Kasla saan nga ipaypayso ti anakmo ti ageskuela, saanna nga ar-aramiden dagiti asaynmentna, ken saan nga agad-adal. Ania ti resultana? Bimmaba dagiti gradona ken nagmadin ti ugalina. Kasano a matulongam ti anakmo a mangpasayaat iti gradona?

•  Ti masapul a maammuam

•  Ti mabalinmo nga aramiden

 Manayonan ti problema no pilitem. No pilitem ti anakmo, ma-stress idiay eskuelaan ken iti balayyo! Isu a tapno makissayan ti stress-na, mabalin nga agulbod, ilimedna ti nababa a gradona, tuladenna ti pirmam ket isun ti agpirma iti report card-na, wenno saan a sumrek iti klasena. Kumaro laeng ti problema.

 Mabalin a madi ti epekto ti panangted iti premio. “Tapno ipokus ti anakmi ti agadal, ikkanmi iti premio no nangato ti gradona,” kuna ti ama a ni Andrew, “ngem ad-adda metten a ti premio ti pagpokusanna. Idi nakaala iti nababa a grado, mas nalidayan a saanna a naala ti premio ngem iti nababa a gradona.”

 Saan a makatulong no pabasolen ti titser. Baka panunoten ti anakmo a saanna a kasapulan ti agregget tapno mapasayaatna ti gradona. Mabalin pay nga ipabasolna iti sabali dagiti kamalina ken ipabiangna iti sabali ti panangsolbar iti problemana. Ti punto, mabalin a saan a masursuro ti anakmo dagiti napateg a banag a mausarna inton adulton​—ti panangbigbig nga adda responsabilidadna iti aniaman nga aramidenna.

 Kontrolem ti riknam. No makapungtotka, dika pay la makisarsarita iti anakmo maipapan iti gradona. “Nagsayaat ti resultana no kalmado ken mannakaawatkami ken baketko,” kuna ti maysa nga ama a ni Brett.

 Ammuem ti talaga a problema. Dagiti gagangay a rason a nababa ti grado ti anakmo ket pannaka-bully, iyaakar iti sabali nga eskuelaan, madanagan iti eksam, problema iti pamilia, kurang a turog, di nasayaat nga eskediul, wenno marigatan nga agpokus. Dimo koma panunoten a masadut laeng ti anakmo.

 Pagbalinem ti aglawlawyo a komportable a pagadalan. Agaramidka iti eskediul para iti panagadal ken panagaramid iti asaynment. Bumirokka iti lugar a pagaramidan ti anakmo iti asaynmentna nga awan ti makaistorbo (agraman ti telebision ken selpon). Mabalin nga in-inutem nga ipaaramid iti anakmo dagiti asaynmentna tapno ad-adda a makapagpokus. Kuna ni Hector a maysa nga ama a taga-Germany, “No adda nayeskediul nga eksamda, saggabassit nga ag-review-kami iti inaldaw imbes nga aramidenmi dayta inton dandanidan ageksam.”

 Paregtaem nga agadal. No ad-adda a maawatan ti anakmo ti pagsayaatan ti panageskuelana ita, ad-adda a maparegta nga agadal. Kas pagarigan, makatulong ti math tapno masursurona nga ibadyet ti balonna.

 Tip: Tulongam ti anakmo a mangaramid iti asaynmentna, ngem saan a sika ti mangaramid para kenkuana. Inamin ni Andrew, “Nagdepende ti balasangmi kadakami a mangaramid iti asaynmentna isu a saannan nga ikagumaan nga aramiden a bukbukodna.” Tulongam ti anakmo a mangaramid a mismo iti asaynmentna.