Nagbiag iti adu a siglo ti immuna a tao a ni Adan. Ngem idi agangay limmakay ken natay. Sipud idin, inkagumaan dagiti tattao a lapdan ti panaglakay. Ngem awan ti asinoman a makaliklik ken patay. Apay? Limmakay ken natay ni Adan gapu ta sinukirna ti bilin ti Dios. Lumakay wenno bumakettayo gapu ta natawidtayo ken Adan ti basol ken ti supapakna nga ipapatay.—Basaem ti Genesis 5:5; Roma 5:12.

Tapno matagiragsaktayo ti biag nga agnanayon, masapul nga adda mangsubbot kadatayo. (Job 33:24, 25) Ti subbot ket gatad a maibayad tapno mawayawayaan ti maysa a tao. Iti biangtayo masapul a mawayawayaantayo manipud ipapatay. (Exodo 21:29, 30) Natay ni Jesus tapno masubbottayo.—Basaem ti Juan 3:16.

Saan nga amin ket mawayawayaan iti sakit ken panaglakay. Kinapudnona, dagiti tattao nga agsukir iti Dios, kas iti inaramid ni Adan, ket mapukawda ti pribilehio nga agbiag. Dagiti laeng tattao a napakawan ti basolda ti agbiag nga agnanayon.—Basaem ti Isaias 33:24; 35:3-6.

Tapno mapakawantayo, masapul nga agtignaytayo. Am-ammuentayo ti Dios babaen ti panagadal iti Saona, ti Biblia. Isuro dayta kadatayo no kasanotayo a matagiragsak ti nasaysayaat a biag, magun-od ti anamong ti Dios ken ti biag nga agnanayon.—Basaem ti Juan 17:3; Aramid 3:19.