‘Maysa a trono ti nakasaad idiay langit, ket adda situtugaw iti trono. Ti langana, umasping iti bato a jaspe ken napateg a nalabaga a bato, ket iti aglikmut ti trono adda bullalayaw nga umasping iti esmeralda.’—Apocalipsis 4:2, 3.

‘Adda raniag iti aglikmutna a kas iti bullalayaw iti ulep iti aldaw ti panagtudo, kasta idi ti raniag iti aglikmut. Daytoy idi ti kaasping ti dayag ni Jehova.’—Ezequiel 1:27, 28, Ti Biblia, Philippine Bible Society.

Dagita a sirmata da apostol Juan ken propeta Ezequiel iladawanda ti dayag ti Kangatuan a Dios a ni Jehova babaen iti bambanag a nalakatayo a mailadawan—narimat a napapateg a bato, bullalayaw, ken nangayed a trono. Ipakpakita dagita a makapaamanga ti kinapintas, kinasayaat, ken kinatalna ti presensia ni Jehova.

Dagita a pannakailadawan ti Dios ket maitunos iti sasao ti salmista: ‘Ni Jehova naindaklan ken maidaydayaw unay. [Mas makapaamanga ngem iti] amin a sabali a didios. Ta dagiti didios ti il-ili, awanan pateg; ngem no maipapan ken Jehova, inaramidna ti langlangit. Dayaw ken kinangayed addada iti sanguananna; pigsa ken kinapintas addada iti santuariona.’—Salmo 96:4-6.

Uray no ni Jehova ti Kangatuan, aw-awisennatayo nga agkararag kenkuana, ken ipasiguradona a denggennatayo. (Salmo 65:2) Ay-ayaten ken ipatpategnatayo ti Dios isu nga insurat ni apostol Juan: “Ti Dios ket ayat.”—1 Juan 4:8.

“[Ti Kristiano nga adalan a ni Esteban], napnuan iti nasantuan nga espiritu, minatmatanna ti langit ket nakitana ti dayag ti Dios ken ni Jesus nga agtaktakder iti makannawan ti Dios, ket kinunana: ‘Adtoy! Makitak ti langlangit a nalukatan ken ti Anak ti tao nga agtaktakder iti makannawan ti Dios.’”—Aramid 7:55, 56.

Sakbay a nasirmata dayta ni Esteban, napapatay ni Jesus gapu iti panangsugsog dagiti lider dagiti Judio a kasarsarita ni Esteban iti dayta a gundaway. Ipasigurado dayta a sirmata a sibibiag ni Jesus, ken napagungar sa naitan-ok. Maipapan iti daytoy, insurat ni apostol Pablo: “[Ni Jehova] imbangonna [ni Jesus] manipud kadagiti natay ken  impatugawna iti makannawanna kadagiti nailangitan a disso, nga adayo a nangatngato ngem iti tunggal gobierno ken autoridad ken pannakabalin ken kinaapo ken iti tunggal nagan a naipanagan, saan laeng nga iti daytoy a sistema ti bambanag, no di ket kasta met iti daydiay umayto.”—Efeso 1:20, 21.

Ipakita ti Biblia a nangato ti posision ni Jesus ken kas ken Jehova, kasta unay ti panangisakitna kadagiti tattao. Idi adda ditoy daga, pinaimbagna dagiti adda depektona ken masakit, ken pinagungarna dagiti natay. Babaen iti panangisakripisiona iti biagna, impakitana ti nauneg a panagayatna iti Dios ken iti sangatauan. (Efeso 2:4, 5) Agtaktakderen ni Jesus iti makannawan ti Dios, ket dandaninan usaren ti autoridadna ken ipaay ti adu a bendision iti amin a natulnog a tattao.

‘Intultuloyko [ni propeta Daniel] ti kimmita agingga nga adda dagiti naisaad a trono ket nagtugaw [ni Jehova] ti Kadaanan iti Al-aldaw. Adda sangaribu a rinibu a nagtultuloy a nagserbi kenkuana, ken sangapulo a ribu a maminsangapulo a ribu a nagtalinaed a sitatakder iti sanguananna.’—Daniel 7:9, 10.

Iti daytoy a sirmata, rinibu nga anghel ti nakita ni Daniel. Nakaskasdaaw la ketdi dayta! Natan-ok nga espiritu a persona, nasaririt, ken mannakabalin dagiti anghel. Karaman kadakuada dagiti serafin ken kerubin. Iti Biblia, nasurok a namin-250 a nadakamat ti maipapan kadagiti anghel.

Dagiti anghel ket saan a tattao a nagbiag idi ditoy daga. Nabayagen a pinarsua ti Dios dagiti anghel sakbay pay a pinarsuana ti tao. Nakita dagiti anghel ti pannakaparsua ti daga ken impukkawda ti pammadayawda.—Job 38:4-7.

Ti maysa a pamay-an nga agserserbi iti Dios dagiti matalek nga anghel ket ti pannakiramanda iti kapatgan a trabaho ita ditoy daga—ti panangiwaragawag iti naimbag a damag ti Pagarian ti Dios. (Mateo 24:14) Makita dayta iti nasirmata ni apostol Juan: “Nakakitaak iti sabali pay nga anghel nga agtaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga,  ken iti tunggal nasion ken tribu ken pagsasao ken ili.” (Apocalipsis 14:6) Saanen a kasarsarita dagiti anghel ti tattao a kas iti sagpaminsan nga ar-aramidenda idi. Ngem tumultulongda iti panangidalan kadagiti mangikaskasaba iti naimbag a damag kadagiti dumngeg a tattao.

“Bimtak ti gubat sadi langit: Ni Miguel [ni Jesu-Kristo] ken dagiti anghelna nakibakalda iti dragon, ket nakibakal ti dragon ken dagiti anghelna ngem saan a nangabak, awan met ti nasarakanen a lugar maipaay kadakuada idiay langit. Gapuna naitapuak ti dakkel a dragon, ti kadaanan a serpiente, daydiay naawagan iti Diablo ken Satanas, a mangyaw-awan iti intero a mapagnaedan a daga; isu naitapuak iti daga, ket dagiti anghelna naitapuakda a naikanunong kenkuana.”—Apocalipsis 12:7-9.

Adda idi tiempo a nariribuk idiay langit. Iti rugi ti pakasaritaan ti tao, adda anghel a nagtarigagay unay a mapagdayawan. Isu a nagrebelde ken Jehova a Dios ket nagbalin a Satanas, kayatna a sawen, “Bumusbusor.” Idi agangay, dadduma nga anghel ti kimmappon kenkuana a nagbalin a demonio. Nakadakdakesda ta binusorda ni Jehova ken inimpluensiaanda ti kaaduan a tattao nga agbiag a maikontra iti naayat a panangidalanna.

Nakadakdakes ken naulpit ni Satanas ken dagiti demoniona. Kalaban ida ti sangatauan ken isuda ti makagapu iti kaaduan a panagrigrigat ditoy daga. Kas pagarigan, pinapatay idi ni Satanas dagiti taraken ken ad-adipen ti matalek a ni Job. Sa pinapatayna ti sangapulo nga annak ni Job babaen iti panangpataudna iti “dakkel nga angin” a nangrebba iti balay nga ayanda. Kalpasanna, pinagsakit ni Satanas ni Job iti “naut-ot a busali manipud iti dapan ti sakana agingga iti kuppokuppona.”—Job 1:7-19; 2:7.

Ngem din agbayag, mapukawton ni Satanas. Idi naitapuak ni Satanas ditoy daga, ammona nga “ababan ti periodo ti tiempona.” (Apocalipsis 12:12) Madadaelto ni Satanas ket talaga a naimbag a damag dayta!

“Nanggatangka [ni Jesus] iti tattao maipaay iti Dios manipud iti tunggal tribu ken pagsasao ken ili ken nasion, ket pinagbalinmo ida a kas pagarian ken papadi iti Diostayo, ket agturayda a kas ar-ari iti daga.”—Apocalipsis 5:9, 10.

Kas ken Jesus, adda met dagiti mapagungar  manipud daga nga agbiag idiay langit. Imbaga ni Jesus kadagiti matalek nga apostolna: ‘Mapanak tapno mangisaganaak iti lugar a maipaay kadakayo. Kasta met, umayak manen ket awatenkay nga ikuyog, tapno no sadino ti ayanko addakayo met koma.’—Juan 14:2, 3.

Apay nga adda dagiti mapan idiay langit? Kaduadanto ni Jesus a mangbukel iti gobierno ti Pagarian, a mangiturayto ken mangyeg kadagiti bendision iti amin a tattao ditoy daga. Dayta ti Pagarian nga imbaga ni Jesus nga ikararag dagiti pasurotna iti modelo a kararag: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.”—Mateo 6:9, 10.

‘Nangngegko [ni apostol Juan] ti natbag a timek manipud iti trono a kunana: “Ti tolda ti Dios adda iti sangatauan. Punasennanto ti amin a lua kadagiti matada, ket awanton ni patay, panagleddaang, panagsangit wenno ut-ot. Ti immuna a bambanag naglabasdan.”’—Apocalipsis 21:3, 4.

Ipakita daytoy a naimpadtuan a sirmata ti tiempo inton ti Pagarian ti Dios—a buklen ni Jesus ken dagiti napagungar manipud iti daga—pagpatinggaenna ti turay ni Satanas ken pagbalinenna a paraiso ti daga. Awanton dagiti pakaigapuan ti nakaro a saem ken ladingit. Awanto metten ni patay.

Dagiti ngay binilion a natay a mapagungar a saan a mapan idiay langit? Agbiagdanto manen ket addanto namnamada nga agbiag nga agnanayon iti Paraiso a daga.—Lucas 23:43.