TI TINAWEN a miting ti Watch Tower Bible and Tract Society of Pennsylvania ket kanayon a makapagagar. Pudno dayta iti maika-127 a tinawen a miting, a naangay idi Sabado, Oktubre 1, 2011! Naguummong ti amin a bisita manipud iti nadumaduma a paset ti lubong iti Assembly Hall of Jehovah’s Witnesses idiay Jersey City, New Jersey, U.S.A.

Ni Gerrit Lösch a miembro ti Bagi a Manarawidwid ti nangabrasa iti naragsak a tallaong. Imbagana kadagiti timmabuno a naggapu iti agarup 85 a pagilian a tagtagiragsakenda ti awan kapadana nga internasional a panagkaykaysa. Pakaidayawan ni Jehova ti kasta a panagkaykaysa. Kinapudnona, maulit-ulit a nadakamat ti panagkaykaysa iti daytoy a miting.

NASAYAAT A REPORT MANIPUD MEXICO

Ti umuna a paset ti programa impakitana ti panagkaykaysa dagiti adipen ni Jehova. Ininterbiu ni Baltasar Perla ti tallo a padana a miembro ti pamilia ti Bethel iti Mexico maipapan iti pannakaitipon ti innem a sanga nga opisina iti Sentral nga America iti sanga ti Mexico. Gapu iti daytoy, ti pamilia ti Bethel iti Mexico ket buklen itan ti ad-adu a kultura ken nasionalidad. Nagresulta dayta iti pannakapabileg dagitoy nga agkakapammatian a naggapu iti nadumaduma a pagilian. Kasla nangala ti Dios iti dakkel nga eraser ket binurana ti beddeng dagiti nasion.

Gapu iti dayta a panagtitipon, kasapulan a matulongan dagiti agibumbunannag tapno saanda koma a marikna a naisinada iti organisasion ni Jehova uray awanen ti sanga nga opisina iti pagilianda. Naikkan ngarud ti tunggal kongregasion iti bukod a koneksion iti Internet, uray dagidiay agnanaed iti nasulinek a luglugar, tapno mabalinda ti direkta a makikomunikar iti sanga nga opisina.

KAUDIAN A DAMAG MANIPUD JAPAN

Ni James Linton manipud iti sanga nga opisina ti Japan inlawlawagna ti kasasaad dagiti kakabsattayo a naapektaran iti ginggined ken tsunami idi Marso 2011. Adu a Saksi ti napukawan iti ipatpateg iti biag ken sansanikua. Dagiti Saksi iti kabangibang a luglugar a saan a naapektaran nangipaayda iti nasurok a 3,100 a pagyanan ken nangipabulodda iti ginasut a lugan. Dagiti boluntario a miembro dagiti Regional Building Committee ket awan sarday a nagtrabaho a nangtarimaan kadagiti pagtaengan ti kakabsat. Nasurok a 1,700 a boluntario ti timmulong kadagiti agkasapulan. Maysa a grupo manipud Estados Unidos a buklen ti 575 a boluntario ti timmulong iti pannakatarimaan dagiti Kingdom Hall.

Adu a tiempo ti nabusbos iti pannakaipaay ti naespirituan ken emosional a kasapulan dagidiay naapektaran. Nasurok nga 400 a panglakayen ti nangsarungkar kadagiti agkasapulan iti panangipastor. Makita ti pannakaseknan ti Bagi a Manarawidwid idi nangibaon iti dua a manangaywan iti sona manipud sangalubongan a hedkuarter tapno paregtaenda dagiti kakabsat iti nadidigra a lugar. Naliwliwa met unay dagiti biktima gapu iti pannakaseknan dagiti Saksi iti intero a lubong.

 DAGITI NANGABAK A KASO

Nagimdeng a naimbag ti tallaong ken Stephen Hardy manipud iti sanga nga opisina ti Britania bayat nga insalaysayna dagiti nabiit pay a panagballigitayo iti korte. Kas pagarigan, ipappapilit ti gobierno ti Francia nga agbuistayo iti $82 milion (U.S.) gapu iti ar-aramatentayo nga asosasion iti dayta a pagilian. Narisut ti isyu idi pinaborannatayo ti European Court of Human Rights (ECHR), ket kinunana a sinalungasing ti gobierno ti Francia ti Article 9 ti European Convention, a mangsalsalaknib iti narelihiosuan a wayawaya. Ti linaon ti desision ipakitana a saan a kuarta ti nainaig iti daytoy a kaso: “Ti panagkedked a mangbigbig iti narelihiosuan nga asosasion, panangpasardeng iti dayta, panagusar iti manglais a sasao kontra iti maysa a relihion, ket pagarigan ti panangilaksid iti kalintegan nga inyetnag ti Article 9 ti Convention.”

Pinaborannatayo met ti ECHR iti maysa a kaso mainaig iti Armenia. Sipud 1965, impakita ti ECHR a saan a salsalakniban ti European Convention dagiti indibidual iti inkapilitan a panagserbi iti militar. Ti Grand Chamber​—a kangatuan a benneg ti European Court​—inyetnagna a ti “panagkedked nga agserbi iti militar, no maigapu iti napasnek ken di maisin a determinasion” ket masapul a patgan ti European Convention. Gapu iti daytoy a desision, obligado ti Armenia ken ti dadduma pay a pagilian a kas iti Azerbaijan ken Turkey a mangbigbig iti kasta a kalintegan.

PROYEKTO A PANAGIBANGON

Ni Guy Pierce a miembro ti Bagi a Manarawidwid ti simmaruno a nagpalawag ket imbagana a mabalin nga interesado ti amin maipapan iti proyektotayo a panagibangon iti New York State. Impabuyana ti maysa a video maipapan iti pagrangrang-ayan ti trabaho iti Wallkill, Patterson, ken iti nabiit pay a nagatang a daga iti Warwick ken Tuxedo, New York. Ti baro a residence building a malpas inton 2014 idiay Wallkill ket addaan iti nasurok a 300 a kuarto.

Maiplamplano ti proyekto a panagbangon iti 100 ektaria a daga iti Warwick. “Nupay ditay ammo ti pagayatan ni Jehova idiay Warwick,” kuna ni Kabsat Pierce, “ituloytay latta ti planotayo a mangyakar sadiay iti sangalubongan a hedkuarter dagiti Saksi ni Jehova.” Adda 20 ektaria a daga a 10 kilometro iti amianan ti Warwick a maiplamplano a maaramat a pagyanan dagiti makinaria ken materiales a pagbangon. “Apaman a maaprobaran ti permit ti panagibangon, manamnamatayo a malpas ti intero a proyekto iti uneg ti uppat a tawen,” kuna ni Kabsat Pierce. “Kalpasanna, mabalinton nga ilako ti pasilidadtayo idiay Brooklyn.”

“Nagbaliw kadi ti panangmatmat ti Bagi a Manarawidwid iti kinaasideg ti dakkel a rigat?” insaludsod ni Kabsat Pierce. “Pulos a saan,” insungbatna. “No singaen ti dakkel a rigat dagiti planotayo, ay ket nagsayaaten, nakasaysayaat unay!”

AGANNAD ITI NGUMERNGERNGER A LEON

Ni Stephen Lett a sabali pay a miembro ti Bagi a Manarawidwid ti nangilawlawag iti 1 Pedro 5:8: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.” Kinuna ni Kabsat Lett a mayanatup daytoy a panangiladawan ni Pedro ta adda sumagmamano a kababalin ti leon nga umasping iti Diablo.

Gapu ta napigpigsa ken naparpartak ti leon ngem iti tao, ditay koma padpadasen a sarangten wenno libasan ni Satanas iti bukodtayo a bileg. Kasapulantayo ti tulong ni Jehova. (Isa. 40:31) Nasikap a mangnganup ti leon, isu a masapul a liklikantayo ti naespirituan a kinasipnget a pangkemkemmegan ni Satanas kadagiti biktimana. No kasano a biktimaen ti leon ti awan gawgawayna nga antilop wenno ti  matmaturog nga urbon a sebra, awan met ti asi ni Satanas ken kayatnatayo a papatayen. No nabsogen ti leon, narigaten a mailasin ti biktimana, kasta met nga agbalin a nakapimpiman ti naespirituan a kasasaad dagiti biktima ni Satanas. (2 Ped. 2:20) Ngarud, masapul a sarangtentayo ni Satanas ken salimetmetantayo dagiti prinsipio ti Biblia a naadaltayo.​—1 Ped. 5:9.

TAGIPATGEM TI PASETMO ITI BALAY NI JEHOVA

“Adda amin pasettayo iti balay ni Jehova,” kuna ti simmaruno nga ispiker, ni Samuel Herd a miembro ti Bagi a Manarawidwid. Amin a Kristiano adda pasetna iti “balay” ti Dios​—ti naespirituan a templona​— ti urnos a panagdayaw kenkuana maibatay iti daton a subbot ni Jesus. Ibilangtayo koma ti pasettayo kas maysa a napateg a pribilehio. Kas ken David, tarigagayantayo ti ‘agnaed iti balay ni Jehova iti amin nga al-aldaw ti panagbiagtayo.’​—Sal. 27:4.

Inadaw ni Kabsat Herd ti Salmo 92:12-14 sa insaludsodna, “Kasanonatayo a palangtuen ni Jehova?” Insungbatna: “Iti naespirituan a paraiso, ti Dios ipaayannatayo iti liwliwa, proteksion, ken makarepresko a danum ti kinapudno.” Imparegta ni Kabsat Herd: “Agyamantayo kenkuana gapu iti dayta. Pagragsakantay koma ti kaaddatayo iti balay ni Jehova​—saan laeng nga iti apagbiit no di ket iti agnanayon.”

RAEMEN DAGITI KRISTIANO TI SAO TI DIOS

Ni David Splane a miembro met ti Bagi a Manarawidwid inlawlawagna iti simmaganad a palawag a kanayon a raraemen dagiti pudno a Kristiano ti Sao ti Dios. Idi umuna a siglo, nagpannurayda iti dayta iti panangrisutda iti isyu ti panagkugit. (Ara. 15:16, 17) Ngem idi maikadua a siglo, dadduma nga agkunkuna a Kristiano a nasuruan iti Griego a pilosopia ti nangrugi a mangitandudo iti natauan a sirib imbes a ti Kasuratan. Idi agangay, sinuktan ti dadduma dagiti pannursuro ti Biblia kadagiti kapanunotan dagiti makunkuna nga Amma ti Simbaan ken dagiti Romano nga emperador, ket timmaud ti adu a palso a doktrina.

Imbaga ni Kabsat Splane nga iti maysa nga ilustrasion, impamatmat ni Jesus nga agtultuloy nga adda dagiti pudno a napulotan a Kristiano ditoy daga a mangidepensa iti kinapudno. (Mat. 13:24-30) Saantay a sigurado no siasinoda. Ngem iti panaglabas dagiti  siglo, adu nga indibidual ti nangkondenar kadagiti di nainkasuratan a patpatien ken ar-aramid. Sumagmamano kadagitoy isu da Arsobispo Agobard ti Lyons idi maika-9 a siglo, Peter ti Bruys, Henry ti Lausanne, Valdès (wenno, Waldo) idi maika-12 a siglo, John Wycliffe idi maika-14 a siglo, William Tyndale idi maika-16 a siglo, ken da Henry Grew ken George Storrs idi maika-19 a siglo. Dagiti Saksi ni Jehova ita itultuloyda nga itandudo dagiti Nainkasuratan a pagalagadan ken bigbigenda ti Biblia kas pundasion ti kinapudno. Dayta ti makagapu a pinili ti Bagi a Manarawidwid kas tinawen a teksto iti 2012 ti Juan 17:17: “Ti saom ket kinapudno.”

MAKAPAGAGAR A PANAGBALBALIW ITI PANAGSANAY KEN PANAGSERBI

Impakaammo ni Anthony Morris a miembro ti Bagi a Manarawidwid dagiti panagbalbaliw para kadagiti misionero ken special pioneer. Mangrugi iti Setiembre 2012, maangayen kadagiti napili a pagilian dagiti klase ti Bible School for Christian Couples. Nabaliwanen ti panggep ti Eskuelaan ti Gilead. Sipud napalabas nga Oktubre, dagiti ageskuela iti Gilead ket datin nga adda iti special full-time service​—kas kadagiti misionero a saan pay a nakapagadal iti Gilead, special pioneer, agdaldaliasat a manangaywan, wenno Bethelite. Dagiti agturpos maibaonda a mangpabileg ken mangpatibker iti ili ti Dios, iti man sanga nga opisina, sirkito, distrito, wenno iti aduan populasionna a luglugar a sadiay mabalinda a paregtaen dagiti kongregasion iti trabaho a panangasaba.

Adda dagiti kanayonan nga special pioneer a maibaon kadagiti teritoria iti nasulinek ken naiputputong a luglugar. Sipud idi Enero 1, 2012, dadduma a nagturpos iti Bible School for Single Brothers ken iti Bible School for Christian Couples ket maibaon kas temporario nga special pioneer tapno rugian ken palawaenda ti trabaho kadagiti nasulinek a lugar. Agserbida kas special pioneer iti maysa agingga iti tallo a tawen. Ngem agbalinda a permanente nga special pioneer no epektiboda.

Nakaragragsak nga okasion ti 2011 a tinawen a miting. Mangnamnamatayo a bendisionan ni Jehova ti baro nga urnos a mangparayray iti trabahotayo a panangasaba ken ad-adda pay a mamagkaykaysa iti panagkakabsattayo. Agpaay amin dagitoy a pakaidayawan ni Jehova.

[Kahon/Dagiti Ladawan iti panid 18, 19]

MAKAPABILEG NGA INTERBIU

Paset met ti programa ti pannakainterbiu ti lima kadagiti siam nga assawa dagiti natayen a miembro ti Bagi a Manarawidwid. Insalaysay da Kabsat Marina Sydlik, Edith Suiter, Melita Jaracz, Melba Barry, ken Sydney Barber no kasano a naammuanda ti kinapudno ken no kasano ti panangrugida iti amin-tiempo a panagserbi. Inranud ti tunggal maysa dagiti nakallalagip a kapadasanna, ti makunana iti daydi asawana, ken dagiti bendision a nasagrapda nga agassawa. Kas pangserra kadagitoy nga interbiu, kinanta ti tallaong ti makagutugot a kanta numero 86, a napauluan iti “Matalek a Babbai.”

[Dagiti Ladawan]

(Ngato) Daniel ken Marina Sydlik; Grant ken Edith Suiter; Theodore ken Melita Jaracz

(Baba) Lloyd ken Melba Barry; Carey ken Sydney Barber

[Mapa iti panid 16]

(Para iti aktual a pannakaurnosna, kitaem ti publikasion)

Innem a sanga nga opisina ti naitipon iti Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Ladawan iti panid 17]

Disenio ti plano ti sangalubongan a hedkuarter dagiti Saksi ni Jehova idiay Warwick, New York