Us-usaren dagiti tattao dagiti pannursuro ni Jesu-Kristo tapno makaibangonda kadagiti nagduduma a kita ti “Kristiano” a relihion. Nupay kasta, ibaga ti Biblia nga adda laeng maymaysa a kita ti pudpudno a Kinakristiano. Ammuem ti tallo a rason no apay a maibaga a kasta.

1.   Kuna ni Jesus nga insurona “ti kinapudno,” ket imbilang dagiti nagkauna a Kristiano a ti relihionda isu “ti kinapudno.” (Juan 8:​32; 2 Pedro 2:2; 2 Juan 4; 3 Juan 3) Ipakita dagitoy a sasao a dagidiay mangiparparegta kadagiti doktrina a maikontra iti pannursuro ni Jesus saanda nga an-annuroten ti pudpudno a Kinakristiano.

2.   Isursuro ti Biblia a dagiti Kristiano ‘rumbeng nga agsaoda amin a sangsangkatunos.’ (1 Corinto 1:​10) Nupay kasta, adu a relihion nga agkunkuna a Kristianoda ti saan nga agtutunos dagiti pannursuroda, kas koma iti panagbalin a maysa a Kristiano. Saan a mabalin a pudnoda amin dagita a relihion.—1 Pedro 2:​21.

3.   Impadto ni Jesus nga adu ti mangibaga a Kristianoda ngem saanda met nga agtulnog kadagiti bilinna, isu nga ilaksidnanto ida. (Mateo 7:​21-​23; Lucas 6:​46) Adda dagiti mayaw-awan gapu kadagiti panguluen ti relihion a mangtultulaw iti pudno a panagdaydayaw para iti bukodda a pagimbagan. (Mateo 7:​15) Ngem kaykayat ti dadduma a tattao ti peke a Kinakristiano gapu ta dagiti kayatda a denggen ti maibagbaga kadakuada imbes a ti kinapudno manipud iti Biblia.—2 Timoteo 4:​3, 4.

 Iti ilustrasionna maipapan iti trigo ken dakes a ruot, impadto ni Jesus ti nakaro a panagrebelde (panagapostasia) maikontra iti pudno a Kinakristiano. (Mateo 13:24-​30, 36-​43) Iti napaut a tiempo, narigat a mailasin ti nagdumaan dagiti pudno a Kristiano ken palso a Kristiano. Kas impadto ni Jesus, agsaknap ti apostasia kalpasan ti ipapatay dagiti apostol. (Aramid 20:29, 30) Nupay mabalin a sabali ti pannursuro dagiti apostata ken dagiti nadumaduma a peke a Kristiano, amin dagitoy ket ‘simiasi iti kinapudno.’—2 Timoteo 2:​18.

 Impakpakauna met idi ni Jesus nga agbalinto a nalawag ti nagdumaan ti pudno ken palso a Kristiano. Mapaspasamak daytan iti kaaldawantayo, bayat ti “panungpalan ti sistema ti bambanag.”—Mateo 13:30, 39.