“Dagiti nagkauna a pilosopo a Kristiano tinuladda ti kapanunotan dagiti Griego a ti kararua ket imortal ken patienda a pinarsua ti Dios ti kararua sana inkabil dayta iti mayin-inaw a bagi.”—The New Encyclopædia Britannica (1988), Tomo 11, panid 25.

“Ti cararua nga agbasol matayto.”—Ezequiel 18:4, Ti Biblia.

Kuna ti Biblia maipapan iti pannakaparsua ti umuna a kararua: “Ni Jehova a Dios binukelna ti tao manipud tapok a naggapu iti daga ket impuyotna kadagiti abut ti agongna ti anges ti biag, ket ti tao nagbalin a kararua [Hebrew, ne′phesh] a sibibiag.”—Genesis 2:7.

Ti Hebreo a sao a ne’phesh a naipatarus a “kararua,” kayuloganna ti ‘agang-anges a parsua.’ Idi pinarsua ti Dios ni Adan, saan nga imortal a kararua ti inkabilna iti bagi ni Adan no di ket puersa ti biag, a masustiner babaen ti panaganges. No kasta, kas ipakita ti Biblia, ti “kararua” tukoyenna ti pakabuklan ti sibibiag a tao. No mapukaw ti puersa ti biag nga inted ti Dios, matay ti kararua.—Genesis 3:19; Ezequiel 18:20.

Gapu iti doktrina nga imortal ti kararua, timmaud dagitoy a saludsod: Sadino ti papanan dagiti kararua kalpasan ti ipapatay? Ania ti mapasamak iti kararua dagiti nadangkes? Idi a dagiti agkunkuna a Kristiano inawatda ti di umiso a sursuro a ti kararua ket imortal, dayta ti nangituggod kadakuada a mangawat iti sabali pay a di umiso a sursuro—ti umap-apuy nga impierno.

Idiligyo dagitoy a bersikulo ti Biblia: Eclesiastes 3:19; Mateo 10:28; Aramid 3:23