“Umaykayo kaniak, dakayo amin a nabannog ken madagdagsenan, ket pagin-awaenkayto. Alaenyo ti sangolko ken agsursurokayo kaniak, ta naalumamay ken napakumbabaak, ket magin-awaankayto. Ta naasi ti sangolko, ken nalag-an ti awitko.”​—Mateo 11:28-30, Baro a Lubong a Patarus.

 “Umaykayo kaniak, dakayo amin a nabannog ken madagdagsenan, ket paginanaenkayo. Alaenyo ti sangolko, ket agsursurokayo kaniak agsipud ta naemma ken napakumbabaak, ket masarakanyonto ti inana. Ta nanam-ay ti sangol nga itedko kadakayo, ket nalag-an ti awit nga ipabaklayko kadakayo.”​—Mateo 11:28-30, Ti Baro a Naimbag a Damag Biblia.

 Siaayat nga inawis ni Jesus dagiti dumdumngeg nga umayda kenkuana. Impasiguradona a no agsursuroda kenkuana, mabang-aran ken magin-awaanda.

 “Umaykayo kaniak, dakayo amin a nabannog ken madagdagsenan.” Dagidiay inawis ni Jesus ket dagiti “madagdagsenan” kadagiti linteg ken tradision dagiti tattao nga impilit dagiti lider ti relihion a surotenda. (Mateo 23:4; Marcos 7:7) Madagdagsenan met dagiti ordinario a tattao gapu iti adu a pakadanagan ken mabambannogda ta masapul nga agtrabahoda iti adu nga oras tapno adda pagbiag ti pamiliada.

 “Pagin-awaenkayto.” Inkari ni Jesus a magin-awaan, wenno makainana, dagiti umawat iti naayat nga awisna. Inaramidna dayta babaen ti panangtulongna kadakuada a mangtarus no ania a talaga ti ekspektaren ti Dios kadakuada. (Mateo 7:24, 25) Dayta a pannakaammo ti mangwayawaya kadakuada kadagiti ulbod a kapanunotan ken makapadagsen a tradision dagiti relihion. (Juan 8:31, 32) Uray no ti panagsursuro ken panangyaplikar kadagiti pannursuro ni Jesus ket agkasapulan iti panagregget, makapabang-ar dayta.

 “Alaenyo ti sangolko ken agsursurokayo kaniak.” Idi tiempo ti Biblia, masansan nga agusar dagiti trabahador iti sangol​—kayo a barra a maibaklay iti abaga​—tapno mabagkat dagiti nadagsen nga awit. Isu a ti sao a “sangol” mabalin a kaipapananna ti panagpasakup iti autoridad wenno panangiwanwan ti maysa a tao. (Levitico 26:13; Isaias 14:25; Jeremias 28:4) Ti sasao nga “agsursurokayo kaniak” ket mabalin met a maipatarus kas “agbalinkayo a pasurotko (adalak).” Isu a parparegtaen ni Jesus dagiti dumdumngeg nga agbalinda a pasurotna babaen ti panagtulnogda kenkuana ken panangtuladda iti ulidanna.​—Juan 13:13-15; 1 Pedro 2:21.

 “Magin-awaankayto.” Saan nga inkari ni Jesus a dagus a mapukaw ti amin a problemada. Ngem tinulonganna dagiti dumdumngeg kenkuana a makasarak iti liwliwa ken namnama. (Mateo 6:25-32; 10:29-31) Napaneknekan dagiti nagbalin nga adalanna ken nangawat iti pannursurona a saan a makapadagsen ti panagserbi iti Dios, no di ket mangipaay iti pudpudno a pannakapnek.​—1 Juan 5:3.

 “Ta naasi ti sangolko, ken nalag-an ti awitko.” Ni Jesus ket napakumbaba ken naalumamay, saan a kas kadagiti lider ti relihion idi tiempona. (Juan 7:47-49) Saan a naulpit wenno manangidadanes. Imbes ketdi, nasingpet ken nalaka a maas-asitgan. Saan a nalabes ti namnamaenna kadagiti pasurotna. (Mateo 7:12; Marcos 6:34; Lucas 9:11) Insurona met kadakuada no kasano a mabenepisiaranda iti asi ti Dios ken no kasano a mabang-aranda gapu iti nadalus a konsiensia. (Mateo 5:23, 24; 6:14) Gapu kadagiti nagsasayaat a kualidad ni Jesus, immasideg dagiti tattao kenkuana ken natignayda a mangawat iti naasi a sangolna ken nagbalinda a pasurotna.

 Imbaga ni Jesus ti sasao a masarakan iti Mateo 11:28-30 bayat a mangaskasaba idiay Galilea idi 31 C.E. Kadagiti mannurat iti Ebanghelio, ni laeng apostol Mateo ti nangirekord iti naasi nga awis ni Jesus. Kas dati a parasingir iti buis ken maysa a Judio, ammo ni Mateo no kasano a maparparigat dagiti ordinario a tattao, saan laeng a gapu kadagiti buis a singsingiren dagiti Romano no di ket gapu iti korap ken dakes a narelihiosuan a sistema dagiti Judio. Isu a sigurado a naparegta idi nakitana ti panangusar ni Jesus iti autoridad nga inted kenkuana ti Amana, ni Jehova, a a mangawis kadagiti napakumbaba ken awan gawgawayna a mapan kenkuana.​—Mateo 11:25-27.

 Itampok ti Ebanghelio ni Mateo dagiti naisangsangayan a kualidad ni Jesus kas naikari a Mesias ken agturayto iti Pagarian ti Dios.​—Mateo 1:20-23; Isaias 11:1-5.

 Buyaem daytoy ababa a video tapno makitam ti pakabuklan ti libro a Mateo.