Ti Paskua ket selebrasion dagiti Judio iti panangwayawaya ti Dios kadagiti Israelita iti panangadipen kadakuada dagiti Egipcio idi 1513 B.C.E. Imbilin ti Dios a tinawen a laglagipen dagiti Israelita dayta a napateg a pasamak iti maika-14 nga aldaw ti bulan dagiti Judio nga Abib, a naawagan idi agangay iti Nisan.​—Exodo 12:42; Levitico 23:5.

Apay a naawagan iti Paskua?

 Tumukoy ti sao a “Paskua” iti tiempo nga insalakan ti Dios dagiti Israelita iti didigra a nangpapatay iti amin nga inauna iti Egipto. (Exodo 12:27; 13:15) Sakbay nga impakat ti Dios daytoy a nakaro a didigra, imbilinna kadagiti Israelita a warsianda dagiti ruanganda iti dara ti naparti a karnero wenno kalding. (Exodo 12:21, 22) No makita ti Dios daytoy a pagilasinan, labsanna ti balayda ket ispalenna dagiti inauna, isu a naawagan dayta iti Paskua, a ti kaipapananna ket ‘labsan.’​—Exodo 12:​7, 13.

Kasano a naselebraran ti Paskua idi tiempo ti Biblia?

 Inikkan ti Dios dagiti Israelita kadagiti instruksion no kasanoda a selebraran ti umuna a Paskua. a Ti dadduma a karaman iti panangselebrar kadagiti Paskua a nadakamat iti Biblia ket dagiti sumaganad.

•   Daton: Iti maika-10 nga aldaw ti Abib (Nisan), nangpili dagiti pamilia iti karnero (wenno kalding) nga agtawen iti maysa sa pinartida dayta iti maika-14 nga aldaw. Iti umuna a Paskua, nangiwarsi dagiti Judio iti dara dayta nga animal kadagiti bautek, wenno hamba ti ridawda, ken iti makinngato a paset ti ruanganda, sibubukel nga intunoda ti animal, sada kinnan.​—Exodo 12:​3-9.

•   Taraon: Malaksid iti karnero (wenno kalding), nangan dagiti Israelita iti di pinaalsa a tinapay ken napait a natnateng kas paset ti taraonda bayat ti Paskua.​—Exodo 12:8.

•   Piesta: Sinelebraran dagiti Israelita ti Piesta Dagiti Di Pinaalsa a Tinapay iti pito nga aldaw kalpasan ti Paskua. Kabayatan dayta, saanda a nangan iti nalebaduraan a tinapay.​—Exodo 12:17-​20; 2 Cronicas 30:21.

•   Edukasion: Ginundawayan dagiti nagannak ti Paskua a mangisuro kadagiti annakda maipapan ken Jehova a Dios.​—Exodo 12:25-27.

•   Panagbiahe: Idi agangay, nagbiahe dagiti Israelita a napan idiay Jerusalem tapno selebraranda ti Paskua.​—Deuteronomio 16:​5-7; Lucas 2:​41.

•   Dadduma pay a kostumbre: Idi panawen ni Jesus, karaman ti arak ken panagkanta iti selebrasion ti Paskua.​—Mateo 26:19, 30; Lucas 22:15-​18.

Di umiso a kapanunotan maipapan iti Paskua

 Di umiso: Masapul a selebraran dagiti Kristiano ti Paskua.

 Umiso: Kalpasan a sinelebraran ni Jesus ti Paskua idi Nisan 14, 33 C.E., inrugina ti baro a selebrasion: ti Pangrabii ti Apo. (Lucas 22:19, 20; 1 Corinto 11:20) Daytoy a pangrabii sinuktanna ti Paskua ta ipalagipna ti daton ni ‘Kristo ti kordero ti Paskua.’ (1 Corinto 5:7, Ti Baro a Naimbag a Damag Biblia) Natantan-ok ti daton a sakripisio ni Jesus ngem ti daton iti Paskua ta wayawayaanna ti amin a tao iti panangadipen ti basol ken ipapatay.​—Mateo 20:28; Hebreo 9:​15.