Nayanakak iti Baku, Azerbaijan. Duakami laeng nga agkabsat ket siak ti buridek. Muslim ni Daddy, ken Judio ni Mommy. Agin-innayatda ken raemenda ti pammati ti tunggal maysa. Suportaran ni Mommy ti panagayunar ni Daddy tunggal Ramadan. Suportaran met ni Daddy ti panangselebrar ni Mommy iti Paskua. Adda Koran, Torah, ken Biblia iti pagtaenganmi.

Ibilangko ti bagik a Muslim. Diak pulos pagduaduaan ti kaadda ti Dios ngem maburiboranak kadagitoy a saludsod, ‘Apay a pinarsua ti Dios dagiti tattao, ken apay a masapul nga agsagaba ti maysa iti intero a panagbiagna no matutuokto met laeng iti agnanayon idiay impierno?’ Kuna ti dadduma a pagayatan ti Dios ti amin a mapaspasamak isu a pinampanunotko, ‘Ik-ikkannatayo kadi ti Dios kadagiti problema sa maay-ayatan a mangbuybuya iti panagsagabatayo?’

Agtawenak pay laeng idi iti 12, agkarkararagakon iti namaz, ti lima a seremonial a kararag dagiti Muslim iti inaldaw. Iti dayta met la a tiempo, ni Daddy pinagbasanakami ken manangko iti eskuelaan dagiti Judio. Karaman kadagiti subject-mi ti pannakaisuro dagiti tradision iti Torah, ken ti lengguahe a Hebreo. Kada aldaw sakbay ti klase, agkararagkami maitunos iti tradision dagiti Judio. Isu nga iti bigat, agkararagak iti namaz iti balaymi, sa inton addaak iti eskuelaan, makipagkararagak kadagiti Judio.

Kasapulak unay dagiti lohikal a sungbat dagiti saludsodko. Maulit-ulit a damdamagek kadagiti rabbi iti eskuelaan: “Apay a pinarsua ti Dios dagiti tattao? Ania ti panangmatmat ti Dios ken Daddy a maysa a Muslim? Nasingpet a tao, ngem apay nga ibilangna a narugit? Apay ngarud a pinarsuana?” Di nainkalintegan ken saan a makakombinsir ti sumagmamano a sungbatda kadagiti saludsodko.

Napukaw ti pammatik iti Dios idi 2002. Makalawas laeng sipud immakarkami iti Germany, naistrok ni Daddy ket na-comatose. Adu  a tawen nga inkarkararagko ti salun-at ken pagimbagan ti pamiliami. Gapu ta kombinsidoak a ti laeng Mannakabalin-amin ti nabilbileg ngem iti biag ken ipapatay, inaldaw nga ikarkararagko nga umimbag koma ni Daddy. Pampanunotek, ‘Bassit la a banag iti Dios a patganna ti naimpusuan a kiddaw ti maysa nga ubing.’ Masiguradok a sungbatanna dagiti kararagko. Ngem natay ni Daddy.

Naupay ken nasdaawak gapu ta kasla saan a maseknan ti Dios. Napampanunotko, ‘Mabalin a saan nga umiso ti panagkararagko, wenno awan ti Dios.’ Nariribukanak ken diakon makapagkararag iti namaz. Saanak a mamati iti dadduma a relihion, isu nga impagarupko nga awan ti Dios.

Kalpasan ti innem a bulan, adda simmarungkar a Saksi ni Jehova iti balaymi. Gapu ta bassit ti panagraemmi iti Kristianidad, kayatmi a paneknekan ken manangko iti nadayaw a pamay-an a saanda nga umiso. Dinamagmi: “Apay nga agdaydayaw dagiti Kristiano ken Jesus, ken Maria, iti krus, ken iti dadduma pay nga idolo idinto ta maikontra dayta iti Sangapulo a Bilin?” Impakita dagiti Saksi manipud iti Kasuratan ti makakombinsir a pammaneknek a maiparit kadagiti pudno a Kristiano ti panagdayaw kadagiti idolo ken masapul a direkta nga agkararagda laeng iti Dios. Nasdaawak iti dayta.

Kalpasanna, sinaludsodmi: “Mamatikayo kadi iti Trinidad? No ni Jesus ket Dios, apay a nagbiag ditoy daga ken pinatay dagiti tattao?” Simmungbatda manen manipud iti Biblia ken inlawlawagda a ni Jesus ket saan a Dios ken saan a makipada Kenkuana isu a saan a mamati dagiti Saksi iti Trinidad. Nasdaawak ken napanunotko, ‘Talaga a naidumduma dagitoy a Kristiano.’

Kayatko met a maammuan no apay a matay dagiti tattao ken no apay nga ipalpalubos ti Dios ti panagsagaba. Impakita dagiti Saksi ti libro a Pannakaammo a Mangiturong iti Biag nga Agnanayon, * nga addaan kadagiti kapitulo a mangilawlawag kadagiti saludsodko. Inyadalandak a dagus iti Biblia.

Kada panagadal, adda maammuak a nainkalintegan a sungbat ti Biblia kadagiti saludsodko. Naammuak a Jehova ti nagan ti Dios. (Salmo 83:18) Ti kangrunaan a kualidadna ket di agimbubukodan nga ayat. (1 Juan 4:8) Pinarsuana dagiti tattao gapu ta kayatna nga iburay ti sagut a biag. Naawatak a nupay ipalpalubos ti Dios ti kinaawan hustisia, kagurana dayta ket dandaninan ikkaten iti agnanayon. Naammuak a makadadael ti epektona iti sangatauan ti panagrebelde da Adan ken Eva. (Roma 5:12) Karaman kadagiti nakalkaldaang nga imbungana ket ti ipapatay dagiti ipatpateg iti biag, kas iti napasamak ken Daddy. Ngem ikkatento ti Dios dagiti kasta a trahedia iti um-umayen a baro a lubong, a pagungaranto dagiti natay.—Aramid 24:15.

Pinennek ti Biblia ti pannakawawko iti kinapudno isu a mamatiak manen iti Dios. Ad-adda a naam-ammok dagiti Saksi ni Jehova ket nabigbigko a sangalubongan ti panagkakabsatda. Apresiarek unay ti panagkaykaysa ken panagiinnayatda. (Juan 13:34, 35) Gapu kadagiti nasursurok maipapan ken Jehova, natignayak nga agserbi kenkuana isu nga inkeddengko ti agbalin a Saksi ni Jehova. Nabautisaranak idi Enero 8, 2005.

Ti makakombinsir a lohika ti Biblia pinasayaatna ti intero a panangmatmatko iti biag. Naaddaanak iti talna ti panunot gapu kadagiti mapagtalkan a panangilawlawag ti Sao ti Dios. Naragsakan ken naliwliwaak iti namnama a makitakto manen ni Daddy inton panagungar nga ikarkari ti Sao ti Dios.—Juan 5:28, 29.

Innem a tawenen ti naragsak a panagasawami ken Jonathan a maysa a managbuteng iti Dios. Naammuanmi a lohikal ken simple ti kinapudno maipapan iti Dios, ken di magatadan dayta a gameng. Dayta ti rason a maragragsakankami a mangiranud iti sabsabali ti pammati ken nakaskasdaaw a namnamami. Ammok itan a dagiti Saksi ni Jehova ket saan a “naidumduma” no di ket pudnoda a Kristiano.