Agingga a posible, masansan nga agsarita dagiti nasinged nga aggayyem iti man personal, wenno babaen ti telepono, e-mail, video, wenno surat. Gapuna, tapno agbalintayo a nasinged iti Dios, masapul a regular a makisaritatayo kenkuana. Ngem kasano?

Mabalintayo ti makisarita ken Jehova babaen ti kararag. Ngem saan a kasla gagangay a pannakisarita daytoy iti maysa a kaedad. Laglagipentayo a no agkararagtayo, makisarsaritatayo iti Namarsua, ti Kangatuan iti uniberso isu a rumbeng nga addaantayo iti nauneg a panagraem ken panagdayaw. Tapno denggen ti Dios dagiti kararagtayo, masapul met a tungpalentayo dagiti kalikagumanna. Adtoy ti tallo kadagita.

Umuna, masapul nga agkararagtayo laeng ken Jehova a Dios—saan a ken Jesus, iti maysa a “santo,” wenno imahen. (Exodo 20:4, 5) Nalawag a kuna ti Biblia: “Iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios.” (Filipos 4:6) Maikadua, masapul nga ipadanontayo dagiti kararagtayo iti nagan ti Anak ti Dios, ni Jesu-Kristo. Kuna ni Jesus: “Awan ti umay iti Ama malaksid no baeten kaniak.” (Juan 14:6) Maikatlo, masapul a maitunos dagiti kararagtayo iti pagayatan ti Dios. Kuna ti Biblia: “Uray ania ti dawatentayo maitunos iti pagayatanna, denggennatayo.” *—1 Juan 5:14.

Siempre, di agbayag ti nasinged a relasion no maysa laeng ti agsasao. No kasano a maragsakan dagiti aggayyem nga agsinsinnarita, palubosantay met a kasaritanatayo ti Dios ken dumngegtayo kenkuana. Kasano a makisarsarita ti Dios kadatayo?

“Makisarsarita” kadatayo ni Jehova babaen ti naisurat a Saona, ti Biblia. (2 Timoteo 3:16, 17) Kasano a kasta? Ipapanmo a nakaawatka iti surat ti nasinged a gayyemmo. Kalpasan a nabasam, mabalin a maragragsakanka a mangibaga iti sabsabali, “Kuna ti gayyemko!” Ngem saan met nga agsasao no di ket nagsurat. Iti umasping a pamay-an, no basbasaem ti Biblia, palpalubosam ni Jehova a makisarita kenka. Kuna ni Gina a nadakamat iti immuna nga artikulo, “Panagkunak, no kayatko nga ibilangnak ti Dios a gayyemna, masapul a sukimatek ti ‘suratna’ kadatayo—ti Biblia.” Innayonna, “Ad-adda a simmingedak iti Dios gapu iti inaldaw a panagbasak iti Biblia.” Palpalubosam kadi a kasaritanaka ni Jehova iti kada aldaw babaen ti inaldaw a panagbasam iti Saona, ti Biblia? Makatulong dayta tapno nasingsingedka iti Dios.