Adda. Iti intero a lubong, minilion ti babbai a ministro dagiti Saksi ni Jehova. Dakkel a bunggoy dagiti babbai a mangikaskasaba iti naimbag a damag ti Pagarian ti Dios. Impadto ti Salmo 68:11 maipapan kadagitoy a ministro: “Ni met laeng Jehova ipaayna ti sasao; dagiti babbai a mangibagbaga iti naimbag a damag ket dakkel a buyot.”

Ngem, adda dakkel a nagdumaan ti ministerio dagiti babbai a Saksi ni Jehova ken kadagiti babbai a miembro ti klero ti dadduma a relihion. Ania dayta?

Nagduma dagiti tattao a dumngeg iti ministerioda. Dagiti klero a babbai, nangruna iti Kakristianuan, mangidauloda iti uneg ti kongregasionda ket dagiti miembro ti relihionda ti kaaduan a dumngeg kadakuada. Dagiti babbai a ministro dagiti Saksi ni Jehova, kaaduan dagiti adda iti ruar ti kongregasion ti dumngeg iti panangasabada. Kayatna a sawen, dagiti tattao a masarakanda iti ministerioda a panagbalaybalay ken iti sadinoman.

Naiduma met ti ar-aramiden dagiti babbai a ministro dagiti Saksi ni Jehova no idilig iti sabali a relihion. Dagiti babbai a klero ti Kakristianuan ken dadduma pay a relihion, idaulo ken isuroda dagiti doktrina ti relihionda kadagiti miembro ti kongregasionda. Ngem dagiti babbai a ministro dagiti Saksi ni Jehova, saanda a mangisuro iti kongregasion no adda dagiti bautisado a lallaki. Dagiti laeng lallaki a nadutokan ti mangisuro.​—1 Timoteo 3:2; Santiago 3:1.

Deskribiren ti Biblia a dagiti laeng lallaki ti naikkan iti annongen a mangaywan iti kongregasion. Utobem ti imbaga ni apostol Pablo idi sinuratanna ti padana a manangaywan a ni Tito: “Gapu itoy a rason imbatika idiay Creta, tapno . . . makadutokka kadagiti lallakay iti tunggal siudad.” Innayon ni Pablo a ti tunggal nadutokan a lalaki masapul a “siwayawaya iti pammabasol, asawa ti maymaysa a babai.” (Tito 1:5, 6) Nangted ni Pablo iti kasta met laeng nga instruksion ken Timoteo idi sinuratanna maipapan iti urnos ti kongregasion: “No ti asinoman a lalaki ragragpatenna ti akem a manangaywan, tartarigagayanna ti nasayaat nga aramid. Ti manangaywan rebbeng ngarud nga awanan pakababalawan, asawa ti maymaysa a babai, . . . kualipikado a mangisuro.”​—1 Timoteo 3:1, 2.

Apay a lallaki laeng ti naikkan iti annongen a mangaywan iti kongregasion? Kuna ni Pablo: “Saanko nga ipalubos a ti babai mangisuro, wenno mangwatwat iti autoridad iti lalaki, no di ket agulimek koma. Ta ni Adan nabukel nga umuna, kalpasanna ni Eva.” (1 Timoteo 2:12, 13) Gapuna, ti panagsasaruno ti panamarsua ipasimudaagna no apay nga inted ti Dios kadagiti lallaki ti annongen a mangisuro ken mangaywan.

Dagiti ministro ni Jehova tuladenda ti ulidan ti Liderda a ni Jesu-Kristo. Insurat ni adalan a Lucas ti maipapan iti ministerio ni Jesus: “Napan nagbambaniaga iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios.” Idi agangay, imbaon met ni Jesus dagiti pasurotna a mangasaba: “Napanda iti teritoria iti pinuronpurok, a mangidekdeklara ti naimbag a damag.”​—Lucas 8:1; 9:2-6.

Iti kaaldawantayo, dagiti lallaki ken babbai a ministro ni Jehova, aktiboda a mangitungtungpal iti impadto ni Jesus: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.”​—Mateo 24:14.