•   “Inreport ti China nga ita a tawen ti nairekord a ‘kapupudotan’ ken maikatlo a kamamagaan a kalgaw wenno summer.”—The Guardian, Septiembre 7, 2022.

•   “Ti naipakpakauna a nakaro a tikag iti dadduma a paset ti Africa ket agtultuloy iti maikalima a tawen.”—UN News, Agosto 26, 2022.

•   “Agpegpeggad iti nakaro a tikag ti nasurok a kagudua a paset ti Europa, ken mabalin a dayta ti kakaruan pay laeng a tikag iti uneg ti 500 tawen.”—BBC News, Agosto 23, 2022.

 Impakpakauna ti adu nga eksperto nga agtultuloy dagita a tikag ken kumarkaro pay. Sumayaatto pay kadi ti masakbayantayo? Ania ti ibaga ti Biblia?

 Impakpakauna ti Biblia nga iti kaaldawantayo:

•   ‘Addanto bisin iti nadumaduma a lugar.’—Lucas 21:11.

 Masansan a gapu iti tikag, agkurang ti makan nga agresulta iti bisin. Kaitungpalan ti padto ti Biblia dagiti kasta a kinakurang iti makan, ken ti panagrigrigat ken ipapatay a resultana.—Apocalipsis 6:6, 8.

 Ibaga ti Biblia ti kangrunaan a rason no apay a kumarkaro ti tikag. Kunana:

•   “Saan a naikkan ti tao iti autoridad a mangiturong uray iti addangna.”—Jeremias 10:23.

 Kayatna a sawen, saan nga agballigi dagiti tattao a ‘mangiturong iti addangda’ wenno mangituray iti bagbagida. Dagiti saan a nasayaat a desisionda ket masansan nga agresulta iti tikag ken kinakurang iti danum.

•   Mamati ti kaaduan a sientista a dagiti aktibidad ti tattao ti makagapu iti panagbara ti planetatayo a daga (global warming), nga agresulta iti kumarkaro a tikag iti intero a lubong.

•   Ti kinaagum dagiti tattao ken dagiti paglintegan a saan a naikabilangan ti masakbayan ket nagresulta iti pannakaperdi ti kabakiran, polusion, ken ti saan a naannad a panangusar iti natural a kinabaknang ti daga. Kas resultana, nadadael dagiti pagtataudan ti danum.

 Nupay kasta, adda namnama nga ibagbaga ti Biblia.

 Ikarkari ti Biblia a solbarento ti Dios ti agdama a krisis iti danum. Kasano?

1.  1. Ti Dios ‘dadaelennanto dagidiay mangdaddadael iti daga.’ (Apocalipsis 11:18) Ikkatenna ti maysa a pakaigapuan ti krisis iti danum—dagiti dakes ken naagum a tattao a mangperperdi iti aglawlaw.—2 Timoteo 3:1, 2.

2.  2. “Agbalinto a nadanum ti natikag a daga.” (Isaias 35:1, 6, 7) Tarimaanento ti Dios dagiti nadadael gapu iti tikag ken pagbalinenna daytoy a planeta a paraiso a nasayaat ti pannakapadanumna.

3.  3. “Ay-aywanam ti daga, pagbalinem a nakabungbunga ken nakatabtaba.” (Salmo 65:9) Gapu iti pamendision ti Dios, addanto nakaad-adu a makan ken nadalus a danum para iti amin.