NASUROK a 3,000 a tawenen ti napalabas, naawatan ti nagkauna a patriarka a ni Job nga adu ti maadaltayo kadagiti tumatayab maipapan kadagiti inaramid ti Dios. Ken gapu kadagiti nakairuamanda nga aramiden, nagsayaat a mausarda kadagiti ilustrasion. Iti Biblia, adda dagiti masursurotayo kadagiti tumatayab a napateg a leksion maipapan iti biag ken iti relasiontayo iti Dios. Kitaentayo ti uppat a pagarigan.

Pamiliar dagiti taga-Jerusalem kadagiti sallapingaw (swallow) a gagangay nga agumok kadagiti sirok ti atep. Dadduma ti nagumok iti templo ni Solomon. Mabalin a para kadagiti sallapingaw a tinawen nga agumok iti templo, natalged dayta a lugar ken natalna a mapadakkelda dagiti sibongda.

Ti kompositor ti Salmo 84, a maysa kadagiti annak ni Kore a makalawas nga agserserbi idi iti templo iti kada innem a bulan, napaliiwna dagita nga umok iti templo. Kayatna unay ti agbalin a kas kadagiti sallapingaw nga addaan iti permanente a pagyanan iti balay ni Jehova a Dios isu a naibagana: ‘Anian a kinanaslag ti naindaklan a tabernakulom, O Jehova ti buybuyot! Ti kararuak nagagaran ken nautoyan kadagiti paraangan ni Jehova. Uray ti tumatayab nakasarak iti balay, ken ti sallapingaw maysa nga umokna a nangikabilanna kadagidiay urbonna—ti naindaklan nga altarmo, O Jehova ti buybuyot, Arik ken Diosko!’ (Salmo 84:1-3) Ipakpakitatayo met kadi, agraman dagiti annaktayo, ti kasta a tarigagay ken apresasion iti regular a pannakikaduatayo kadagiti agserserbi iti Dios?—Salmo 26:8, 12.

Insurat ni propeta Jeremias: “Ti tikbaboy (stork) iti langlangit—pagaammona unay dagiti naituding a tiempona.” Sigurado nga ammona ti panagakar dagiti tikbaboy iti sabali a lugar ta lumasatda iti Naikari a Daga. Bayat ti Marso/Abril, nasurok a 300,000 a puraw a tikbaboy a naggapu iti Africa ti dumalan iti Tanap ti Jordan a mapan iti Europa. Gapu iti nakaisigudan a pagorasanda, agsublida iti lugar a pagpaaduanda bayat ti Hunio-Septiembre. Kas iti dadduma nga agakar-akar a billit, “salimetmetanda a naimbag ti tiempo nga iyaay,” wenno isusublida.—Jeremias 8:7.

“Nakaskasdaaw ti panagakar [dagiti billit] ta automatiko dayta,” kuna ti Collins Atlas of Bird Migration. Inikkan ni Jehova a Dios dagiti agakar-akar a billit iti nainkasigudan a sirib maipapan iti tiempo, ngem inikkanna ti tao iti abilidad a mangilasin iti kaipapanan dagiti tiempo ken paniempo. (Lucas 12:54-56) Saan a kas iti nainkasigudan a sirib ti tikbaboy, ti pannakaammo ti Dios ti tumulong tapno mailasintayo ti kaipapanan dagiti pasamak iti tiempo a pagbibiagantayo. Saan a naawatan dagiti Israelita idi panawen ni Jeremias dagita a pagilasinan.  Inlawlawag ni Jehova ti makagapu: “Linaksidda ti mismo a sao ni Jehova, ket ania a sirib ti adda kadakuada?”—Jeremias 8:9.

Nagadun dagiti makitkitatayo nga ebidensia nga agbibiagtayon iti aw-awagan ti Biblia a ‘maudi nga al-aldaw.’ (2 Timoteo 3:1-5) Tuladem kadi ti tikbaboy a makailasin iti kaipapanan ti ‘tiempo’?

Namin-adu a nadakamat ti agila iti Biblia, ken gagangay a makita daytoy iti Naikari a Daga. Iti umokna iti nangato a rangkis, “agbirok [ti agila] iti taraon; agingga iti adayo kumitkita dagiti matana.” (Job 39:27-29) Natadem ti panagkita ti agila ta naireport a makitana ti koneho uray maysa a kilometro ti kaadayona.

Kas iti agila nga ‘adayo ti makitana,’ makita ni Jehova ti adayo a masanguanan. Isu a kinuna ni Jehova a Dios: ‘Manipud punganay ibagbagak ti pagnguduan, ken manipud iti nabayagen a tiempo ti bambanag a saan pay a naaramid.’ (Isaias 46:10) No tungpalentayo ti balakad ni Jehova, mabenepisiarantayo iti awan kapadana a siribna ken iti abilidadna a mangammo iti masanguanan.—Isaias 48:17, 18.

Ipada met ti Biblia dagiti agtaltalek iti Dios kadagiti agila: “Dagidiay mangin-inanama ken Jehova mapasublidanto ti bilegda. Agpangatodanto a sipapayak a kas kadagiti agila.” (Isaias 40:31) Agampayag ti agila babaen iti thermal, wenno kasla poste nga agpangato nga angin. No makasarak iti thermal, iyukradna dagiti payakna ken aglugan iti dayta isu nga agpangato nga agpangato. Saan nga agdepende ti agila iti bukodna a pigsa no agpangato ken agampayag iti adayo. Kasta met, manamnama dagiti agtaltalek ken Jehova a tungpalenna ti karina nga ipaayanna ida iti pigsa wenno “pannakabalin a nalablabes ngem ti gagangay.”—2 Corinto 4:7, 8.

Sakbay ti ipapatayna, nagsardeng ni Jesus tapno kitaenna ti kabesera a siudad dagiti Judio. “Jerusalem, Jerusalem, ti mammapatay kadagiti mammadto ken manangubor kadagidiay naibaon kenkuana,” insennaayna. ‘Namin-adu a kinayatko nga urnongen ti annakmo, iti wagas a ti upa urnongenna dagiti piekna iti sirok dagiti payakna! Ngem saanyo a kinayat.’—Mateo 23:37.

Maysa kadagiti kapigsaan a nainkasigudan a rikna dagiti tumatayab ket ti panangprotektarda kadagiti sibongda. Dagiti tumatayab nga agumok iti daga, kas iti upa, masapul nga alertoda nga agbantay. No makita ti upa ti kali nga agtayabtayab, agkutak iti napigsa tapno pakdaaranna dagiti piekna isu nga agtatarayda nga aglemmeng iti sirok dagiti payakna. Aglinong dita dagiti piek no nakapudpudot ken no napigsa ti tudo. Kayat met ni Jesus nga ipaayan dagiti taga-Jerusalem iti naespirituan a pagkamangan ken proteksion. Ita, aw-awisennatayo ni Jesus nga agkamang kenkuana tapno magin-awaan ken maprotektarantayo kadagiti problema ken pakadanagantayo iti inaldaw.—Mateo 11:28, 29.

Talaga nga adu ti masursurotayo kadagitoy a nagpayak a parsua. Bayat a palpaliiwem dagiti nakairuamanda nga aramiden, lagipem dagiti ilustrasion iti Biblia maipapan kadakuada. Tulongannaka koma ti sallapingaw a mangapresiar iti balay a pagdaydayawan ken Jehova. Agtalekka koma a ti Dios laeng ti makaited iti namnama a makatulong kenka nga agtayab a kas iti agila. Agkamangka koma ken Jesus para iti naespirituan a kinapudno a mangprotektar kenka kas iti ar-aramiden ti upa kadagiti piekna. Ken ipalagip koma kenka ti tikbaboy nga agtalinaedka nga alerto iti kaipapanan dagiti pasamak ditoy lubong.