1. Ania ti asidegen nga aramiden ni Jesus?

 ADU ti dadakkel a panagbalbaliw a padpadaanantayo a mapasamak iti kaaldawantayo! Asidegen nga ukomen ni Jesus ti tunggal tao ditoy daga. Ammotayo nga asidegen dayta ta impakpakaunana kadagiti adalanna ti “pagilasinan” ti di makita a kaaddana ken “ti panungpalan daytoy a sistema ti bambanag.” (Mat. 24:3) Dayta a padto ket mabasa iti Mateo kapitulo 24 ken 25 ken kadagiti kapadana a salaysay iti Marcos kapitulo 13 ken Lucas kapitulo 21.

 2. Ania ti pagsasaritaantayo iti daytoy nga artikulo, ken apay a makatulong dayta kadatayo?

² Nangusar ni Jesus iti tallo nga ilustrasion tapno mangted kadagiti makatulong a pakdaar. Dagita ket maipapan kadagiti karnero ken kalding, lima a masirib ken lima a maag a birhen, ken maipapan kadagiti talento. Makatulong kadatayo ti tunggal ilustrasion tapno maawatantayo a ti panangukom ni Jesus iti maysa a tao ket nakadepende kadagiti ar-aramidenna. Iti daytoy nga artikulo, usigentayo dagita nga ilustrasion ken dagiti masursurotayo. Usigentayo nga umuna ti ilustrasion maipapan kadagiti karnero ken kalding.

DAGITI KARNERO KEN KALDING

 3. Kaano nga ukomen ni Jesus dagiti tattao?

³ Iti ilustrasion maipapan kadagiti karnero ken kalding, imbaga ni Jesus nga ukomenna dagiti tattao sigun iti inaramidda idi naammuanda ti naimbag a damag ken iti panangsuportada  kadagiti kakabsatna a dinutokan ti espiritu. (Mat. 25:​31-46) Aramidenna dayta bayat ti “dakkel a rigat,” sakbay unay ti Armagedon. (Mat. 24:21) No kasano a ti maysa a pastor ilasinna dagiti karnero manipud kadagiti kalding, ilasinto met ni Jesus dagidiay simamatalek a mangsupsuporta kadagiti pasurotna a dinutokan ti espiritu manipud kadagidiay saan a mangar-aramid iti dayta.

 4. Sigun iti Isaias 11:​3, 4, apay a masiguradotayo a patasto ti panangukom ni Jesus? (Kitaen met ti ladawan.)

⁴ Ibaga ti Biblia a patasto ti panangukom ni Jesus, ti Ukom a dinutokan ni Jehova. (Basaen ti Isaias 11:​3, 4.) Ob-obserbaran ni Jesus dagiti ar-aramiden, pampanunoten, ken ibagbaga dagiti tattao—agraman ti panangtratoda kadagiti kakabsatna a dinutokan ti espiritu. (Mat. 12:​36, 37; 25:40) Ammonanto ngarud no siasino dagiti nangsuporta kadagiti kakabsatna a dinutokan ti espiritu ken iti trabahoda. a Ti maysa a kapatgan a pamay-an tapno masuportaran dagiti tattao dagiti kakabsat ni Kristo ket ti pannakitinnulongda kadakuada iti trabaho a panangasaba. Dagiti makitintinnulong kadakuada ket maibilangto a “nalinteg” ken adda namnamada nga ‘agbiag nga agnanayon’ ditoy daga. (Mat. 25:46; Apoc. 7:​16, 17) Nagsayaat dayta a gunggona kadagiti agtalinaed a matalek! No ngarud agtalinaedda a matalek bayat ti dakkel a rigat ken uray kalpasanna, agtalinaedto ti naganda iti “libro ti biag.”—Apoc. 20:15.

 5. Ania ti masursurotayo iti ilustrasion maipapan kadagiti karnero ken kalding, ken siasino dagiti masapul nga interesado iti dayta?

⁵ Paneknekam a matalek ken napudnoka. Ti ilustrasion ni Jesus maipapan kadagiti karnero ken kalding ket kangrunaanna a para kadagidiay adda namnamada nga agbiag nga agnanayon ditoy daga. Ipakpakitada a matalekda no makitintinnulongda kadagiti kakabsat ni Kristo iti trabaho a panangasaba. Ipakpakitada met a napudnoda no agtulnogda kadagiti instruksion ti matalek ken masirib nga adipen a pinili ni Jesus. (Mat. 24:45) Ngem dagidiay adda namnamada nga agbiag idiay langit masapul met nga ipangagda ti pakdaar ti ilustrasion. Apay? Gapu ta ob-obserbaran ni Jesus dagiti ar-aramiden, pampanunoten, ken ibagbagada. Masapul met a paneknekanda a matalekda. Kinapudnona, adda pay dua nga ilustrasion nga imbaga ni Jesus nga espesipiko a para kadagiti dinutokan ti espiritu. Mabasatayo met dagita iti Mateo kapitulo 25. Pagsasaritaantayo itan ti ilustrasion maipapan kadagiti masirib ken maag a birhen.

DAGITI MASIRIB KEN MAAG A BIRHEN

 6. Ania ti inaramid ti lima a birhen a mangipakita a masiribda? (Mateo 25:​6-10)

⁶ Iti ilustrasion maipapan iti 10 a birhen, imbaga ni Jesus a rimmuarda tapno sabatenda ti nobio. (Mat. 25:​1-4) Kayatda amin a kaduaen ti nobio a mapan iti kasaran. Imbaga ni Jesus a ti lima kadakuada ket “masirib” ngem “maag” ti lima pay. Nakasagana ken alerto dagiti masirib a birhen. Desididoda a manguray iti nobio kasano man kabayag dayta, uray pay no tengngan ti rabii a sumangpet. Isu a nangitugotda iti lampara tapno adda silawda iti rabii. Nangitugotda pay ketdi iti reserba a lana no bilang marabiyan unay ti nobio. Talaga ngarud a nakasaganada! (Basaen ti Mateo 25:​6-10.) Idi simmangpeten ti nobio, kimmuyog dagita a masirib a birhen idi simrek iti kasaran. Kasta met, mapaneknekan dagiti Kristiano a dinutokan ti espiritu a  nakasaganada no agtalinaedda nga alerto ken matalek agingga nga umay ni Kristo. Iti kasta, maawatdanto ti gunggonada a makikadua iti Nobio a ni Jesus iti nailangitan a Pagarianna. b (Apoc. 7:​1-3) Ania ngay met ti mapasamak iti lima a maag a birhen?

 7. Ania ti napasamak iti lima a maag a birhen, ken apay?

⁷ Saan a kas kadagiti masirib a birhen, saan a nakasagana ti lima a maag idi simmangpet ti nobio. Dandanin maiddep ti lamparada, ket awan met ngarud ti reserbada a lana. Idi naammuanda nga asidegen a sumangpet ti nobio, pimmanawda tapno gumatang iti lana. Isu nga awanda idi simmangpet ti nobio. Ngem “dagiti nakasagana a birhen kimmuyogda kenkuana a simrek iti pagkasaran, ket nairikep ti ridaw.” (Mat. 25:10) Idi nagsubli dagiti maag a birhen, kayatda met ti sumrek ngem imbaga kadakuada ti nobio: “Dikay am-ammo.” (Mat. 25:​11, 12) Saan a nakasagana dagiti maag a birhen a manguray iti nobio. Ania ti masursuro dagiti dinutokan ti espiritu?

8-9. Ania ti masursuro dagiti dinutokan ti espiritu iti ilustrasion maipapan kadagiti birhen? (Kitaen met ti ladawan.)

⁸ Paneknekam a nakasagana ken alertoka. Saan nga impakpakauna ni Jesus nga addanto dua a klase dagiti dinutokan ti espiritu—dagidiay nakasagana nga aguray agingga iti panagpatingga daytoy a sistema ken dagidiay saan. Ibagbagana laeng ditoy ti mapasamak kadagiti dinutokan ti espiritu no saanda a nakasagana nga agibtur a simamatalek agingga iti panungpalan. No kasta ti aramidenda, saanda a maawat ti gunggonada. (Juan 14:​3, 4) Nadagsen dayta a pakdaar! Idiay man langit wenno ditoy daga ti namnamatayo, masapul nga ipapusotayo dagiti masursurotayo iti ilustrasion maipapan kadagiti birhen. Masapul nga itultuloy ti tunggal maysa kadatayo ti agbantay ken sisasaganatayo nga agibtur agingga iti panungpalan.—Mat. 24:13.

⁹ Kalpasan nga insalaysay ni Jesus ti ilustrasion  maipapan kadagiti birhen tapno ipaganetgetna ti kinapateg ti panagsagana ken ti panagbalin nga alerto, imbagana met ti ilustrasion maipapan kadagiti talento. Itampok dayta nga ilustrasion ti kinapateg ti panagbalin a nagaget.

DAGITI TALENTO

10. Kasano a pinaneknekan ti dua nga adipen a matalekda? (Mateo 25:​19-23)

¹⁰ Iti ilustrasion maipapan kadagiti talento, imbaga ni Jesus nga adda dua nga adipen a matalek iti apoda ken adda maysa a saan. (Mat. 25:​14-18) Pinaneknekan ti dua nga adipen a matalekda ta sigagaget a nagtrabahoda tapno umadu ti kuarta a naitalek kadakuada. Sakbay a napan ti apoda iti sabali a pagilian, intalekna kadakuada dagiti talento—a nagdakkel a gatad ti kuarta. Nagaget ti dua a matalek nga adipen ta nainsiriban ti panangusarda iti kuarta. Ania ti resultana? Idi nagsubli ti apoda, nadobleda ti gatad ti kuarta a naitalek kadakuada. Kinomendaranna ida ken ‘nakipagragsakda’ kenkuana. (Basaen ti Mateo 25:​19-23.) Ti ngay met maikatlo nga adipen? Ania ti inaramidna iti kuarta nga intalek kenkuana ti apona?

11. Ania ti napasamak iti “sadut” nga adipen ken apay?

¹¹ Nakaawat ti maikatlo nga adipen iti maysa a talento ngem “sadut.” Namnamaen ti apona a nainsiriban ti panangusarna iti talento. Ngem inkalina laeng dayta iti daga. Idi nagsubli ti apona, awan ti napasamak iti talento nga intedna kenkuana. Saan a nasayaat ti ugali dayta nga adipen. Imbes nga agpadispensar ta saanna a napaadu ti naitalek kenkuana, inawaganna ketdin ti apona nga ‘istrikto.’ Gapu iti dayta, nakaunget ti apona. Isu a binabawina ti talento sa pinapanawna dayta nga adipen.—Mat. 25:​24, 26-30.

12. Siasino ita ti irepresentar ti dua a matalek nga adipen?

¹² Ti dua a matalek nga adipen irepresentarda dagiti matalek a Kristiano a dinutokan ti espiritu. Inawis ida ti Apoda a ni Jesus a ‘sumrekda ket makipagragsakda’ kenkuana. Awatenda ti nailangitan a gunggonada, ti umuna a panagungar. (Mat. 25:​21, 23; Apoc.  20:5b) Iti sabali a bangir, ti dakes nga ulidan ti sadut nga adipen ket pakdaar para kadagiti dinutokan ti espiritu. Kasano?

13-14. Ania ti masursuro dagiti dinutokan ti espiritu iti ilustrasion maipapan kadagiti talento? (Kitaen met ti ladawan.)

¹³ Paneknekam a nagaget ken naregtaka. Iti ilustrasion maipapan kadagiti talento, kas met laeng iti ilustrasion maipapan kadagiti birhen, saan nga ibagbaga ni Jesus nga agbalinto a sadut dagiti dinutokan ti espiritu. Imbes ketdi, ibagbagana laeng ti posible a mapasamak no saanda nga agtalinaed a naregta ken nagaget. No saanda nga “agtalinaed a matalek kas naayaban ken napili,” saandanto a mapalubosan a sumrek iti nailangitan a Pagarian.—2 Ped. 1:10.

¹⁴ Nalawag kadagiti ilustrasion ni Jesus maipapan kadagiti birhen ken kadagiti talento nga amin a dinutokan ti espiritu ket masapul a nakasagana ken alerto. Masapul met a nagaget ken naregtada. Adda pay kadi pakdaar ni Jesus para kadagiti dinutokan ti espiritu? Wen, adda! Mabasa dayta iti Mateo 24:​40, 41.

SIASINO DAGITI “MAALA”?

15-16. Kasano nga itampok ti Mateo 24:​40, 41 a masapul nga agtultuloy nga agbantay dagiti dinutokan ti espiritu?

¹⁵ Sakbay nga insalaysay ni Jesus ti tallo nga ilustrasion, inladawanna ti maudi a panangukom kadagiti dinutokan ti espiritu a mangipakita no siasino dagiti naanamongan. Inyestoriana ti maipapan iti dua a lallaki nga adda iti talon ken iti dua a babbai nga adda iti paggilingan. Kasla agpada ti ar-aramiden ti dua a lallaki, ken agpada met laeng ti dua a babbai. Ngem imbaga ni Jesus a “maalanto ti maysa ket mabatinto ti sabali.” (Basaen ti Mateo 24:​40, 41.) Imparegtana ngarud kadagiti pasurotna: “Isu nga itultuloyyo ti agbantay, ta diyo ammo no ania nga aldaw nga umay ti Apoyo.” (Mat. 24:42) Dandani agpada ti imbaga ni Jesus kalpasan nga inyestoriana ti ilustrasion maipapan kadagiti birhen. (Mat. 25:13) Agpada kadi ti kayat nga isuro ni Jesus kadagita a komentona? Agparang a kasta. Dagiti laeng napudno ken matalek a dinutokan ti espiritu ti “maalanto” ken awaten ni Jesus iti nailangitan a Pagarian.—Juan 14:3.

¹⁶ Paneknekam a managbantayka. Ti asinoman a dinutokan ti espiritu a saan nga agtalinaed a nakariing ken alerto iti naespirituan ket saanto a karaman ‘kadagiti pinili’ ni Jesus. (Mat. 24:31) Ngem amin nga adipen ti Dios, aniaman ti namnamada, ket masapul nga ipangagda ti pakdaar ni Jesus nga agtultuloyda nga agbantay ken matalek.

17. Apay a ditay pakadanagan no agingga ita ket mangpilpili pay laeng ni Jehova kadagiti dutokanna iti nasantuan nga espirituna?

¹⁷ Am-ammotayo unay ni Jehova isu nga agtalektayo nga umiso ti amin nga aramidenna. Ditay pakadanagan no agingga ita ket agpilpili pay laeng kadagiti matalek a tattao a dutokanna iti nasantuan nga espirituna. c Lagipentayo ti ilustrasion ni Jesus maipapan kadagiti nagtrabaho iti kaubasan iti agarup alas singko ti malem. (Mat. 20:​1-16) Agpada laeng ti sueldo dagiti naudi a nangrugi nga agtrabaho ken dagiti nasapsapa a nangrugi. Kasta met, kaanoman ti pannakapili dagiti dinutokan ti espiritu, awatendanto ti nailangitan a gunggonada no la ketdi ta agtalinaedda a matalek.

IPANGAGMO DAGITI PAKDAAR

18-19. Ania dagiti nasursurotayo kadagiti inusigtayo nga ilustrasion?

¹⁸ Ania dagiti nasursurotayo? Para kadagiti addaan iti namnama nga agbiag nga agnanayon  ditoy daga, intampok ti ilustrasion maipapan kadagiti karnero ken kalding a masapul nga agtalinaedtayo a matalek ken napudno ken Jehova—ita ken bayat ti umas-asidegen a dakkel a rigat. Sakbay unay ti Armagedon, dagiti matalek ket ukomenton ni Jesus kas dagiti maikari nga umawat iti ‘biag nga agnanayon.’—Mat. 25:46.

¹⁹ Inusigtay met ti dua nga ilustrasion a nangpakdaar kadagiti dinutokan ti espiritu. Iti ilustrasion ni Jesus maipapan kadagiti masirib ken maag a birhen, pinaneknekan ti lima kadakuada a masiribda. Nakasagana ken alertoda. Nakasaganada a manguray iti nobio kaanoman a sumangpet. Ngem saan a nakasagana dagiti maag a birhen. Isu a saan ida a pinastrek ti nobio iti kasaran. Masapul met a nakasaganatayo a manguray ken Jesus, kaanoman a pagpatinggaenna daytoy a sistema ti bambanag. Iti met ilustrasion ni Jesus maipapan kadagiti talento, inusigtayo ti dua a matalek nga adipen a nagaget ken naregta. Intrabahoda ti intalek kadakuada ti apoda isu a naragsakan kadakuada. Ngem napapanaw ti sadut nga adipen. Ania ti masursurotayo? Masapul nga itultuloytayo ti nagaget a panagserbitayo ken Jehova agingga iti panungpalan. Kamaudiananna, inusigtayo no kasano nga agtalinaed a managbantay dagiti dinutokan ti espiritu tapno ‘alaento’ ida ni Jesus idiay langit. Magagaranda unayen iti “pannakaurnong[da] a sangsangkamaysa” a kadua ni Jesus idiay langit. Kalpasan ti Armagedon, agbalindanto a nobia ni Jesus iti kasar ti Kordero.—2 Tes. 2:1; Apoc. 19:9.

20. Anianto ti aramiden ni Jehova kadagidiay mangipangag kadagiti pakdaarna?

²⁰ Nakaas-asidegen ti aldaw ti panangukom. Ngem awan ti rumbeng a pagbutngantayo. No agtalinaedtayo a matalek, ipaayto ti nailangitan nga Amatayo “ti bileg a nalablabes ngem iti gagangay.” Iti kasta, ‘malasatantayo amin dagitoy ken makapagtakdertayo iti sanguanan ti Anak ti tao.’ (2 Cor. 4:7; Luc. 21:36) Idiay man langit wenno ditoy daga ti namnamatayo, maparagsaktayo ti Amatayo no ipangagtayo ti pakdaar kadagiti ilustrasion ni Jesus. Gapu iti nagpaiduma a kinaimbag ni Jehova, dagiti nagantayo ket ‘maisuratto iti libro’ ti biag.—Dan. 12:1; Apoc. 3:5.