Ipakita ti kronolohia ti Biblia a naipasdeken ti Pagarian ti Dios idiay langit idi 1914. Dakamaten daytoy ti padto a nairekord iti kapitulo 4 ti libro ti Biblia a Daniel.

 Sumario ti padto. Babaen ti naimpadtuan a tagtagainep, impakaammo ti Dios ken Ari Nabucodonosor ti Babilonia ti maipapan iti napukan a dakkel a kayo. Nabedbedan ti puonna tapno saan nga agsaringit iti uneg ti “pito a panawen,” kalpasan dayta agsaringit manen.​—Daniel 4:​1, 10-​16.

 Ti umuna a kaitungpalan ti padto. Ti dakkel a kayo irepresentar a mismo ni Ari Nabucodonosor. (Daniel 4:​20-​22) Piguratibo a ‘napukan’ idi temporario a napukawna ti panunotna ken ti kinaarina iti uneg ti pito a tawen. (Daniel 4:​25) Idi insubli ti Dios ti panunot ni Nabucodonosor ken ti kinaarina, binigbigna ti turay ti Dios.​—Daniel 4:​34-​36.

 Pammaneknek nga adda dakdakkel a kaitungpalan ti padto. Ti panggep ti padto ket tapno ‘maammuan koma dagiti tattao a ti Kangatuan isu ti Agturay iti pagarian ti sangatauan ket itedna dayta iti kayatna a pangtedan ken ited ti panagturay iti daydiay kanunumuan ti sangatauan.’ (Daniel 4:​17) Ti kadi natangsit a ni Nabucodonosor ti pangtedan ti Dios iti dayta a turay? Saan, ta addan immuna a naimpadtuan a tagtagainep a mangipakita a saan a ni Nabucodonosor wenno asinoman a napolitikaan nga agturay ti agakem iti daytoy. Imbes ketdi, nangipasdek ti Dios iti “maysa a pagarian a saanto a pulos madadael.”—Daniel 2:31-44.

 Idi un-unana, nangipasdek ti Dios iti pagarian a mangirepresentar iti turayna ditoy daga: ti nagkauna a nasion ti Israel. Impalubos ti Dios a dayta a pagarian ket “madadael” gapu ta saan a matalek dagiti nagturay. Ngem impadtona nga itedna ti turay iti “addaan legal a kalintegan.” (Ezequiel 21:25-​27) Ti Biblia tukoyenna ni Jesu-Kristo kas daydiay addaan legal a kalintegan nga umawat iti agnanayon a pagarian. (Lucas 1:​30-​33) Kas naipadto, ‘napakumbaba’ ni Jesus, saan a kas ken Nabucodonosor.​—Mateo 11:29.

 Ania ti irepresentar ti kayo iti Daniel kapitulo 4? Iti Biblia, no dadduma dagiti kayo irepresentarna ti panangituray. (Ezequiel 17:22-​24; 31:​2-5) Iti dakdakkel a kaitungpalan ti Daniel kapitulo 4, ti dakkel a kayo irepresentarna ti turay ti Dios.

 Ania ti kaipapanan ti pannakapukan ti kayo? No kasano a ti pannakapukan ti kayo irepresentarna ti pannakaisardeng ti turay ni Nabucodonosor, irepresentar met dayta ti pannakaisardeng ti turay ti Dios ditoy daga. Natungpal daytoy idi dinadael ni Nabucodonosor ti Jerusalem, ti lugar a nagturayan dagiti ari ti Israel “iti trono ni Jehova” kas pannakabagi a mismo ti Dios.—1 Cronicas 29:23.

 Ania ti irepresentar ti “pito a panawen”? Ti “pito a panawen” ti tiempo a pinalubosan ti Dios dagiti nasion a mangituray ditoy daga nga awan ti lapped iti aniaman a pagarian nga impasdek ti Dios. Sigun iti kronolohia ti Biblia, nangrugi ti “pito a panawen” idi Oktubre 607 B.C.E. idi dinadael ti Babilonia ti Jerusalem. a​—2 Ar-ari 25:​1, 8-​10

 Kasano kapaut ti “pito a panawen”? Saan a literal a pito a tawen kas iti napasamak ken Nabucodonosor. Imbaga ni Jesus ti sungbat idi kinunana a ti “Jerusalem [simbolo ti turay ti Dios] ibaddebaddekto dagiti nasion, agingga a matungpal ti naituding a pampanawen dagiti nasion.” (Lucas 21:24) “Ti naituding a pampanawen dagiti nasion,” ti tiempo nga impalubos ti Dios a ti turayna ket ‘ibaddebaddek dagiti nasion,’ isu met laeng ti “pito a panawen” iti Daniel kapitulo 4. Kaipapanan daytoy a ti “pito a panawen” ket madama pay laeng idi adda ni Jesus ditoy daga.

 Ipakita ti Biblia no kasano a maammuan ti kapaut dagita a naimpadtuan a “pito a panawen.” Ibagana a ti tallo ket kagudua a “panawen” ket agdagup iti 1,260 nga aldaw, isu a ti “pito a panawen” ket mamindua dayta a bilang, wenno 2,520 nga aldaw. (Apocalipsis 12:​6, 14) No iyaplikar ti naibaga a naimpadtuan a pagannurotan a ‘maysa nga aldaw para iti maysa a tawen,’ ti 2,520 nga aldaw katupagna ti 2,520 a tawen. No kasta, ti “pito a panawen” wenno 2,520 a tawen ket nagpatingga idi Oktubre 1914.​—Numeros 14:34; Ezequiel 4:6.