Ania ti Epekto Dagiti Nakristianuan a Sursuro iti Komunidad?

NAAMMUANTAYO kadagiti immuna nga artikulo no apay a saan a makipaset iti politika dagiti pudno a Kristiano. Kasano ngarud a maipakitada nga interesadoda a mangpasayaat iti komunidad a pagnanaedanda? Ti maysa a pamay-an ket ti panangtungpalda iti bilin ni Jesus: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.”​—Mateo 28:19, 20.

Adda pagnaigan ti panangannurot iti bilin ni Jesus a “mangaramid iti ad-adalan” ken ti panangtungpal iti bilinna nga agbalin a kas iti asin ken lawag iti lubong. (Mateo 5:13, 14) Kasano a kasta? Ken ania ti mabalin nga epekto dayta kadagiti tattao?

Mensahe ni Kristo​—Makapreserba ken Makaipaay iti Lawag

Makapreserba ti asin ta lapdanna ti pannakaperdi ti taraon. Kasta met ti mabalin nga epekto ti mensahe nga imbilin ni Jesus nga idanon dagiti pasurotna kadagiti tattao. No awaten ken iyaplikarda ti pannursuro ni Jesus, arigna mapreserba ti biagda. Kasano? Masursuroda a liklikan ti ar-aramid a makadadael iti salun-at, kas iti panagsigarilio. Mapatanorda met dagiti naimbag a kababalin a kas iti ayat, kinatalna, mabayag a panagitured, kinamanangngaasi, ken kinaimbag. (Galacia 5:22, 23) Gapu kadagita a kualidad, dakkel ti maitulongda iti komunidad. Makaipaay dagiti Kristiano iti pagsayaatan  ti komunidadda babaen ti panangipakaammoda iti makapreserba a mensahe iti padada a tao.

Ania met ti kaipapanan ti panagbalin dagiti Kristiano kas “lawag”? No kasano nga iyanninaw ti bulan ti lawag a nagtaud iti init, iyanninaw met dagiti pasurot ni Kristo ti “lawag” nga agtaud ken Jehova a Dios. Iyan-anninawda dayta babaen ti panangasabada ken iti naimbag nga ar-aramidda.​—1 Pedro 2:12.

Impaganetget pay ni Jesus ti pagpadaan ti panagbalin a lawag ken ti panagbalin nga adalan idi kinunana: “Gangtan ti tattao ti maysa a pagsilawan ket ikabilda dayta, saan nga iti sirok ti pagsukat a labba, no di ket iti pagsaadan ti silaw, ket silnaganna amin dagidiay adda iti balay. Kasta met agsilnag koma ti silawyo iti sanguanan ti tattao.” Nalawag a makita ti lampara a naikabil iti pagsaadan ti silaw. Masapul met koma a nalawag a makita dagiti tattao ti panangasaba ken naimbag nga ar-aramid dagiti pudno a Kristiano. Apay? Tapno dagidiay makakita iti naimbag nga ar-aramidda idaydayawda ti Dios, imbes a dagiti Kristiano.​—Mateo 5:14-16.

Responsabilidad ti Amin a Kristiano

Idi kinuna ni Jesus, “Dakayo ti silaw ti lubong” ken “agsilnag koma ti silawyo,” tuktukoyenna ti amin nga adalanna. Saan a maitungpal dayta ti sumagmamano laeng nga indibidual iti nadumaduma a relihion. Imbes ketdi, ti amin a manamati ket “lawag.” Pito a milion itan a Saksi ni Jehova, nga agnanaed iti nasurok a 235 a pagilian, ti mamati a responsabilidadda a pakaammuan ti padada a tao maipapan iti mensahe a kayat ni Kristo nga ipakaammo dagiti pasurotna.

Maipapan iti ania ti ikaskasaba dagiti Saksi ni Jehova? Idi imbaonna dagiti adalanna a mangasaba, dina imbilin nga ikasabada ti pannakabalbaliw ti kagimongan wenno ti napolitikaan a kasasaad, panagkadua ti Relihion ken ti Gobierno, wenno aniaman a kapanunotan dagiti tattao. Imbes ketdi, impadtona: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion.” (Mateo 24:14) Kas panagtulnogda iti bilin ni Jesus, itultuloy ngarud nga ipakaammo dagiti pudno a Kristiano ti Pagarian ti Dios iti padada a tao. Dayta ti kakaisuna a gobierno a makapagpatingga iti dakes a lubong ni Satanas ken mangyeg iti nalinteg a baro a lubong.

Kinapudnona, no basaentayo ti salaysay dagiti Ebanghelio, nalawag a makitatayo iti ministerio ni Jesus ti dua a banag nga ar-aramiden ita dagiti pudno a Kristiano. Dagitoy ti mausig iti sumaganad nga artikulo.

[Blurb iti panid 8]

Kasano a ti mensahe dagiti Kristiano maipada iti asin?

[Blurb iti panid 9]

Kasano a ti mensahe ni Kristo maipada iti silaw iti kasipngetan?