Bigla kadi a nagsakitka iti nakaro? No kasta, ammom no kasano karigat ti agsakit—maguluan ti panunot, maapektaran ti emosion, ken dakkel a gastos. Kasanom a sanguen dayta? Kasanom a tulongan ti agsaksakit a kapamiliam wenno gayyemmo? Uray saan a medikal a libro ti Biblia, addaan kadagiti prinsipio a makatulong kenka tapno maaramidmo ti kasayaatan uray narigat ti situasionmo.

•   Agpadoktorka

   Ti kuna ti Biblia: “Dagiti masakit ti agkasapulan iti doktor, saan a dagiti nasalun-at.”—Mateo 9:12.

   Ti aramidem: Agpadoktorka no kasapulan.

   Padasem: Piliem ti kasayaatan a pamay-an ti pannakaagas. No dadduma, nasaysayaat no agpa-second opinion-ka. (Proverbio 14:15) No agpa-check up-ka, ibagam ti amin a marikriknam. Siguraduem a maawatam ti ibaga dagiti doktor ken maawatanda dagiti ibagam a marikriknam a sintoma. (Proverbio 15:22) Ag-research-ka maipapan iti sakitmo ken ti amin a pamay-an ti pannakaagas. No ammom dagiti posible a mapasamak, mas maisaganam ti emosionmo a mangsango iti situasionmo ken makaaramidka kadagiti nasayaat a desision iti panagpaagasmo.

•   Ag-exercise-ka, manganka iti makapasalun-at, ken kompletuem ti turogmo

   Ti kuna ti Biblia: “Pagsayaatan ti bagi ti panagehersisio.”—1 Timoteo 4:8, Contemporary English Version.

   Ti aramidem: Makatulong no aramidem dagiti makapasalun-at kas iti regular a panag-exercise.

   Padasem: Surotem ti eskediulmo nga ag-exercise, kanayon a manganka kadagiti makapasalun-at, ken kompletuem ti turogmo. No aramidem dagita, uray agad-adjust-ka pay laeng iti sakitmo, dakkel ti maitulongna iti salun-atmo kas kuna dagiti eksperto. Siempre, siguraduem a ti aramidem saanna a pakaruen ti sakitmo ken saanna nga apektaran ti madama a panagpaagasmo.

•   Agpatulongka

   Ti kuna ti Biblia: “Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.”—Proverbio 17:17.

   Ti aramidem: Makatulong dagiti gagayyemmo tapno makayam a sanguen dagiti narigat a situasion.

   Padasem: Makitungtongka iti pagtaltalkam a gayyem a nalakam la a pangibagaan iti marikriknam. Naragragsakka no kua ken makatulong dayta tapno makayam ti stress gapu iti sakitmo. Kayatdaka a tulongan dagiti gagayyem ken kapamiliam ngem baka dida laeng ammo no ania ti aramidenda. Isu nga ibagam no ania dagiti aramidenda a makatulong kenka. Saan koma a sobra ti ekspektarem ken kanayon nga agyamanka iti aniaman a maitulongda. Ngem tandaanam nga uray no kayatdaka a tulongan, mabalin a mabannogka no dadduma iti aramidenda. Isu nga ibagam no mamin-anoda laeng a bumisita ken no kasano kapaut.

•   Agbalinka a positibo

   Ti kuna ti Biblia: “Ti naragsak a puso ket nasayaat nga agas, ngem ti naladingit nga espiritu ibusenna ti pigsa.”—Proverbio 17:22.

   Ti aramidem: No agpokuska kadagiti positibo a banag, makatulong dayta tapno makontrolmo ti emosionmo ket saanka a ma-stress unay iti sakitmo.

   Padasem: Tapno makapag-adjust-ka iti baro a situasionmo, agpokuska kadagiti maaramidam, saan a dagiti banag a dimo kontrolado. Saanmo nga ikompara ti bagim iti dadduma wenno idi awan pay ti sakitmo. (Galacia 6:4) Mangiplanoka kadagiti banag a kayam nga aramiden. Makatulong dayta kenka nga agtalinaed a positibo. (Proverbio 24:10) No kayam, tumulongka iti dadduma. Naragsakka no adda maar-aramidam para iti dadduma ket makatulong dayta tapno saanmo a mapanunot dagiti negatibo a banag.—Aramid 20:35.

 Ipakita ti Biblia a kaya ni Jehova a Dios a a tulongan ti maysa a tao tapno kayana a sanguen ti nakaro a sakit. Uray saan a mangaramid ni Jehova iti milagro tapno paimbagennatayo, it-itedna dagitoy a tulong kadagiti agdaydayaw kenkuana:

 Talna. Ited ni Jehova “ti talna ti Dios a mangartap iti amin a pannakaawat.” (Filipos 4:6, 7) Makatulong daytoy a talna wenno kinakalmado iti maysa a tao tapno saan unay nga agdanag. No agkararagka iti Dios ken ibagam kenkuana dagiti pagdandanagam, ited ti Dios ti kasta a talna.—1 Pedro 5:7.

 Sirib. Ikkannaka ni Jehova iti sirib tapno makaaramidka kadagiti nasayaat a desision. (Santiago 1:5) Agbalin a masirib ti maysa a tao no adalen ken aramidenna dagiti prinsipio ti Biblia a makatulong agingga ita.

 Nagsayaat a namnama iti masakbayan. Ikarkari ni Jehova ti masakbayan nga ‘awanton ti mangibaga: “Masakitak.”’ (Isaias 33:24) Adu ti natulongan dayta a namnama nga agbalin latta a positibo uray nagkaron ti sakitda.—Jeremias 29:11, 12.