Nabayagen a pinarsua ni Jehova a Dios dagiti minilion nga anghel sakbay pay a pinarsuana ti tao. (Job 38:4, 7) Dagiti anghel ket nabileg nga espiritu a parsua nga agserserbi iti Dios. No dadduma, ibaonna ida a mangidalan ken mangsalaknib kadagiti adipenna ditoy daga. (Salmo 91:10, 11) Tultulongan ita dagiti anghel dagiti tattao tapno maammuanda ti naimbag a damag nga ikaskasaba dagiti pasurot ni Jesus.—Basaem ti Apocalipsis 14:6, 7.

Rumbeng kadi nga agkararagtayo kadagiti anghel? Saan. Ti kararag ket maysa a wagas ti panagdayaw nga agpaay laeng iti Dios. (Apocalipsis 19:10) Yantangay dagiti anghel ket adipen ti Dios, tungtungpalenda ti bilinna saan ket a ti bilin dagiti tattao. Gapuna, ti Dios laeng ti rumbeng a pagkararagantayo babaen ken Jesus.—Basaem ti Salmo 103:20, 21; Mateo 26:53.

Kas iti tao, naparsua dagiti anghel nga addaan iti wayawaya nga agpili ken wayawaya a mangaramid iti naimbag ken dakes. Nakalkaldaang ta adu nga anghel ti nagrebelde iti Dios. (2 Pedro 2:4) Ni Satanas ti immuna kadakuada a sinurot ti dadduma ket nagbalinda a demonio. Idi agangay, napapanaw ni Satanas ken dagiti demoniona idiay langit ken naitappuakda ditoy daga.—Basaem ti Apocalipsis 12:7-9.

Ti umad-adu a kinadakes ken kinaranggas sipud 1914 ti mangipakita nga asidegen a dadaelen ti Dios ni Satanas ken dagiti demoniona. Kalpasanna, isublinto ti Dios ti napintas a kasasaad ti daga.—Basaem ti Apocalipsis 12:12; 21:3, 4.