Nailadawan ti ulo ti pamilia a ni Job kas “awan pakababalawanna ken nalinteg.” (Job 1:1) Naawagan met ni Lot a “nalinteg a tao.” (2 Pedro 2:8) Ken naikuna nga inaramid ni David ti “umiso” iti imatang ti Dios. (1 Ar-ari 14:8) Ngem adalentayo a naimbag ti maipapan kadagita a karakter ti Biblia. Makitatayonto a (1) nagkamalida met, (2) adu ti maadaltayo iti ehemploda, ken (3) posible a maparagsak dagiti imperpekto a tattao ti Dios.

Adu ken agsasaruno dagiti napasaran ni Job a rigat a kasla saanna a pakaikarian. Kamali ti impagarupna a saan a napateg iti Dios no agtalinaed isuna a matalek wenno saan. (Job 9:20-22) Kombinsido unay ni Job a nalinteg isuna a para iti dadduma, kasla ibagbagana a nalinlinteg isuna ngem iti Dios.—Job 32:1, 2; 35:1, 2.

Saan a dagus a sinurot ni Lot ti nalawag ken simple nga instruksion. Mariribukan unay iti nakaro nga immoral a biag dagiti taga-Sodoma ken Gomorra,  nga uray la “matutuok idi ti nalinteg a kararuana.” (2 Pedro 2:8) Impakaammo ti Dios a panggepna a dadaelen dagita a nagdakes a siudad ken inikkanna ni Lot ken ti pamiliana iti gundaway a maisalakan. Nangibaon kadagiti anghel a mangaramid iti dayta. Mabalin a mapanunotmo a ti maprobproblemaan a ni Lot ti umuna koma a pumanaw iti siudad. Ngem iti daytoy a kritikal a kanito, saan a dagus a nagtignay. Kasapulan pay la nga iggaman dagiti anghel ti ima ni Lot ken ti pamiliana sa iruar ida iti siudad tapno saanda a mairaman a madadael.—Genesis 19:15, 16.

Naminsan, saan a nakapagteppel ni David isu a nakaaramidda ken ni Batseba—asawa ti sabali a lalaki—iti seksual nga immoralidad. Dakdakes pay ta impapatayna ti asawa ni Batseba tapno makalubanna koma ti basolna. (2 Samuel, kapitulo 11) Kuna ti Biblia a ti inaramid ni David ket “dakes kadagiti mata ni Jehova.”—2 Samuel 11:27.

Wen, nakaaramid met iti kamali da Job, Lot, ken David. Nadagsen pay ketdi a basol ti dadduma kadagita. Ngem kas makitatayto, kayatda ti agtulnog ken agdayaw iti Dios iti amin a pusoda. Nakasaganada nga agbabawi ken agbalbaliw no kasapulan. Isu a kaay-ayo ida ti Dios, ken tinukoy ida ti Biblia kas matalek a lallaki.

Gapu ta imperpektotayo, agkamalitayo latta. (Roma 3:23) Ngem no agkamalitayo, masapul nga ipakitatayo nga agbabbabawitayo ken kalpasanna, aramidentayo ti amin tapno mailintegtayo dayta.

Kasano nga inlinteg da Job, Lot, ken David dagiti nagkamalianda? Kinaagpaysuanna, matalek a tao ni Job. Kalpasan nga inlawlawag ti Dios dagiti bambanag, binalbaliwanna ti saan a husto  a kapanunotanna ken pinagbabawyanna ti imbagana. (Job 42:6) Imbilang ni Lot a dakes ti immoral a panagbiag dagiti taga-Sodoma ken Gomorra ket maitunos dayta iti moral a prinsipio ti Dios. Ti laeng problema ket saanna a narikna ti kinaimportante ti dagus a panagtignay. Ngem pinanawanna met laeng dagita a nagdakes a siudad isu a naisalakanda iti panangdadael ti Dios. Kas panagtulnog, saanna a tinaltaliaw dagiti pinanawanna. Nupay nadagsen a basol ti panangsukir ni David iti linteg ti Dios, impakitana ti pudno a linaon ti pusona idi naimpusuan a nagbabawi ken nagpakaasi a pakawanen ti Dios.—Salmo 51.

Gapu ta rasonable ti eks-ekspektaren ti Dios kadagiti imperpekto a tattao, imbilangna a nalinteg dagita a lallaki. “Pagaammona unay ti pannakapormatayo, a laglagipenna a tapoktayo.” (Salmo 103:14) Isu a no ammo ti Dios nga amintayo ket agkamali, ania ngarud ti eks-ekspektarenna kadatayo?

Makatulong ti balakad ni David iti anakna a ni Solomon tapno maammuantayo no kasanotayo a maparagsak ti Dios. “Sika, Solomon nga anakko, ammuem ti Dios ni amam ket agserbika kenkuana buyogen ti naan-anay a puso.” (1 Cronicas 28:9) Ania ti naan-anay a puso? Maysa dayta a puso a mangay-ayat iti Dios ken determinado a mangammo ken mangaramid iti pagayatanna. Saan a perpekto dayta a puso, ngem kayatna ti agdayaw ken agtulnog iti Dios ken nakasagana nga umawat iti panangilinteg wenno panangkorehir. Gapu ta ay-ayatenda ti Dios ken kayatda ti agtulnog kenkuana, imbilang ti Dios ni Job nga “awan pakababalawanna,” ni Lot kas “nalinteg,” ken ni David kas ‘agar-aramid laeng iti umiso’ iti imatangna. Uray no nagkamalida, naparagsakda latta ti Dios.

No ngarud adda dagiti dakes a napanunottayo a ditay koma kayat a sumrek iti isiptayo, adda nakababain a naibagatayo, wenno adda naaramidtayo a nabigbigtayo idi agangay a saan gayam a nasayaat, ditay koma maup-upay. Maparegtatayo kadagiti kapadasan da Job, Lot ken David. Ammo ti Dios a saan pay a posible nga agbalintayo a perpekto ita. Ngem eks-ekspektarenna nga ayatentayo isuna ken ikarigatantayo ti agtulnog kenkuana. No aramidentayo dayta nga addaan iti naan-anay a puso, masiguradotayo a posible a maparagsaktayo met ti Dios.