak no maipakitak kadakuada no kasanoda a maam-ammo ni Jehova.

Idi damo a nakipagadalak kadagiti Saksi ni Jehova, nadismaya dagiti nagannakko. Ngem sipud idin, nakitada dagiti positibo nga epekto ti pannakikaduak kadagiti Saksi. Makaparagsak ta agbasbasada itan iti Biblia ken umat-atenderdan iti gimong dagiti Saksi ni Jehova.

Naragsakkami ken Tabitha ta sursurotenmi a naimbag dagiti balakad ti Biblia kadagiti agassawa. Kas pagarigan, tumibtibker ti panagasawami ta tungtungpalenmi ti balakad nga agbalin a matalek iti maysa ken maysa.—Hebreo 13:4.

Saanakon a mabutbuteng ken madandanagan iti masakbayan. Karamanak iti sangalubongan a pamilia dagiti kapammatiak, a mangtagtagiragsak iti pudno a talna ken panagkaykaysa. Patas ti panangtratomi iti tunggal maysa. Dayta ti nabayagen a patpatiek ken inar-arapaapko.