Mabalin nga awanen ti ad-adda pay a pakabigbiganmi no di ti nasaknap a trabahomi a panangasaba—iti binalaybalay, kadagiti publiko a luglugar, ken iti sadinoman nga ayan dagiti tattao. Apay nga ar-aramidenmi dayta a trabaho?

Mangaskasaba dagiti Saksi ni Jehova tapno idaydayawda ti Dios ken ipakaammoda ti naganna. (Hebreo 13:15) Kayatmi met a suroten ti imbilin ni Kristo Jesus: “Inkayo ngarud ket mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo.”—Mateo 28:19, 20.

Kasta met, ay-ayatenmi ti padami a tao. (Mateo 22:39) Siempre, ammomi nga addan bukod a relihion ti kaaduan ken saan nga amin ket interesado iti mensahemi. Ngem patienmi a makasalbar iti biag dagiti isursuro ti Biblia. Dayta ti rason nga itultuloymi ti ‘awan sarday a panangisuro ken panangideklara iti naimbag a damag maipapan iti Kristo’ kas iti inaramid dagiti Kristiano idi umuna a siglo.—Aramid 5:41, 42.

Saan a Saksi ni Jehova ti kaaduan nga agbasbasa kadagiti publikasionmi. Kasta met, sabali ti relihion ti minilion a makipagad-adal iti Biblia kadakami. Ngem agyamyamanda unay ta bumisbisita dagiti Saksi ni Jehova kadakuada.

Siempre, mabalin nga adda pay dagiti saludsodmo maipapan kadagiti Saksi ni Jehova. Tapno masungbatan dagita, awisendaka nga

• Agsaludsod iti maysa kadagiti Saksi ni Jehova.

• Bumisita iti website-mi a www.mt1130.com/ilo.

• Umay kadagiti gimongmi a libre ken para iti amin.