Ad-adu itan ti maaw-awat dagiti Saksi ni Jehova a naespirituan a taraon iti digital format. Ngem iti adu a paset ti lubong, awan ti koneksion dagiti kakabsat iti Internet ta nangina dayta. Aggigian met ti dadduma iti lugar a kanayon nga agpukaw ti Internet, nabuntog, wenno awan pay ketdi.

 Ngem makai-download itan ti adu a kakabsattayo kadagiti digital a publikasion uray awan ti koneksionda iti Internet! Kasano a posible dayta?

 Adda bassit a box a maawagan iti JW Box a naipaay kadagiti kongregasion a limitado ti koneksionna iti Internet. Addaan dayta iti router a nagatang iti maysa a kompania, software nga inaramid ti Computer Department iti Bethel, ken dagiti digital a publikasion ken video nga available iti jw.org. Agarup ₱3,750 ($75 U.S.) ti bayad ti maysa.

 Iti Kingdom Hall, ikonek dagiti kakabsat dagiti gadyetda iti JW Box babaen iti wifi sa ag-download-da kadagiti publikasion ken video. Makakonek latta uray dagiti daanen wenno saglalaka a gadyet. Ngem no awan ti Internet ti maysa a kongregasion, kasanoda ngarud a ma-update dagiti publikasion a linaon ti JW Box? Kanayon a mangipatulod ti sangay kadagiti USB, a naglaon kadagiti kabaruan a publikasion ken video iti jw.org, a maisaksak iti JW Box. Agarup ₱200 ($4 U.S.) ti bayad ti maysa a USB.

 Kasano a nakatulong ti JW Box kadagiti kakabsat? Imbaga ni Nathan Adruandra, a maysa nga ama nga aggigian idiay Democratic Republic of Congo: “Nabayagkon a padpadasen nga i-download ti drama nga ‘O Jehova, . . . Kenka Inkabilko ti Panagtalekko’ ken ti Laglagipenyo ti Asawa ni Lot. Ngem diak pulos nai-download, isu a nadismayaak. Ngem mai-download-ko itan dagitoy a video iti selponko, ken makatulong daytoy kadakami a nagannak tapno nasaysayaat ti panangisuromi kadagiti annakmi.”

 Imbaga ti maysa a brother a timmulong a nangi-set up iti JW Box kadagiti kongregasion idiay Nigeria: “Imbilang dagiti kakabsat ti JW Box nga espesial a regalo ni Jehova kadakuada. Maragragsakanda ta naglakada laeng itan nga i-download dagiti publikasion ken video iti Teaching Toolbox.”

 Nasurok a 1,700 a box ti naipatuloden kadagiti kakabsat idiay Africa, Oceania, ken South America. Naiplano met a mapatulodan ti ad-adu pay a kongregasion. Paggapgapuan ti pondo a magastos iti daytoy nga urnos? Kadagiti donasion para iti sangalubongan a trabaho, nga adu kadagita ti maipatpatulod babaen iti donate.mt1130.com. Pagyamanan iti nabuslon a donasionyo.