NO KAKASKASARYO pay laeng, mapaspasaranyo kadi dagita a problema? Agparang kadi a nakapataud ti asawam kadagiti pagkapuyan ken saan a nasayaat nga ugali nga awan met idi agin-innaremkayo pay? Ania ti aramidem tapno maksayan dagiti “inaldaw a problema a mapaspasaran dagiti naasawaan”?—1 Corinto 7:28, Today’s English Version.

Umuna, saanmo a namnamaen a gapu ta nagkinnarikayo idi nagkasarkayo, agbalinkayon nga eksperto maipapan iti panagasawa. Nalabit a nasigokayo a makilangen idi balasang ken barokayo pay, ket mabalin a napasayaatyo dayta bayat nga agin-innaremkayo. Ngem ita ta agassawakayon, masubok dagita a kinasigo kadagiti baro a pamay-an ken nalabit kasapulan a patanorenyo ti dadduma pay a paglaingan. Agkamalikayto kadi? Sigurado dayta. Kabaelanyo kadi a patanoren dagiti paglaingan a kasapulanyo? Wen!

Ti panagkonsulta kadagiti eksperto ken ti panangyaplikar iti balakadda ti kasayaatan a pamay-an tapno mapasayaat ti aniaman a paglaingan. No maipapan iti panagasawa, ni Jehova a Dios ti kalaingan ken eksperto, yantangay isu Daydiay nangparsua kadatayo ken nangipaay kadatayo iti tarigagay a mangasawa. (Genesis 2:22-24) Kitaenyo no kasano a makatulong ti Biblia tapno mapagballigian dagiti karit ken mapatanoryo dagiti sumaganad a paglaingan a kasapulanyo, ket iti kasta, mataginayon ti nasayaat a relasionyo nga agassawa uray iti labes ti umuna a tawen.

Ania dagiti karit?

Ni Keiji, * a taga-Japan, malipatanna no dadduma a maapektaran ni baketna kadagiti pangngeddengna. “Inawatko dagiti imbitasion a diak man la kinonsulta ni baketko,” kunana. “Idi agangay, natakuatak a saan gayam a kombiniente kenkuana dagiti nakitulagak.” Kinuna ni Allen a taga-Australia: “Panagriknak, saanak a malalaki no konsultaek pay laeng ni baketko tunggal agdesisionak.” Karit dayta kenkuana gapu iti pannakapadakkelna. Kasta met laeng ti kasasaad ni Dianne, a taga-Britain. Kinunana: “Nairuamak nga agpabalakad iti kapamiliak. Isu nga idi damo, no agdesisionak, dagiti kapamiliak ti pagkonsultaak imbes a ni lakayko.”

Ania ti solusion?

Laglagipem nga ibilbilang ni Jehova dagiti agassawa kas ‘maymaysa a lasag.’ (Mateo 19:3-6) Iti imatangna, awan sabali a kapatgan a relasion iti nagbabaetan dagiti tattao no di ti relasion dagiti agassawa! Nasken ti nasayaat a komunikasion tapno agtalinaed a nalagda ti singgalut ti agassawa.

Adu ti maadal dagiti agassawa no usigenda ti pamay-an ni Jehova a nakikomunikar ken Abraham. Kas pagarigan, pangngaasim ta basaem ti saritaanda a nailanad iti Genesis 18:17-33. Usigem ti tallo a pamay-an a panangpadayaw ti Dios ken Abraham. (1) Inlawlawag ni Jehova ti panggepna nga aramiden. (2) Nagimdeng bayat nga inlawlawag ni Abraham ti kapanunotanna. (3) Agingga a posible, inkabilangan ni Jehova ti kiddaw ni Abraham. Kasanom a suroten ti ulidan ni Jehova no konsultaem ti asawam?

Ania ti karit?

Depende iti naggapuam a pamilia ken kultura, nalabit nairuamka a mangipapilit iti opinionmo ken amangan no makasair pay. Kas pagarigan, ni Liam a taga-Europa, kinunana: “Nakairuaman idiay ayanmi ti nagubsang a panagsasao. Ti kasta a wagas ti panangyebkasko iti riknak ti masansan a pakasairan ni baketko. Masapul a sursuruek ti agbalin a naalumamay.”

  Ania ti solusion?

Dimo ipagarup a kayat ti asawam a makisaritaka kenkuana iti wagas a kas iti nakayugaliam. (Filipos 2:3, 4) Makatulong met kadagiti agdadamo nga agassawa ti balakad ni apostol Pablo iti maysa a misionero. Insuratna: “Ti adipen ti Apo saan a kasapulan a makiapa, no di ket kasapulan nga agbalin a naalumamay.” Iti orihinal a Griego, ti sao a naipatarus a “naalumamay” ket mabalin met nga ipatarus a “nataktika.” (2 Timoteo 2:24) Ti kinataktika isu ti abilidad a mangammo iti kinarikut ti kasasaad ken mangrisut a siaannad iti dayta tapno awan ti masair.

Ania ti karit?

Iti damo, mabalin a saan a nataktika ti panagakem ti asawa a lalaki kas ulo, wenno ti asawa a babai mabalin a saan a nairuam a mangipaay iti singasing iti nataktika a wagas. Kas pagarigan, kinuna ni Antonio a taga-Italia: “No agdesision idi ni tatangko maipapan kadagiti pakaseknan ti pamiliami, pulos a dina konsultaen ni nanangko. Isu nga idi addan asawak, kasla ari ti panangidaulok iti pamiliak idi damo.” Kuna met ni Debbie a taga-Canada: “Kalikagumak a nadalimanek unay ni lakayko. Ngem ad-adda laeng a dinak ikankano gapu iti kinaturayko.”

Ania ti solusion para iti asawa a lalaki?

Para iti dadduma nga assawa a lallaki, ti dinakamat ti Biblia a panagpasakup ti asawa a babai iti lakayna ket awan nakaidumaanna iti panagtulnog ti anak iti nagannakna. (Colosas 3:20; 1 Pedro 3:1) Ngem kunaen ti Biblia a ti asawa a lalaki ket “makitiponto iti asawana, ket dagiti dua maymaysadanton a lasag”; saan a kasta ti kunaen ti Biblia maipapan iti nagannak ken ti anakna. (Mateo 19:5) Ti asawa  a babai ket dineskribir ni Jehova kas komplimento wenno kadua ni lakayna. (Genesis 2:18) Saanna a pulos a tinukoy ti anak kas komplimento wenno kadua ti nagannak. Ania ti panagkunam—no ti asawa a lalaki tratuenna ni baketna kas maysa nga ubing, raraemenna kadi ti urnos iti panagasawa?

Kinapudnona, idagdagadag ti Sao ti Dios a tratuem ti asawam a babai iti wagas a kas iti panangtrato ni Jesus iti kongregasion Kristiano. Nalaklaka ti panangibilang kenka ni baketmo kas ulona no (1) saanmo a namnamaen a dagus ken di agkamali iti panangipakitana ti panagpasakupna kenka ken (2) ayatem kas iti bukodmo a bagi, uray no tumaud dagiti parikut.—Efeso 5:25-29.

Ania ti solusion para iti asawa a babai?

Bigbigem a ni lakaymo itan ti ulom a dinutokan ti Dios. (1 Corinto 11:3) Padpadayawam ti Dios no padpadayawam ni lakaymo. No laksidem ti kinaulona, ipakpakitam no ania ti panangmatmatmo saan laeng a ken lakaymo no di ket iti Dios ken kadagiti kalikagumanna.—Colosas 3:18.

No pagsaritaanyo dagiti parikut, sursuruem nga atakaren ti parikut saan ket a ti kababalin ni lakaymo. Kas pagarigan, adda kinaawan hustisia a kayat ni Reyna Ester nga ilinteg ti asawana a ni Ari Asuero. Imbes nga atakarenna a mismo ti asawana, sitataktika nga inyebkasna ti riknana. Immanamong ni lakayna iti singasingna ket idi agangay inaramid ti ari ti umiso. (Ester 7:1-4; 8:3-8) Ad-adda nga ayatennaka ni lakaymo no (1) ipaayam iti tiempo tapno masursurona a naimbag ti baro nga akemna kas ulo ti pamilia ken (2) tratuem a siraraem, uray no makaaramid iti biddut.—Efeso 5:33.

Ti panagsursuro a mangtaginayon iti naragsak, balanse a relasion kas agassawa ket umasping iti panagsursuro nga agbisikleta. Namnamaem a matumbaka sagpaminsan bayat a sumaysayaat ti kompiansam nga agbisikleta. Kasta met, rumbeng a namnamaem a makaaramidka kadagiti nakababain a kamali bayat nga umad-adu ti kapadasam kas asawa.

Dimo liplipatan ti agangaw. Ikabilangam a naimbag dagiti pakaseknan ti asawam, ngem sursuruem a katawaan dagiti kamalim. Dimo palabsen dagiti gundaway a mabalinmo a paragsaken ti asawam bayat ti umuna a tawenyo kas agassawa. (Deuteronomio 24:5) Kangrunaan iti amin, agpaiwanwankayo nga agassawa iti Dios. No aramidenyo dayta, tinawen a bumileg ti singgalutyo kas agassawa.